VOV4.M’nông: Dak Lak lah ntŭk geh khuch hô ngăn yor srê Covid-19 bah nkual Tây Nguyên tâm năm 2021 n’hanh 3 khay bôk năm 2022. Yơn lah đah nău nsrôih dŭt n’hâm bah lĕ trong Chính trị n’hanh rêh jêng, Dak Lak ntơm dơi uănh nđôi srê Covid-19 ndơ̆ nău rêh plơ̆ tay nâm ơm. N’gor rgum mbơh ƀư dŭt n’hâm ăp trong ndâk nkra tay, hun hao wăng sa, rêh jêng; rgum ntop kơl, mkra ăp nău jêr jŏt, wăk kol an doanh nghiệp, nuĭh ƀon lan ta nkual jêng nu nău hun hao wăng sa-rêh jêng bah n’gor ndâk hao tay n’hanh hun hao.

Ƀon Tơng Jŭ tă lah ntŭk srê têh ngăn bah xă Ea Kao, nkual ƀon têh Buôn Ma Thuột đah 230 nuĭh srê Covid-19 ta rnôk khay 10 năm 2021. Knơm nău lăp dŭt n’hâm bah nău kan dak n’hanh n’gâng kan ƀon lan ndrel đah nău du nuih n’hâm bah nuĭh ƀon lan, tât aƀaơ srê Covid-19 ta aơ lĕ dơi ntrôl rŭch, lĕ rngôch nuĭh ƀon lan bah 18 năm let lơ lĕ dơi chuh tŏng 3 nglai vaccine njrăng n’gang Covid-19.

Ntŭk srê lĕ mô hôm khuch n’hanh nău rêh nuĭh ƀon lan Ƀon Tơng Jŭ lĕ plơ̆ tay nâm ơm. Dôl uănh lah, nuĭh ƀon lan ta aơ gĭt nău dơh bah năi uĕh ơm, nău way nău rêh n’hanh mât nău khlay bah nău kan way ơm kơt cheh tanh, n’gôn ndrănh yăng, chĭng gông... jêng ăp ndơ pâl nđaih gay wăch rgum năch tât uănh nsong rgop mpla nsơ rup ndah bah ƀon lan n’hanh n’hao nău geh an nuĭh ƀon lan.

Năch pâl nđaih rlong ƀư cheh tanh

Wa H Yam Buôn Krông-Kruanh ƀon Tơng Jŭ an gĭt aƀaơ ta ƀon lĕ jêng rmôt ƀư pâl nđaih ăp rnăk nuĭh Êđê tâm ƀon, ndrel rgop n’hanh rhŏ an năch tât đah ƀon lan.

“Geh âk mpôl năch bah ăp n’gor kơt ta Hà Nội, nkual ƀon têh HCM, Huế n’hanh ăp n’gor kiău ma, khân pơng sĭt ta aơ rlong sa ăp ndơ sa bah rnoi mpôl đêt, djăt chĭng gông, mĭn joi mpeh văn hóa bah rnoi mpôl đêt ta ntŭk. Aƀaơ 9 rnăk mpôl hên pă an tĭng nuĭh tĭng kan, ntĭt nsa jay tăm biăp, jay mât sŭr, jay mât djăr, jay n’gôn ndrănh yăng. Gâp dŭt ŭch bah kơi aơ, rnôk nkual pâl nđaih hun hao lơn tay ri mbra geh âk kônh wa râng lơn”.

Jêh srê Covid-19, ur sai yuh H’Mrơng Êban, ta ƀon Mdhar 1B, xă Ea Nuôl, nkuăl Buôn Đôn tâp tâm nău mô geh kan. Geh neh mô geh prăk gay ntuh kơl nkra njêng jêng nău rêh bah ur sai yuh dŭt jêr jŏt. Tă bah ntop kơl bâh rmôt ntêm nkrem n’hanh manh prăk bah ƀon Mdhar 1B, yuh lĕ dơi manh prăk 50 rkeh bah bôk nău kan manh ntop kơl n’hanh pơk hvi nău kan tĭng Nghị quyết 11 bah Chính phủ. Bah tơm prăk manh aơ, yuh lĕ rwăt phân poh gay mât chăm an tơm cà phê n’hanh tăm tay tơm đêt nar gay ntop tay nău geh. Yuh H’Mrơng Êban an gĭt:

“Yor yan Covid-19 mhe rlău jêng 2 hê ủ sai mô geh nău kan jŏ jong. Ntop đah nău jêr jŏt 2 hê ur sai mhe tâm gŭ, mô geh prăk. Knơm nău kơl Ngih dak ntop kơl an 2 ur sai dơi rlet rlău lvang aơ du đêt prăk gay tăm cà phê n’hanh mât chăm ăp tơm tăm êng. Oh dăn lah uĕh bôk nău kan lĕ ntop kơl an rnăk wâl”.

Năch pâl nđaih ngêt ndrănh yăng

Tĭng rnoh kơp bah Ngân hàng Chính sách xã hội n’gor Dak Lak, kơp tât nar 30/6, Ngân hàng dơi Trung ương pă 400 rmen 300 rkeh prăk gay ƀư bôk nău kan an manh an tĭng Nghị quyết 11 geh: An manh ntop kơl nău kan, mât n’hanh pơk hvi nău kan; an manh jay gŭ kon nuĭh; an kon hŏk, sinh viên manh geh rnăk jêr jŏt gay rwăt măy tính, ndơ rhŏ an nti nsơm; an manh ƀư tĭng ăp bôk nău kan rƀŏng tĭn g lam dak mpeh hun hao wăng sa rêh jêng nkual rnoi mpôl đêt n’hanh nkual yôk lvang 2021-2030; an manh đah n’gâng kan mầm non geh khuch yor Covid-19. Tât aƀaơ, Ngân hàng Chính sách xã hội ta n’gor Dak Lak lĕ pă geh 2443 ndơ manh đah rnoh prăk 118 rmen 140 rkeh prăk.

Wa Nguyễn Minh Hướng, Groi Kruanh Ngân hàng chính sách xã hội ta n’gor Dak Lak an gĭt, năm tât, Ngân hàng Chính sách xã hội ta n’gor Dak Lak lĕ tâm rgop đah ăp nău kan geh tât n’hanh ăp rmôt nsum mpôl uănh tay nuĭh dơi an gay ƀư an manh prăk di nău ntrŭnh, ơm pă lĕ rngôch prăk dơi an. Nkre ƀư groi nđôi n’hao uĕh tơm prăk, đăp mpăn n’hanh mât uĕh săk rnglăy tơm prăk.

“Jêh rnôk geh nău mbơh mpeh tơm prăk an manh ri ntŭk kan lĕ tâm ôp an UBND n’gor geh sam ƀŭt ntĭm rđău ăp ngih pah kan nău kan nsum mpôl ndrel đah Ngân hàng uănh ăp nuĭh geh nău ŭch manh prăk. Jêh rnôk geh sam ƀŭt na nê̆ Ngân hàng Chính sách xã hội ntĭm rđău jrô kan ăp nkual tâm rgop đah ăp ban nău kan nsum mpôl ta nkuăl gay mbơh ƀư an manh ngăch ngăn, di nuĭh n’hanh di nău ŭch”.

Ƀư ký ton manh prăk ntop kơl hun hao wăng sa

Gay ƀư tĭng nău rƀŏng lam dak hun hao wăng sa rêh jêng jêh srê Covid-19, mhe rlău UBND n’gor Dak Lak lĕ an bôk nău kan rdâk nkra tay n’hanh hun hao wăng sa-rêh jêng năm 2022-2023, tâm nĕ rƀŏng tât nău ŭch ndâk hao ngăch ăp nău kan nkra njêng, tăch rgâl ta lam n’gor, ntrôl ăp nău hao jêng; kơl lor du đêt nău kan khlay, đăp mpăn ƀư tĭng ăp nău rƀŏng hun hao wăng sa-rêh jêng lĕ n’gluh an. Wa Nguyễn Đình Trung, Ủy viên trung ương Đảng, Bí thư n’gor ủy Dak Lak an gĭt:

 N’gor dôl ƀư nău dăp rgum n’gor kơt dăp rgum dŏng neh, dăp rgum ăp nkual hun hao. Đăp mpăn kloh uĕh, tĭng di rnôk nuĭh ntuh kơl đah n’gor ri khân pơng geh nkô̆ nău mĭn njêng n’hanh bu uănh n’hanh an ntuh kơl. Nău tal 2 lah tâm rgop đah ăp nuĭh tâm nău nkra njêng lah nău kan bah n’gor, n’gor an dâk ƀư nău kan tâm rgop đah ăp nuĭh tâm ăp nău kan nkra njêng. Nău tal 3 nău tăch ndơ kơt hăn ndrel đah công nghiệp nkret njêng jru n’hanh ăp nău mpeh ntung trong. Tâm nău âk kơt nău tơm bah ƀon lan, n’gor mbra nta nơih ngăn”.

6 khay bôk năm, bôl geh khuch bah srê Covid-19, yơn đah ăp nău nsrôih bah nuĭh ƀon lan, doanh nghiệp n’hanh n’gâng kan ƀon lan wăng sa Dak Lak geh âk nău uĕh rnôk dĭng lĕ ndơ hao 7,37%, sŏk an tơm prăk ngih dak geh 4.860 rmen prăk, hao bơi 40% nkôp đah rơh aơ năm bah năp, nău geh tăch n’gluh geh 845 rkeh đôlar Mỹ, hao rlău 61%. Ăp nău kan pâl nđaih, tăch regâl, nkra njêng geh âk nău uĕh. Ăp nău mbơh uĕh nĕ dôl pơk nău ŭch hun hao wăng sa bah Dak Lak.

          Nuĭh rblang: Y Sưng Phê Ja