Bơi 20 năm dŏng ăp tơm prăk manh bah ngân hành chính sách xã hội, wa Nguyễn Thị Tín, ta thôn 3, xă Hòa Lễ, nkuăl jru ngai Krông Bông, n’gor Dak Lak wât kloh nău khlay bah tơm prăk aơ yor nê ma rnăk wâl wa lĕ rklaih luh ach o, đăp mpăn nău rêh. Wa Nguyễn Thị Tín nkoch: năm 2005, tă bah Rmôt kan tahen ơm xă, wa dơi manh kơl an gay mât ndrôk n’hanh ntuh kơl tơm cà phê. Knơm gơih ƀư sa, ntêm nkrem, rnăk wâl pơk hvi mât rong, rwăt tay lŏ. Tă aơ 3 năm, rnăk wâl wa lĕ rklaih luh ach o n’hanh trok lĕ prăk manh bah năp nĕ. Wa Nguyễn Thị Tín an gĭt, rnăk wâl manh tay 40 rkeh prăk tơm prăk an rnăk mhe rklaih luh ach o gay hun hao wăng sa lơn tay:

“Đah tơm prăk manh aơ dŭt uĕh đah ăp rnăk manh, ăp rnăk jêr jŏt. Kơt rnôk bôk năp gâp knơm tơm prăk bah Ngân hàng chính sách ma rnăk wâl hun hao wăng sa, bah nĕ nta an ăp oh kon nti tât lôch tât dŭt. Gâp ŭch manh hao tay tơm prăk gay mât rong tay, pơk hvi mât rong gay hun hao wăng sa an rnăk wâl dơi đăp mpăn lơn”.

Lah ngoăy tâm âk ntŭk kan đă ndơn tơm prăk manh đah Ngân hành chính sách xã hội ta nkuăl Krông Bông, Rmôt kan tahen ơm xă Hòa Lễ dôl geh 5 rmôt ntêm nkrem n’hanh manh prăk, dĭng lĕ nkah rnon bơi 14 rmen prăk. Ưa Thiều Đình Long, Kruanh rmôt tahen ơm xă Hòa Lễ an gĭt, geh âk bôk nău kan manh prăk kơl an kơt: an manh rnăk ach o, rnăk êp ach o n’hanh rnăk mhe rklaih ach o; an manh mkra nău kan n’hanh hăn pah kan dak bah dih; an manh bôk nău kan dak kloh uĕh n’hanh răk ntŭk ntô gŭ âm thôn ƀon; an manh rnăk nkra njêng tăch rgâl n’hanh nuĭh tăch rgâl ta nkual jêr jŏt... kơl nuĭh ƀon lan dơh gĭt. Rmôt kan tâm rgop đah ngân hàng ƀa ƀơ uănh nđôi ntĭm an ăp rnăk dŏng prăk manh di nău ŭch.

“Ăp rmôt ta aơ ri kruanh rmôt lah chi hội trưởng da dê. Rnôk rƀŭn rmôt, rgum rƀŭn ri khân pơng way nkoch tât nău manh prăk. Ƀon lan ta aơ âk nuĭh bu dŭt gĭt mpeh ngân hành chính sách, nău ƀư ăp nar bah khân pơng, khân pơng manh prăk kon, trok prăk kon jêh nĕ rgop ntêm nkrem khân pơng gĭt n’hanh nău ƀư tĭng trok prăk kon ăp khay bu dŭt uĕh. Manh prăk ta aơ lah nuĭh ƀon lan rgum tâm nkra njêng, mât rong ndrôk me mô lah ntuh kơl rwăt neh lŏ, ntuh kơl phân poh gay hun hao wăng sa rnăk wâl”.

Tĭng wa Nguyễn Xuân Điền, Giám đốc jrô kan ƀư sam ƀŭt Ngân hàng chính sách xã hội nkuăl Krông Bông, gay nuĭh ƀon lan dơh gĭt tât tơm prăk kơl an, bah meng nău rgâl trong ƀư manh prăk, ăp khay ntŭk kan ƀư 14 ntŭk ƀư sam ƀŭt hăn ăp ntŭk sĭt ăp xă, nkuăl têh. Knơm nĕ năm bah năp, rlău 58.700 rnăk ta nkuăl Krông Bông lĕ dơi manh tĭng 14 bôk nău kan an manh, dĭng lĕ nkah rnon rlău 532 rmen prăk. Wa Nguyễn Xuân Điền an lah, gay mât uĕh săk rnglăy tơm prăk ri nău tơm bah ăp ntŭk kan ndơn an, ăp rmôt ntêm nkrem-manh prăk dŭt khlay. Aơ lah “mpang ty nthoi jong” bah ngân hàng tât ăp ntŭk nkual jru ngai, nkual jêr jŏt, rgop ntrôl rŭch nău “an manh prăk kon khlay”.

“Ăp năm ri jrô kan ƀư tiăr nti mro an ăp ntŭk wơt ndơn nău kan kơt ăp rmôt gưl xă, kruanh rmôt ntêm nkrem, manh prăk, Mpôl mât uănh êng ăp thôn, ƀon. Ri tă bah nĕ du trong nkoch trêng gay an nuĭh ƀon lan dơi gĭt manh prăk chính sách n’hanh wât gay gĭt tât, ƀư tĭng. Sam ƀŭt sam tra ri dơi an dơm, jêng kônh wa gĭt dơh lơn, jêng manh prăk kon âk ta nkuăl mô hôm geh tay”.

Ta lam n’gor Dak Lak, năm 2022, ngân hàng chính sách xã hội lĕ pă an prăk rlău 51.800 rnăk manh prăk, dĭng lĕ rnoh an manh bơi 2.000 rmen prăk. Ăp tơm prăk manh kơl an rnăk ach o, rnăk êp ach o, rnăk hăn pah kan ngai plơ̆ sĭt ƀon lan manh gay hun hao wăng sa rnăk wâl, đăp mpăn nău rêh. Tơm prăk manh aơ lĕ ntơm tâm di nău ŭch manh bah ăp rnăk, rgum tâm ăp xă jru ngai, rgop uĕh an trong kan n’hŭch ach o n’hanh hun hao wăng sa-rêh jêng ƀon lan./.