VOV4.M’nông: Nuĭh ƀon lan ta nkuăl Čư M’gar, n’gor Dak Lak dôl dŭt ji nuih rnôk trong Tỉnh lộ 8, lvang hăn rlău xă Ea Kpam mhe jêh ntuh kơl nkra tay, ƀư uĕh yơn lĕ djơh, geh âk “lŭ ntu”, ƀư roh đăp mpăn ntung trong. Ndrel đah nĕ, nău ndâk ƀư n’hanh ƀư geh âk nău jêr jŏt, ƀư an lvang trong geh tay âk nău klach an nuĭh hăn trong.

Tỉnh lộ 8 lvang rlău xă Ea Kpam nkuăl Čư M’gar dŭt âk năm tâm nu nău khuch, djơh, hăn nsong dŭt jêr jŏt. Năm 2021, trong dơi N’gâng kan ntung trong n’gor Dak Lak uănh an nău nchrăp ƀư nkra tay. N’hanh tât dŭt năm ri jêh. Năm răm mô hŏ dơi jŏ, nuĭh ƀon lan ta aơ lĕ ji nuih yor trong lĕ djơh, geh âk “rluh ntu” jâng rpu jâng rveh. Du hê nuĭh ƀon lan ta thôn 1, xă Ea Kpam an gĭt trong aơ djơh dâl jêh rnôk ƀư n’hanh geh dŭt âk nău geh rmanh, ngăn lah tâm măng:

“Dŭt jêr jŏt, ƀư geh du đêt yơn ma ƀư bah năp bah kơi djơh, aƀaơ rluh ntu, ntă tay jêh nĕ aƀaơ hôm e kơt nĕ. Măng ngo bu uănh mô saơ trong lah geh rmanh. Ntĭt nsa aƀaơ mô lap ma chôt lah knŭng khĭt dơm m’hâm ƀư dơi rêh”.

Măt trong chay geh âk rlu ntu, geh âk nău prah rmanh ndeh, ngăn lah ta măng.

Wa Nguyễn Hữu Chung, Groi Kruanh UBND xă Ea Kpam an gĭt, Tỉnh lộ 8 mhe ntuh kơl yơn lĕ jŭr djơh ƀư nuĭh ƀon lan ta xă dŭt ji nuih. Âk nău rmanh lĕ geh tâm măng rnôk nuĭh ƀon lan hăn ncho ndeh măt mâp ntu jâng rpu jâng rvê ta trong. Nuĭh ƀon lan lĕ âk tơ̆ geh nău rgop tât ăp gưl dơi mkra, ngăn lah tâm ăp rơh mâp nuĭh ƀon lan bah nuĭh ntoh măt Quốc hội n’hanh HĐND ăp gưl. Yơn lah, tât aƀaơ trong mô hŏ dơi nkra ƀư nău hăn nsong bah nuĭh ƀon lan geh dŭt âk nău rmanh:

“Trong jŭr djơh ri ƀư rmanh âk nuĭh hôm ngăn. Lah kăl e pơng djơh tâm ban, ƀon lan gĭt trong djơh âk ri khân pơng njrăng. Ta aơ nuĭh hăn bên trong ri gĭt, lah rluh ntu têh hăn ri klach, yơn ntŭk jêt aơ yơn dŭt jru, jêng tât mô bên trong ntu jru lah jêr ƀĭt”.

Nuĭh ƀon lan xă Ea Kpam dŭt ji nuih rnôk trong mhe dơi ntuh kơl lĕ khuch, jŭr djơh.

Nău nchrăp ƀư nkra Tỉnh lộ 8, lvang Km12+300 tât Km14+950 đah jong rlău 2,4km dơi N’gâng kan ntung trong n’gor Dak Lak uănh an khay 4/2021 đah dĭng lĕ rnoh prăk 9 rmen prăk. Ntŭk kan mbơh ntĭm rdâk ƀư lah Công ty TNHH đầu tư APP Việt Nam, hôm nuĭh ndranh ndâk ƀư lah Công ty TNHH Nam Sơn.

Geh tât nău Tỉnh lộ 8 jŭr djơh, tâm n’gul khay 7, UBND nkuăl Čư M’gar lĕ geh sam bŭt njuăl N’gâng kan ntung trong n’gor Dak Lak đă mkra du đêt ntŭk hôm e. Tĭng UBND nkuăl Čư M’gar, aƀaơ măt trong chay geh du đêt ntŭk jâng rpu, jâng rveh, măt trong plôk djơh. Nkre, nău ntuh kơl trong hoch dak mô tâm ban ƀư an dak mô dơi hoch luh, li tâm trong, lêng tâm jay nuĭh ƀon lan ƀư n’hôl ƀô ntŭk ntô gŭ âm, dơh geh prah rmanh ndeh./.

          Nuĭh rblang: Y Sưng Phê Ja