Mhe aơ N’gâng kan tuch tăm mât rong n’hanh Hun hao ƀon lan lĕ ƀư Rƀŭn nchră trực tuyến lam dak n’gul gâl 3 năm ƀư tĭng bôk nău kan rƀŏng tĭng lam dak ndâk njêng thôn ƀon mhe (lvang 2021-2025). Tĭng nău mbơh, tât aƀaơ lam dak geh 6.022 xă tâm di thôn ƀon mhe, 263 ntŭk kan gưl nkuăl tâm di thôn ƀon mhe. Lam dak geh 19 n’gor, nkual ƀon têh mpeh tâm Trung ương geh 100% rnoh xă geh tâm di thôn ƀon mhe. Wa Đinh Thị Ngoại (rnoi Bahnar) ta ƀon Lơk, xă Nghĩa An, nkuăl K’Bang, n’gor Gia Lai an gĭt:

“Kônh wa ƀon lan ƀon Lơk lĕ nsrôih râng, rƀŏng tĭng ntrong leo, tâm rnglăp ndrel, ndâk ƀư trong bê tông, trong thôn ƀon. Jêh rnôk kơt dŏng khoa học kỹ thuật tâm nkra njêng ri nău geh lĕ dŭt âk, ƀon kloh uĕh lơn,wăng sa hun hao lơn nkôp đah bah năp”.

Ƀư tĭng ntĭm đă bah Ban Thường vụ N’gor ủy Gia Lai mpeh n’hao nău rđău bah ăp gưl ủy mpeh ndâk ƀư ƀon lan mhe tâm nkual rnoi mpôl đêt, 5 năm bah năp, tơm prăk ngih dak n’hanh kon nuĭh rgop lĕ rgop bơi 1.500 rmen prăk gay ndâk njêng thôn ƀon mhe tâm nkual rnoi mpôl đêt n’gor Gia Lai.

Lvang bah năm 2021 tât 2023, dĭng lĕ prăk rgŏ jă ƀư tĭng bôk nău kan ndâk njêng thôn ƀon mhe ta lam dak nklăp 1.752.000 rmen prăk. Bah năp nĕ, bôl lam dak mhe an “rŭn soan” njrăng n’gang srê Covod-19, yơn Bôk nău kan hôm e jêh nău rƀŏng Chính phủ jao. Bôl ndrĭ, tĭng wa Ngô Trường Sơn, Chánh văn phòng Điều phối thôn ƀon mhe Trung ương tâm rnôk ƀư tĭng hôm e âk jêr jŏt, mô hŏ dơi ƀư.

“Uĕh nâp geh tâm di n’hanh trong kan mât nâp nâl săk rnglăy bah du đêt xă jeh geh tâm di hôm e đêt, lơn lah rnoh ndơ ƀư ntŭk ntô gŭ am, nău geh, rnă njrăng đăp mpăn nău rêh jêng... Uĕh nâp ăp ndơ ƀư ntung trong jêh rnôk tâm di ta du đêt ntŭk lĕ geh âk nău jŭr djơh yor mô hŏ dơi uănh tât, bôl nkra ƀa ƀơ”.

Ta Rƀŭn nchră lam dak n’gul gâl 3 năm ƀư tĭng bôk nău kan rƀŏng tĭng lam dak ndâk njêng thôn ƀon mhe, đại biểu ăp ntŭk lĕ geh âk nău rgop, dăn đă trong mkra. Na nê̆ kơt mât răk ntŭk ntô gŭ âm, wa Nguyễn Văn Phúc, Groi Kruanh UBND n’gor Lâm Đồng an lah, an geh du trong ƀư pơk hvi rwach rgum ndŏk nja thôn ƀon.

“Geh nkô̆ nău lah mbra kơp rnoh ndŏk nja ăp năm ta nkual têh bah he n’hanh an ndranh. He knŭng ƀư du nău kan dơm, nĕ lah sŏk prăk bah nuĭh ƀon lan n’hanh trok an doanh nghiệp ndranh. Kơt nĕ, đăp mpăn nău rgum ndŏk nja kloh uĕh. Mpôl hên an lah nău aơ an ƀư. Aƀaơ mpôl hên dôl ƀư du nkuăl dơm nĕ lah Đức Trọng gay ƀư ntrong kan aơ, lah lôch uĕh mpôl hên ŭch mbơh ƀư ta lam hvi lam n’gor”.

Kruanh N’gâng kan Tuch tăm mât rong n’hanh hun hao thôn ƀon Lê Minh Hoan lah rjăp: Bôk nău kan rƀŏng tĭng lam dak ndâk njêng thôn ƀon mhe mô knŭng lah ndâk njêng ƀư ntung trong, ma hôm n’hao nău rêh drăp ndơ n’hanh hun hao an nuĭh thôn ƀon.

“Lĕ rngôch rnoh khlay he dôl ƀư geh ntŭk uĕh ntŭk mô uĕh. Yơn he an mĭn mhe du đêt, mĭn jru nău khlay, rnô he dơi gĭt trong jru nău khlay nĕ ri he mbra jêng kơt nuĭh Thống đốc Nhật djôt hăn Hà Nội tăch. Bu lah du tong rnoh gĭt ntô̆ n’hao yor nău ŭch ri ƀư êng. Yor he ƀư, he djôt tay nău uĕh lăng an nuĭh ƀon lan he, djôt tay nău rêh an nsum mpôl. Gay bah kơi aơ nsum mpôl mbra râng ndrel he mât uănh ƀon lan...”.

Aƀaơ, ta lam dak dôl ƀư 3 bôk nău kan rƀŏng tĭng lam dak, tâm nĕ geh bôk nău kan ndâk njêng ƀon lan mhe. Yơn lah, ngăch sŏk pă prăk trong nchrăp tơm prăk trung ương năm 2022 n’hanh lvang 2021-2025 hôm e mbrơi. Kruanh Quốc hội Vương Đình Huệ đă ƀư kloh lĕ nău kan bah ăp n’gâng kan, nău kan tâm nău mbrơi pă an prăk 3 bôk nău kan rƀŏng tĭng lam dak jêng tât mpŭng lĭr:

Groi nđôi aơ an dơi ơh dơi ôp. Ndơ lơh lŏ mbrơi? Ndơ lơh wăk kol, ăp ntŭk kol ta ntŭk? n’hanh nău dôh rklaih m’hâm ƀư. 3 bôk nău kan nkân âk rhiăng nkô̆ nău jao an Nghị định 28, jêh nĕ nkra 27, aƀaơ dơn nău kan bah ăp n’gâng kan, nău kan m’hâm ƀư ma an geh nău nĕ. Ndơ lơh lŏ pă an prăk mbrơi? prăk sự nghiệp hôm e mbơh lơn prăk ntuh kơl m’hâm ƀư? an kơt aơ mpŭng lĭr dŭt âk”.

Mpôl groi nđôi bah Ủy ban Thường vụ Quốc hội đă geh trong mkra jao trong nchrăp ƀư tĭng tơm prăk sự nghiệp mô lah mbơh an tơm prăk sự nghiệp tơm prăk trung ương ƀư tĭng ăp bôk nău kan rƀŏng tĭng lam dak lvang 2024-2025 gay ăp ntŭk nchrăp tâm trong kan tâm pă prăk.