Hăn ta trong bê tông bơi 1 km, hvi 4 mét, nthoi bah ƀon Myah hăn nkual tuch tăm, wa Ksor Jinh (deh năm 1950, ta xă Ia Krai, nkuăl Ia Grai) an gĭt, knŭng tă aơ 1 năm, aơ lah trong har, hvi man 2 mét, nsŭk tâm yan phang, mbir tâm yan mih ƀư âk nuĭh prah rnôk rdêng ndơ lŏ mir tâm yan mih.

Rnôk dơi n’gâng kan xă mbơh mpeh nău ngih dak ntop kơl ƀon lan ƀư trong bê tông, wa Ksor Jinh lĕ hăn lor an 1002m, âk nuĭh ƀon lan tâm ƀon nsing nơm, ŭch êng an hang rhiăng m2 neh gay pơk hvi n’hanh ƀư jêh trong hăn.

“Bah năp đaơ trong hăn nsong jêr jŏt ngăn, oh kon hăn nti njê ngăn, nuĭh têh ăp tơ̆ hăn chợ rwăt phe anh sĭt trong bŏk dŭt jêr hăn. Bah jêh rơh mâp nuĭh ƀon lan, xă hăn tât ntŭk gay uănh n’hanh jêh uănh ngăn, xă lĕ geh nău nchrăp ƀư trong, jêh nĕ rgŏ jă kônh wa an neh, phah đêt tơm cà phê, điều gay pơk hvi trong, mpôl hên dŭt răm ƀư tĭng. Tât aƀaơ trong lĕ dơi pơk hvi, uănh trong oh kon hăn nti dŭt đăp mpăn n’hanh dơh an kônh wa ƀon lan rdêng ndơ lŏ mir, nău aơ ƀư an ăp nuĭh răm rhơn ngăn”.

Hôm ta ƀon Nú, xă Ia Khai, nkuăl Ia Grai, bah ntrong leo an neh ƀư trong, ma bôk năm 2023, trong bê tông jong 800 mét, hvi 4 mét lĕ ngăch jêh bah năp yan lêh điều. Wa Rơ Châm H’Monh, nuĭh nsing nơm ƀon Nú an gĭt, rnôk n’gâng kan ƀon lan rgŏ jă kônh wa an neh, ƀư trong, âk rnăk dun yor an neh ri an sreh rhiăng tơm điều dôl play ăp năm. Wa H’Monh hăn lor ƀư ntrong leo, sre 19 tơm bah rnăk wâl nơm, jêh nĕ rgŏ jă oh nô, kon sau tâm rnoi mpôl ƀư tĭng. Bah nĕ, ndrel đah nău rgŏ jă dŭt n’hâm bah thôn, 20 rnăk lĕ sre 300 tơm điều njok 2 đah trong gay kloh uĕh an jêh. Wa H’Monh an gĭt:

“Bah nar ndâk njêng thôn ƀon mhe, tâm ƀon geh dŭt âk rgâl mhe, dơi ngih dak uănh mĭn, ntop kơl ndâk ƀư pơk hvi trong hăn. Aƀaơ, âk trong tâm thôn ƀon dơi tuh bê tông. Êng gâp lĕ nsơr an du gâl neh n’hanh lĕ sreh jăng âk tơm tăm gay pơk hvi trong. Ăp rnăk êng lah n’gâng kan ƀon lan đă an neh, sreh jăng tơm tăm ri kônh wa ŭch ƀư tĭng êng, yor nuĭh ƀon lan wât ngih dak ŭch nta nơih an nuĭh ƀon lan geh trong hăn nsong kloh uĕh. Gâp dŭt răm n’hanh lah uĕh nău uănh mĭn bah n’gâng kan ƀon lan”.

Gay ƀư tĭng ăp bôk nău kan rƀŏng tĭng lam dak mpeh ndâk njêng thôn ƀon mhe n’hanh hun hao wăng sa-rêh jêng nkual rnoi mpôl đêt, âk năm aơ, gưl ủy, n’gâng kan ƀon lan nkuăl Ia Grai, n’gor Gia Lai lĕ kuăl jă nău lăp bah lĕ trong chính trị, nuĭh ƀon lan n’hanh doanh nghiệp. Tâm nĕ, nău rƀŏng khlay bah nkuăl lah kơl lor nkual rnoi mpôl đêt, nkual jêr; kơl hun hao ntung trong, ƀư an hun hao wăng sa, rêh jêng. Tă bah nĕ, ntrong leo an neh ƀư trong, gay ƀư tĭng ăp bôk nău kan, dơi  nuĭh ƀon lan tâm banm ŭch, rƀŏng tĭng. Êng bah năm 2020 tât aƀaơ, lam nkuăl kơp lĕ rgŏ jă âk rbăn rnăk ƀon lan, nsơr an dĭng lĕ rlău 20.000 m2 neh. Tâm rnoh nĕ, ăp xă geh âk ƀon lan rnoi mpôl đêt kơt Ia Krai, Ia Khai, Ia Yok, Ia O,... ăp ntŭk geh âk trong ƀư uĕh, săk rnglăy. Tĭng nĕ, cán bộ, đảng viên, nuĭh nsing nơm, bu ranh ƀon ntoh lư lah rmôt hăn lor rgŏ jă, bah nĕ geh nău tâm ban ŭch, nsing nơm n’hanh ƀư tĭng bah nuĭh ƀon lan. Wa Nguyễn Mai Lương-Kruanh UBND xă Ia Khai, nkuăl Ia Khai an gĭt:

“Xă lĕ rƀŭn jă bu ranh ƀon, bí thư chi bộ n’hanh lơn lah nuĭh nsing nơm ta ntŭk. Tâm rnôk ƀư tĭng, trong way ƀư lah mih jŏ bak neh, nar aơ khân pơng mô wât ri ôi taơ mpôl hên jŭr tay, nar aơ pă đồng chí aơ ủ ntrŭt nsôr ri ôi taơ pă đồng chí êng. Lah kơt rnăk nĕ geh nuĭh Rmôt kan lŏ mir ri mpôl hên jă Rmôt nuĭh ƀon lan kan lŏ mir, nuĭh rmôt bu ur ri mpôl hên đă kruanh rmôt chi hội bu ur, rblang an kônh wa wât”.

Ntung trong nar lơ kloh uĕh lĕ kơl nău tăch rgâl đah ăp thôn, ƀon nkual rnoi mpôl đêt, nkual rnoi mpôl đêt dơh lơn, nău bôk năp an đảng bộ, n’gâng kan ƀon lan n’hanh nuĭh ƀon lan nkual n’har bri ach o Ia Grai nsrôih ndâk njêng nău rêh nar lơ hơm răm, uĕh lăng./.