Ngoăy tâm âk nău ƀư ntoh lư tâm ntrong leo “Druh ndăm ndrel ty ndâk njêng thôn ƀon mhe” bah druh ndăm Gia Lai mbơh ƀư năm 2023 nĕ lah ndơ ƀư trong druh ndăm “Ang-kloh-uĕh” ta ƀon Thơh Ga B, xă Chư Don, nkuăl Chư Pưh. Ndơ ƀư geh jong bơi 1 km dơi nglăp 20 bóng đen măt nar n’hanh tăm 200 tơm si đah dĭng lĕ khlay rlău 60 rkeh prăk. Trong druh ndăm “Ang-kloh uĕh’ dơi ndơ̆ an dŏng lĕ rgop ƀư rgâl muh măt nkual thôn ƀon n’hanh đăp mpăn rnă njrăng, đăp mpăn ntung trong ta ƀon Thơh Ga B. Nô Lê Quốc Việt-Bí thư Đoàn xă Chư Don, nkuăl Chư Pưh an gĭt:

Rƀŏng tĭng ntrong leo druh ndăm ndâk njêng thôn ƀon mhe ta ƀon Thơh Ga B, Đoàn xă rgŏ jă đoàn viên druh ndăm rƀŏng tĭng n’hanh ƀư tĭng ăp gưl kan kơt tăm tơm si njok trong hăn, nglăp bóng ŭnh mẳ nar, tăm tơm si ta ăp mpông pêr mhe gay jêng ăp mpông pêr uĕh nđĭr. Rgŏ jă kônh wa koaih rwach trong ta năp jay nơm gay ƀư kloh uĕh. Tâm năm tât đoàn xă rgŏ jă tay kônh ssa n’hanh đoàn viên druh ndăm ton ƀư tĭng ăp nkô̆ nău gay mât trong druh ndăm ang, kloh uĕh.

Năm 2023, đah bôk nău “Năm rgâl mrô ăp nău ƀư bah Đoàn”, ăp rmôt kan ntŭk đoàn ta lam n’gor Gia Lai lĕ ntrôl dăng nkoch trêng, rgŏ jă nuĭh ƀon lan râng rgâl mrô đah âk trong ƀư na nê̆ kơt: Mbơh n’hanh nkoch tơih mã QR mpeh rdâk njêng nău kan n’hanh joi nău kan, mbơh ƀư ăp ntrong ƀư rgâl ntŭk ntô moh, thư viện mrô n’hanh ăp ntrong kan tổ dân phố điện tử, nkual chợ mô dŏng prăk măt... Aƀaơ, lam n’gor geh 1.233 rmôt rgâl mrô yor cán bộ đoàn ƀư n’gâng tơm. Rgâl mrô ăp nău ƀư bah Đoàn lĕ rgop na nê̆ nău ƀư tĭng ăp nău kan tĭng nău ntrŭnh mrô 924 bah Thủ tướng Chính phủ mpeh “Uănh an bôk nău kan rgâl mrô tâm ndâk njêng thôn ƀon mhe, rƀŏng tât thôn ƀon mhe thông minh lvang 2021-2025”. Yuh Nguyễn Hoài Phương-Bí thư Nkuăl đoàn Chư Păh an gĭt:

 Gay ƀư tĭng bôk nău trong kan năm 2023, nău rgâm mrô ăp ntŭk moh săk nsĭt tay âk nău dơh an kônh wa ƀon lan ta lam nkuăl. Ăp băl đoàn viên, druh ndăm rchong tâm rnôk hăn khâl ăp ntŭk chăng dŭt dơh mĭn joi n’hanh gĭt ăp nău mbơh ta ntŭk nĕ n’hanh dơi tâm ban ŭch kơl bah kônh wa ƀonb lan kơt ăp băl đoàn viên druh ndăm ta nkuăl”.

Ƀư tĭng tĭng ăp gưl nău kan gay ndrel ty, rgop soan ndâk njêng thôn ƀon mhe, tâm năm 2023, Đoàn Druh ndăm n’gor Gia Lai lĕ mbơh ƀư ndâk njêng 3 ndơ dŏng druh ndăm gưl n’gor, 74 ndơ ƀư gưl nkuăl, 615 ndơ ƀư gưl bah dâng n’hanh 653 nău ƀư druh ndăm râng “Ndâk njêng ntŭk ntô ang-kloh uĕh, đăp mpăn”; nkre ndâk njêng n’hanh nkra 17 trong hăn mpoh ang trong ƀon tơm, tăm mhe rlău 996 rbăn tơm si... Nô Đỗ Đức Thanh-Groi Bí thư N’gor đoàn Gia lai uănh lah, nău ndrel ty bah druh ndăm Gia Lai lĕ rgop ndrel ăp ntŭk ƀư tĭng bôk nău kan ndâk njêng thôn ƀon mhe geh âk săk rnglăy uĕh.

Lvang 2021-2025 mpôl hên kơt dŏng tay rgâl mrô n’hanh ăp nău rgâl khoa học kỹ thuật an râng ndâk njêng thôn ƀon mhe. Bah meng nĕ, nău tâm rgop đah ăp gưl ăp nău kan gay geh ăp trong ƀư, ăp tơm prăk gay ntop kơl ăp băl đoàn viên, druh ndăm lah nău ma ntŭk kan dŭt uănh tât. Rlău ma ƀư tĭn nău ntrŭnh bah trung ương Đoàn mpôl hên rƀŏng tât ndâk njêng ƀon tơm edôl rêh. Rƀŏng tĭng ndâk njêng 3 ntrong kan n’hanh tâm năm 2024 mpôl hên ndâk njêng ta xă An Trung, nkuăl Kông Chro tĭng nkô̆ nău ntĭm rđău bah gưl ủy, mpôl hên ntop kơl ăp ntŭk, rgum nuĭh ntop kơl ăp ntŭk sĭt tât lor thôn ƀon mhe.