Ndrel đah mpôl tŭr chĭng goh gong bâh nuĭh têh, ƀon Groi Wet, xã Glar, nkuăl Đăk Đoa, lĕ geh hun hao mpôl tŭr chĭng kon se đah rlău 20 mom ndăm tât râng. Dơi geh ăp rơh ndơn kan gay ma mât rbăy văn hóa way ơm ta ƀon lan geh nău kan dŭt khlăy bâh nghệ nhân- đảng viên A lip. Oh Uyết, 13 năm deh, nuĭh kan ndrel mpôol tur chĭng kon se ƀon Groi Wet an gĭt.

“Rnôk hôm nti jrô 4 oh nti tŭr chĭng. Ntơm rnôk nti mô blău, tât ba kơi nơh blau đê̆ blău đê̆. Wa Alip nti hăn tur chĭng leo hên ăp ntŭk, dŭt lah ueh wa Alip ngăn”.

Tâm bơi tât 20 năm aơ, nghệ nhân Alip mô hôm kahgĭt lĕ nti tur chĭng goh gong an âk rơh mom ndăm, kon se jê̆ ta ăp ƀon tâm xã ta nkual. Wa dŭt rhơn nkoch. Hôm nuĭh mom ŭch djăt, ŭch nti tŭr chĭng, lah wa mbra nti tay đŏng

"Rvê roh rui, rĭ gâp nsrôih nti tay. Ntơm nơh, oh kon ŭch djăt, aƀaơ rĭ ŭch nti, hăn tâm rlong ta xã, nkuăl, n’gor hôm. Gâp lah nuĭh Đảng viên rĭ nsrôih nti, ŭch ba kơi tay mât rbăy tay nău ueh êng bâh nuĭh ƀon lan nơm”.

Ta xã Glar, ntŭk geh dŭt âk rnoh nuĭh lah nuĭh Bahnar, ăp nuĭh Đảng viên lah dôl lah nuĭh dâk bôk năp kơl an ƀon lan tâm ƀon mât rbăy nău văn hóa way ơm n’hanh hun hao nău wăng sa rêh jêng. Nô Sin- Bí thư chi bộ, kruanh thôn ƀon Dôr 1, way geh nsrôih mbơh tơih an mom ndăm mât đăp mpăn hăn trong, mât đăp mpăn rnă njrăng. Rnăk vâl hăn bôk năp tâm nău tăm tay cà phê, tăm tay tĭng nău mpŏng 4C n’hanh nsrôih kơl an ƀon lan ƀư tĭng gay ma geh săk rnglăy wăng sa âk.

"Hăn lor bôk năp rĭ he mô kâp ngơi âk, ma an geh ƀư lor dâl, ƀư nsrôih n’hanh kơl dơi an ƀon lan. Jut n’huch ach o rĭ an geh gơih pah kan, lôch nĕ he mbơh đă ƀon lan mơ bu djăt tĭng. Ntĭt lah 2 tât 3 năm ba năp, gâp tăm tay cà phê, ƀon lan uănh he ƀư ueh đŏng lah mô, khân păng mơ tĭng. Lah he mbơh cà phê he tăm ba năp lĕ tăm jŏ, mô hôm jêng, aƀaơ tăm tay rĭ nău geh play âk ueh”.

Aƀaơ, Đảng bộ xã Glar, nkuăl Đăk Đoa geh 15 chi bộ đah 160 đảng viên, tâm nĕ geh 100 đảng viên lah nuĭh rnoi đê̆. Ăp đảng viên way lah hăn bôk năp tâm nău kan ƀư tĭng ueh ăp nău kan tâm rlong rŏng dak kơt rdâk njêng nkual ƀon lan mhe, pă neh ƀư trong, jut jăng ach o, mât nâp rnă njrăng đăp mpăn ta ntŭk. Ndrel đah nău ntuh kơl bâh ngih dak, nău tâm rnglăp bâh lĕ trong kan chính trị, ƀon lan tâm xã Glar lĕ sĭt tât nkô̆ mpŏng nkual ƀon lan mhe năm 2017 n’hanh dôl geh rdâk njêng tay nkual ƀon lan mhe tĭng nău mpŏng n’hao mhe. Wa Y Suôn- Groi Bí thư Đảng ủy xã Glar, an gĭt.

“Đảng uỷ xã dŭt mât uănh tât nău kan hun hao đảng n’hanh đảng viên tâm nkual rnoi đê̆. Đah Đảng viên ta ntŭk lah hạt nhân nău kan mbơh tơih ntĭm nti chính trị- nău mĭn an ƀon lan ta ntŭk. Bâh nĕ lah mât nâp rnă njrăng chính trị, đăp mpăn lĕ ntŭk rêh jêng ta ntŭk, gay ma n’hao nău dơi kan, n’hao nău leo kan bâh Đảng viên, ndâk nsơm nău knơm đah Đảng đah ƀon lan ta ntŭk xã dŭt ueh.

Aƀaơ, lam xã Glar kanŭng geh 4% rnăk ach o, ăp nău mpŏng kan bâh xã nkual ƀon lan mhe geh mât nâp nâl, trong hăn ta ƀon lan ăp nar lơ ma ueh lơn. Rnă njrăng đăp mpăn ueh lăng, nău wăng sa mô rlu hun hao, văn hóa way ơm geh mât n’hao nău kan, tâm nău dơi nĕ geh ăp nău tâm rgop mô rlu bâh ăp đảng viên nuĭh rnoi đê̆ ta Glar, an ƀon lan ăp nar lơ ma têh ndrŏng lơn.