Năm aơ lah năm bôk năp, ntrong n’hoch dak tă bah Ntŭk hoch dak Thuỷ lợi Ia Mơr hŏ jêh, leo dak tât lŏ bah ƀon lan thôn Klah, xã Ia Mơr. Aơ kŏ lah năm bôk năp, kônh wa rnoi Jrai tăm ba dak tâm lŏ knŭng geh ƀư ba mir. Wa Siu Thọ-Kruanh thôn mbơh, tâm yan bôk năp tuch tăm, kônh wa hôm nau mô blau, yơn lah nau geh kŏ 4tạ/ha ba mir. Nau geh aơ kơl an ăp rnăk rnơm lơn tâm yan mhe:

‘Bah năp nơh du yan ba geh ăp năm knŭng du tạ tât 2 tạ dơm, rnôk aơ ƀư dơi 2 yan ri ma nau geh jêng âk, kônh wa rhơn ngăn. Lah ueh Đảng, Ngih dak hŏ kơl an kônh wa”.

Ndrel ma ntŭk hoch dak ƀư ueh, ntŭk tăch rgâl bah cao su kŏ geh ndâk đŏng, kơl an ăp ntŭk ƀư kan tăch rgâl geh jêng, pă kan pah đăp mpăn ân ăp nŭih pah kan tâm nkuăl. Nô Rơ Lan Bên, deh năm 1995, tâm ƀon Khôi, Xã Ia Mơr rhơn mbơh, năm aơ rnoh prăk khay bah 2 hê ur sai đăp mpăn ntơm 13 tât 15 rkeh/kgay. Êng nê, rnăk nô hôm geh êng 2 sào cà phê, 6 sào ba ndrel ndrôk đŏng, ri ma kŏ geh ndơ sa ndơ têm:

‘Ntơm bah nar ƀư công nhân Công ty cao su bu jao ân gâp kor rtăk cao su tâm 3 năm, jêh 3 năm sŏk prăk nê gay ma ƀư ngih lĕ 200 rkeh. Năm ba kơi đŏng gâp rvăt ndeh mhe 57 rkeh moh Sonic, jêh ri prăk dŏng ân kon hăn nti. Tâm ngih rvăt năp âk ndơ đŏng, rnôk aơ ngih hên hŏ geh mbơm oi. Bah năp nơh, rnăk hên jêr ngăn, rnôk aơ ri mô geh ji ngot ji hir ôh”.

Ia Mơr lah xã n’har bri geh âk nau vay ơm ngăn, dôl ma geh ndâk ƀư ân lôch jêh ndrel vơt ndơn âk nau dơi hun hao mhe. Wa Nguyễn Tuấn Anh-Groi kruanh UBND xã mbơh, ntrong pă điện hŏ rêng tâm ăp ƀon lan, ăp ntŭk kơt lah ngih rƀŭn rgum, ngih săm ƀŭt, ngih dak si geh n’hao mhe, nkra nâp tâm ban. Ngăn lah, ntrong hăn tâm ăp thôn, tât ăp lŏ ân tât n’gor ri kŏ mpoh ang ndrel bơi jêh, kơl an Ia Mơr nthoi trong hăn tăch rgâl ueh lăng. Wa Nguyễn Tuấn Anh lah rjăp:

‘Trong hăn rnôk aơ kŏ geh nau đăp mpăn đŏng, nchrăp jêh nkra trong tât n’gor 665 ndrel trong hoch dak tât lŏ. Aơ lah ăp nau kan khlay gay kônh wa ƀon lan leo rdeng tăch rgâl ndoh ndơ, ntrŭt dăng nau hun hao văng sa tâm xã Ia Mơr hun hao”.

Bol ma nau rêh bah ƀon lan xã n’har bri Ia Mor, nkuăl Chư Prông hôm âk nau jêr, yơn ndrel ma nau kơl an ntuh kơl bah ăp gưl n’gâng kan, kônh wa ăp rnoi mpôl ta aơ hŏ nar lơn ma geh nau nơih ueh lơn, pơk trong gay kơl an kônh wa nsôih gay ma hao jêng ndâk njêng nau rêh hơm răm, hun hao, rgop nau mât nâp nau đăp mpăn tâm nkual n’har bri mpeh ba lơ bah neh dak./.