Hăn tâm trong mhe tă geh tŏ bê tông kloh, đah ăp ntil kao tăm mhe bar đah trong, nthoi ƀon Ia Nueng tât ngăn tâm Biển Hồ, bu ranh Hmrick rhơn nkoch, geh ngih dak kơl an tơm prăk, hôm nŭih ƀon lan ri rgop n’hâm. Trong hăn tâm ƀon hŏ kloh mô êng kơl ƀon Ia Nueng ueh nâp, ma kônh wa nchuăn rdeng tuh mbo kŏ nơih lơn rđil bah năp nơh âk ngăn. Rnôk aơ, trong ƀon, ăp rnăk kŏ geh nkra ngih ach chrach nâp kloh, mô hôm geh ndrôk, sur tâm nâm ndjrôm kơt ntơm ôh. Bu ranh ntĭm kon sau nơm ƀư ueh tĭng ăp nau ntrŭnh bah Đảng ndrel Ngih dak:

            ‘Xã Biển Hồ nsôih ndâk njêng ƀon lan mhe n’hao prêh kơt ăp nkô̆ nau nchrăp luh. Tâm năm 2024 tât ri hên mra nsôih bonh đă kônh wa gay kônh wa gĭt ndrel nsum ty ndâk njêng ƀon lan mhe n’hao prêh. Kônh wa tâm ƀon nsôih nsum ma n’gâng kan xã, thôn, nkoch trêng ân kônh wa gĭt kloh lơ gay ma ndrel nuih n’hâm, nsum ty ma n’gâng kan tâm nkuăl ƀư tâm di kơt nau nchrăp luh”.

            Êp Ia Nueng lah ƀon Phung kŏ geh âk nau mhe. Mô êng knŭng trong bê tông mhe, ngih rƀŭn rgum nâp ueh, ma văn hoá ơm yau bah kônh wa lơn ma geh ƀư ueh đŏng. Wa Đưk, kruanh ƀon Phung mbơh, bu ur tâm ƀon hŏ dơi geh ndâk rmôt tâm boh nsum tanh njuh, mơng đah ăp nau kan ê nkra tăch rgâl ăp ntil ndơ nơm geh dơi ƀư, ndrel ma nau hun hao văng sa pâl n’aih. Tâm ƀon geh rmôt tur chĭng geh 43 nŭih, lah ntŭk rgum nau ơm yau ueh ngăn bah mom ndăm. Wa Đưk mbơh, năm 2024, ƀon Phung lŏ nsôih ƀư ăp nau kan hôm e ê lôch:

            ‘Mhe nơh ƀon Phung mhe geh kơp dơn ƀon lan mhe, nau aơ ƀư ân kônh wa tâm ƀon rhơn yor geh Đảng, Ngih dak kơl an, rnôk aơ kônh wa tâm ƀon nsôih rvăt dŏng bảo hiẻm y tế. Ntơm bah nau kan bonh đă nkoch trêng ri kônh wa kŏ gĭt dơi nau geh jêng, yor rnôk ji kuet ri hăn săm ji kŏ mra geh nau huch du gưl nau jâk mpeh tơm prăk. Tal bar đŏng lah ăp rnăk kŏ nsôih ueh tâm nau nkra nâp ntŭk ntu nơm gŭ, trong hăn geh pơk hvi, geh răk kloh lam ƀon, nsôih pah kan jan sa hun hao văng sa rnăk vâl, jêh nê đŏng pah ƀư định danh điện tử ri phung hên nsôih kơl an gay đăp mpăn 100% ƀon lan ƀư jêh định danh điện tử”.

            Tĭng wa Đinh Thị Hoa-Groi Kruanh UBND xã Biển Hồ tât rnôk aơ, lam xã hŏ ƀư jêh 16/19 nkô̆ nau dơi ƀon lan mhe n’hao prêh. Tĭng nê, lam trong hăn tâm thôn đah rnoh jong 20 km hŏ geh tŏ be tông, rlau 17km trong tât lŏ geh ƀư nâp nâl. Ăp nau kan văn hoá kơt ngih rƀŭn rgum geh ndaka ƀư nâp. Tâm ăp ƀon, nŭih ƀon lan lĕ mơng ma nau kan tuch tăm tĭng trong ueh, tam, rlau 90% rnoh neh tuch tăm hŏ geh dŏng máy móc, tŏ dak êng ndrel geh têm nkrem. Ăp nau dơi tâm nau rêh kơt dak dŏng kloh, geh mât chăm n’hâm soan ma dak si, geh ntŭk pâl n’aih bah nŭih ƀon lan kŏ geh đăp mpăn. Yơn lah, yor nau ơm jŏ jru mpeh nau vay mơng, ri ma du đê̆ nkô̆ nau kơt 3% rnoh nŭih lah khĭt ri geh leo su, mô lah nkô̆ nau định danh điện tử, ƀư nau kan tuch tăm ân geh lŏ ƀư jêh tay tâm ăp năm ba kơi:

            ‘Năm aơ, nau geh dơi du hê bôk nŭih lah 57,6 rkeh/nŭih/năm lah nau rlet đŏng rđil nau nchrăp. Tal bar lah ntŭk ntu gung trong bah xã kŏ geh nau jêh ueh, đăp mpăn trong hăn tâm ƀon lan geh tât 97% ndrel dôl ntrŭnh ƀư nau kan gay ma jêh ăp nau kan tâm năm 2023. Nau rêh bah kônh wa geh n’hao prêh, nau săk geh kŏ âk. Nau kan ndâk njêng ƀon lan mhe n’hao prêh geh leo nsĭt dơi nau săk tam ndrel nau geh dơi ngăn tâm di ma nau ntrŭnh ƀon lan gĭt, geh ƀư ndrel geh dŏng”.

            Đah nau nsum n’hâm soan kơl tâm rklaih nau jêr, n’gâng kan ndrel ƀon lan xã Biển Hồ, nkuăl ƀon têh Pleiku dôl lŏ nsôih ndâk njêng ƀon lan mhe n’hao prêh nar lơn ma săk ntor tâm nkuăl neh Gia Lai./.