Wa Đinh Thị Ngoại-Chi hội trưởng Bu ur ƀon Lơk, xă Nghĩa An, nkuăl K’Bang an gĭt, rƀŏng tĭng ntrong leo nsum soan ndâk njêng thôn ƀon mhe, 5 năm bah năp, kônh wa tâm ƀon rgop hang rhiăng nar luh n’hanh rlău 1 rmen prăk, dôh rklaih êng mpêr n’gar gay pơk hvi trong tâm thôn, ƀư mhe 4 trong tâm lŏ mir. 5 rnăk dơi ntop kơl jŭt jăng ngih rông mpông sat. Năm 2022, nău geh rĭng 41 rkeh prăk/du hê, rnoh rnăk ach o hŭch âk, tâm ƀon mô hôm ngih rông mpông sat. Wa Đinh Thị Ngoại an gĭt:

“Tâm ntrong leo ndâk njêng thôn ƀon mhe, kônh wa nuĭh ƀon lan ƀon Lơk lĕ nsrôih râng, rƀŏng tĭng ntrong leo, tâm rnglăp ndrel, ndâk njêng trong bê tông, trong thôn ƀon. Jêh rnôk kơt dŏng khoa học kỹ thuật tâm nkra njêng ri nău geh lĕ hao lơn, ƀon kloh uĕh lơn, wăng sa hun hao lơn nkôp đah bah năp”.

Ƀon Lơk lah ngoăy tâm rnoh 206 thôn, ƀon rnoi mpôl đêt ta n’gor Gia Lai lĕ rgâl ăp ntil rnôk mbơh ƀư Ntim đă mrô 12 Ban Thường vụ n’gor ủy mpeh n’hao nău rđău bah ăp gưl ủy mpeh ndâk njêng ƀon lan mhe tâm nkual rnoi mpôl đêt. Tĭng nĕ, đah tơm prăk ngih dak n’hanh kon nuĭh rgop bơi 1.500 rmen prăk, ndrel đah nău rgop rlău 96.500 nar luh, n’hanh nuĭh ƀon lan an rlău 400.000m2 neh. Jêh 5 năm, aƀaơ lam n’gor geh 110 thôn, ƀon nkual rnoi mpôl đêt tâm di thôn ƀon mhe, nău rêh bah kônh wa nar lơ dơi hao. Gay mât uĕh săk rnglăy ăp tơm prăk kơl nuĭh ƀon lan ach o nâp nâl, ta rgum nchră n’glôch jêh 5 năm ƀư tĭng ntĭm đă 12, wa Hồ Văn Niên-Bí thư N’gor ủy Gia Lai đă:

Trong Chính trị an lăp dŭt n’hâm, tâm ban, săk rnglăy, ƀa ƀơ, na nao n’hanh ngăn ngên; rgŏ jă n’hanh dŏng geh săk rnglăy, tâm rgop ăp tơm prăk bah ăp bôk nău kan, nău chrăp ƀư; kơl nuĭh ƀon lan gĭt ăp tơm prăk manh. Ăp n’gâng kan, ban, nău kan bah n’gor ngăch gĭt jêr jŏt, wăk kol gay ntĭm mô lah ngăch dăn đă gưl dơi mkra nău kan uănh mĭn tay, mkra. Nsrôih, ƀư tĭng dŭt n’hâm lơn tay, gay săk rnglăy bah Ntĭm đă 12 ngăn ngên tât đah nuĭh ƀon lan”.