Ôi (3/6), ta Đồng Nai, Groi Thủ tướng Trần Lưu Quang râng Lễ mbơh nkuâl Xuân Lộc di rnoh ƀon lan mhe ntop n’hao năm 2023. Lah ta rơh lễ, wa Võ Tấn Đức – nuĭh dơi manh ƀư kruanh UBND n’gor Đồng Nai an gĭt: Tĭng ƀư bôk nău  kan rdâk njêng ƀon lan mhe, nkuâl Xuân Lộc way lah ntŭk dâk leo lor bôk năp tâm trong rdâk njêng ƀon lan mhe “4 geh”, ƀon lan mhe, rdâk njêng ƀon lan mhe ntop n’hao n’hanh rdâk njêng ƀon lan mhe ntĭt leo lor.

Tĭng wa Đức, nău dơi geh bah nkuâl Xuân Lộc tâm rdâk njêng ƀon lan mhe geh nkô̆ khlay ring tam âk tât nău hun hao wăng sa- rêh jêng kon nuĭh bah nkuâl Xuân Lộc lah êng n’hanh ta n’gor lah nsum. Lơn lah hŏ njêng ntŭk rgum tơm an nău hun hao bah bôk nău kan rdâk njêng ƀon lan mhe. Mpeh n’gâng kan ta ntŭk, wa Nguyễn Thị Cát Tiên – Kruanh UBND nkuâl Xuân Lộc lah rjăp, nău dơi tâm nău rdâk njêng ƀon lan mhe ntop n’hao lah tât bah ăp rơh kơn ƀon lan, 80% tơm  ndơ n’hanh nuĭh kan rhŏ dŏng an rdâk njêng nkuâl ƀon lan mhe ntop n’hao tă bah ƀon lan nơm ƀư.