Tâm ngih mhe ndâk ƀư kloh uĕh, yuh Nguyễn Thị Lê Thu ta Tổ dân phố 4, phường Tân Hòa, nkual ƀon têh Buôn Ma Thuột, n’gor n’gor Dak Lak an gĭt, gâp lah nuĭh ndrô bah 3 hê kon hôm e jêt, âk năm gŭ manh jay mê̆ bơ̆. Jay mhe hvi bơi 40 mét vuông lĕ kơl 4 me kon geh du mlâm jay ngăn.

Bah năp đaơ gŭ manh jay kđar me bơ̆, mih truh ăp ntŭk, duh ri duh n’hanh nsuk ƀâ̆ lĕ me kon gŭ njê ngăn. N’gâng kan Công an jao an jay, 4 me kon geh jay ndê mih, ndê duh jêng rhơn ngăn, mô rvê truh mô lah duh tay. Săk oh mô geh prăk ri mbơi mô janh mĭn ndâk ƀư jay kơt aơ.

Rnăk wâl yuh H’Nuân Knul lah ngoăy tâm ăp rnăk ach o ngăn buôn Tiêu, xă Ea Tiêu, nkuăl Cư Kuin, n’gor Dak Lak. Yuh an gĭt, rnăk wâl geh 6 nuĭh yơn mô geh neh tuch tăm, nău rêh knŭng kâp tâm nar luh manh bu bah 2 hê ur sai. Yor prăk kaih rnăk wâl mô geh jêng yuh an gŭ tâm jay truh sat. H’Nuân ơm mĭn lah, rnăk wâl gâp mbra mô dơi geh ƀư du mlâm jay bah duh, bah mih, yơn aƀaơ, yuh lŏ geh du mlâm jay xi măng.

Bah năp đaơ, ur sai gâp rwăt jay kđar sĭt rdâk đah rnoh khlay 3 rkeh prăk, yơn aƀaơ kđar n’hanh tôl ôm lĕ hôm. Jêh nĕ mpeh công an tât ndâk ƀư an jay mhe kloh uĕh. 6 nuĭh gŭ tâm jay mhe răm ngăn, mô rvê tay. Aƀaơ ur sai gâp mĭn ƀư sa gay mât oh kon hăn nti.

Tĭng wa Hồ Viết Hùng-Groi Kruanh UBND xă Ea Tul, nkuăl Cư Kuin, Bôk nău rgop an tâm nchră bah N’gâng kan Công an ta xă geh 22 rnăk jêr jŏt đah jay gŭ dơi jao an jay tâm rnglăp. Dĭng lĕ prăk 1 rmen 760 rkeh prăk. Aƀaơ ăp rnăk lĕ dơn jao jay n’hanh lăp gŭ rêh. Nău ntop kơl jay gŭ mô knŭng kơl ăp rnăk “đăp mpăn gŭ âm pah kan jan sa”, ma hôm kơl ƀon lan lôch jêh rnoh ndơ ƀư jay gŭ tâm ndâk njêng thôn ƀon mhe. Wa Hồ Viết Hùng an gĭt: 

Aƀaơ rnoh jŭt nhih rông mpông sat ta xă ntơm đăp mpăn nkôp đah rnoh an ƀư, rgop tâm trong kan ndâk njêng thôn ƀon mhe bah xă. Rnôk dơi kơl jay gŭ, kônh wa dŭt rhơn, đăp mpăn nău rêh hun hao wăng sa rnăk wâl, rgop ndâk njêng n’hanh hun hao xă nơm nâp dăng.

Lvang 2022-2025 n’gor Dak Lak nsrôih ndâk ƀư rlău 5.000 mlâm jay ntop kơl ăp rnăk ach o, êp ach o, rnăk dơi kơl, rnăk jêr jŏt đah jay gŭ. Bôk nău rgop an tâm nchră ndâk ƀư 1.200 mlâm jay tâm kơl bah N’gâng kan công an ntop dŭt têh, kơl n’gor dơi lôch jêh nău rƀŏng lĕ n’gluh an. Wa Lê Bá Cảnh-Groi Kruanh Ủy ban Mặt trận Tổ quốc Việt Nam n’gor Dak Lak an gĭt, rnôk wơt dơn bôk nău rgop an tâm nchră, UBMTTQ ăp gưl ta n’gor lĕ tâm rgop đah nău kan công an, n’gâng kan ƀon lan, kơp uănh, săch, nchih săk ăp nuĭh dơn dŏng ndâk ƀư jao jay gŭ an ăp rnăk ƀon lan. Lĕ rngôch 1.200 mlâm jay lĕ jao an n’hanh ăp rnăk lĕ lăp gŭ rêh. Năm tât, UBMTQ Việt Nam n’gor Dak Lak rgŏ jă tay ăp tơm prăk kon nuĭh gay ƀư tĭng trong nchrăp ndâk ƀư rnoh jay ƀa ƀă jao an ăp rnăk.

Mpôl hên mbơh ƀư tay ndâk njêng ntop kơl ăp nuĭh jêr jŏt đah jay gŭ n’hanh mpŏng ăp nău kan, nsum mpôl, ăp rmôt kan mô lah ăp nuĭh lŏng bôr tôr tâm n’hanh bah dih n’gor tâm rgop đah n’gor Dak Lak ntop kơl nuĭh ƀon lan ta lam n’gor mô geh jay gŭ. M’hâm ƀư tâm lvang 2022-2025, đăp mpăn dơi jêh nău rƀŏng ndâk ƀư rlău 5.000 jay, ntop kơl nuĭh jêr jŏt đah jay gŭ ta lvang aơ tâm n’gor.

Bôk nău an tâm nchră bah N’gâng kan Công an, ndâk ƀư 1.200 mlâm jay an ăp rnăk jêr jŏt, rnăk dơi kơl, rnăk nuĭh rnoi đêt ta n’gor Dak Lak, dơi mbơh ƀư bah khay 3/2024 n’hanh lĕ jêh dŭt khay 7/2024. Dĭng lĕ prăk ƀư bôk nău an tâm rgop lah 96 rmen prăk, tâm nĕ prăk ntop kơl bah N’gâng kan Công an lah 60 rmen prăk, hôm ƀa ƀă yor n’gor manh. Du mlâm jay hvi 36 m2, đah mpir xây, ntưm tôl, ntă  gạch men, khlay 80 rkeh prăk. Aƀaơ 1.200 rnăk lĕ gŭ rêh, tă bah nĕ rgop kơl n’gor Dak Lak jŭt n’hŭch ach o, tâm pă jêr jŏt đah ƀon lan rnoi mpôl đêt, kơl nuĭh ƀon lan đăp mpăn ƀư sa, tâm rnglăp ndâk njêng wăng sa, thôn ƀon mhe n’hanh mât rnă njrăng neh dak. Du bôk nău rgop an tâm nchră têh, yơn lĕ jêh knŭng rlău 4 khay an saơ nău ntuh kơl rjăp, tâm rgop săk rnglăy bah ăp gưl nău kan.