VOV4.M’nông: N’gâng kan tuch tăm mât rong n’hanh hun hao ƀon lan mhe geh sam ƀŭt mbơh rblang njuăl Thủ tướng Chính phủ mpeh nău uănh an bôk nău kan hun hao pâl nđaih ƀon lan ndâk njêng ƀon lan mhe lvang 2021-2025.

Tĭng nĕ, dĭng tơm prăk ƀư tĭng bôk nău kan nchrăp nklăp 2 rbăn 500 rmen prăk, ƀư tĭng bôk nău kan rƀŏng tĭng lam dak ndâk njêng ƀon lan mhe lvang 2021-2025. Tâm nĕ, tơm prăk Trung ương ntop kơl bah bôk nău kan rƀŏng tĭng lam dak ndâk njêng ƀon lan mhe nklăp 500 rmen prăk; tơm prăk n’gor 550 rmen prăk; prăk tâm rgop bah ăp bôk nău kan, nău nchrăp ƀư, bôk nău rgop tâm nchră êng 560 rmen prăk; prăk an manh n’hanh rgŏ jă bah ăp tơm prăk kon nuĭh rgop nklăp 890 rmen prăk.

Bôk nău kan gay ntrôl dăng hun hao pâl nđaih ƀon lan hăn ndrel đah nău geh, nău dơi mpeh lŏ mir, ƀon nău kan, văn hóa n’hanh ntŭk ntô gŭ âm bah ăp ntŭk. Nkre n’hao uĕh nău rêh drăp ndơ, nuih n’hâm bah nuĭh ƀon lan, rgop rgâl trong wăng sa ƀon lan tĭng trong tâm rgop khlay n’hanh hun hao nâp nâl.

Nău rƀŏng tât năm 2025 lah hun hao, rgâl tâm di ăp ntŭk tât n’hanh ndơ pâl nđaih dơi kơp dơn hăn ndrel đah nău geh mpeh lŏ mir, văn hóa, ƀon nău kan mô lah ntŭk ntô geh ơm bah n’gor; đêt ngăn 500 ntŭk tăch rgâl pâl nđaih ƀon lan dơi kơp dơn dăp gưl n’hanh kơp dơn tâm di rhŏ an năch pâl nđaih.

Bôk nău kan ntrôl hun hao wăng sa ƀon lan hăn ndrel đah tâm rnôk rgâl mrô n’hanh bôk nău kan ăp xă du ntil ndơ (OCOP) đah đêt ngăn geh 80 ndơ pâl nđaih ntŭk gŭ rêh n’hanh ntŭk pâl nđaih ƀon lan dơi kơp dơn tâm di OCOP 3 sao let lơ n’hanh dơi rgâl tâm di; tâm nĕ đêt ngăn 50% ndơ pâl nđaih ntŭk gŭ rêh n’hanh ntŭk pâl nđaih ƀon lan dơi rgâl mhe n’hanh boăt nthoi tâm trong mpla nsơ, ntrŭt ngăch pâl nđaih đah công nghệ mrô.

Bôk nău kan nsrôih 100% ntŭk pâl nđaih ƀon lan dơi nkoch, mpla; 50% ntŭk pâl nđaih ƀon lan kơt tĭng ăp ntŭk tăch rgâl điện tử tâm nău ƀư pâl nđaih. Du nkuăl ƀon lan mhe geh dơi pâl nđaih ndâk njêng đêt ngăn 1 ntrong kan tâm rgop pâl nđaih lŏ mir ƀon lan geh êng. Đêt ngăn 70% nuĭh tơm ntŭk pâl nđaih ƀon lan dơi ntĭm nti, ntĭm mpeh nău kan mât uănh pâl nđaih... Lơn lah mbra geh ntŭk prăp sam ƀŭt sam tra n’hanh bản đồ mrô ăp ntŭk pâl nđaih thôn ƀon ta lam dak.

Gay ƀư tĭng bôk nău kan, ăp nău kan dơi kan mbra kơp uănh, jêh trong ƀư, nău kơl mpeh hun hao pâl nđaih ƀon lan. Ndâk njêng nchrŏng trong hun hao pâl nđaih thôn ƀon n’hanh rgum, ntop tay dăp rgum hun hao wăng sa-rêh jêng, dăp rgum trong pâl nđaih lam dak n’hanh dăp rgum ƀon lan mhe. Ăp ntŭk geh ndơ pâl nđaih ndâk njêng bôk nău rgop an tâm nchră, bôk nău kan mô lah trong nchrăp hun hao pâl nđaih thôn ƀon lvang 2022-2025, hăn ndrel đah kơp tay ăp ntŭk pâl nđaih thôn ƀon tâm di đah ăp dăp rgum geh tât.

Nkre, bôk nău kan ndâk njêng n’hanh jêh trong tâm di rnoh, rnoh ndơ ƀư, rnoh kỹ thuật mpeh pâl nđaih ƀon lan; ntrôl tâm boh kan ndrel ngih dak-ƀư êng, tâm rgop ngih dak-ƀư êng-nsum mpôl, ăp ntrong kan mât uănh rgum ăp nkual ngih dak n’hanh ƀư êng, doanh nghiệp n’hanh nsum mpôl tâm hun hao pâl nđaih ƀon lan.

Bôk nău kan mbra rgŏ jă, tâm ndôp n’hanh dŏng săk rnglăy ăp tơm prăk an hun hao pâl nđaih ƀon lan ntuh kơl, lơn lah bah doanh nghiệp, ntŭk gŭ rêh... an hun hao pâl nđaih ƀon lan. Bôk nău kan tâm rgop ntĭm nti tay, ntĭm nti n’hanh n’hao nău blău an pah kan pâl nđaih thôn ƀon. Ndơ̆ ăp nkô̆ nău ntĭm nti tay, ntĭm nti mpeh pâl nđaih an ăp bôk nău kan ntĭm nti bah ăp ntŭk ntĭm nti ta ntŭk n’hanh nkual...

Lơn lah, gay kơt dŏng công nghệ, ntrôl rgâl mrô tâm hun hao pâl nđaih thôn ƀon, bôk nău kan mbra ƀư bản đô mrô ăp ndơ pâl nđaih tâm ƀon lan, ntop kơl tâm rgop ndơ pâl nđaih thôn ƀon đah ăp ndơ pâl nđaih êng rhŏ an ăp nău ntrŭt ngăch pâl nđaih thôn ƀon. Nău êng ndâk njêng ntŭk mât prăk sam ƀŭt rnoh mrô tâm ban ŭch bah Trung ương tât ƀon lan rhŏ an nău mât uănh, mpla nsơ n’hanh ntrŭt ngăch pâl nđaih ƀon lan; mô lah ăp ntŭk way trang điện tử mpeh pâl nđaih tâm ƀon lan./.

          Nuĭh rblang: Y Sưng Phê Ja