Di khay rlu nti, rĭng bah ôi nar ngoăy tât nar prao tâm pơh, 40 oh jêt geh nău rêh jêr jŏt ta ƀol Trol Đeng, nkuăl têh Chư Ty, nkuăl Đức Cơ lŏ răm nđơr tât đah jrô nti ta ntŭk ngih sam ƀŭt ƀon. Bôl ăp oh jêt 6 năm deh mô lah ăp nô yuh têh 10 năm deh, răm nđơr đah ndrôm sam ƀŭt, mâng nchih n’hanh ăp mông nti tâm pleh đah ăp mông pâl. Oh Ra Mah H’Xiêu, 7 năm deh, ƀon Trol Đeng, nkuăl têh Chư Ty, nkuăl Đức Cơ, nkoch:

Kon nti jrô 2, hăn nti dơi pâl rlưn nai ntĭm kon răk bài, kon hăn nti khay rlu nti saơ dŭt răm.

Hôm oh H’Nhi Êban, 10 năm saơ nău nsing nơm rnôk dơi râng jrô nti.

Năm aơ kon hao jrô 5, hăn nti saơ dŭt răm, dơi djăt nai ntĭm, kon dŭt ŭch hăn nti khay rlu nti kơt aơ.

Nai Nông Ngọc Huân, (nai Ngih sam ƀŭt THPT Lê Hoàn, nkuăl Đức Cơ) lah ngoăy tâm ăp nai hăn kơl kan ntĭm khay rlu nti an kon se ƀon Trol Đeng. Ta aơ, nai ntĭm an ăp kon se jêt ta aơ bah nchih rplay sam ƀŭt, nti đánh vần tât ƀư ăp bài toán dơh. Nai Nông Thị Ngọc Huân nkoch, gâp saơ dŭt răm rnôk ăp oh jêt ta ăp nkual jêr jŏt rgâl hao tĭng nar nti.

Ăp oh lăp jrô 1 ăp nai ntĭm ăp oh răk n’hanh nchih, nkre năp tay an ăp oh du đêt nău blău tâm nău rêh. Ăp oh têh lơn ri dơi răk nchih uĕh lơn, yơn gay ăp oh tâm rnglăp ndrel n’hanh janh ri ăp nai mbra geh âk bài tập êng, geh ăp nău ƀư gay ăp oh dơi tiăr nti tay nău blău tâm nău rêh. Saơ ăp oh blău âk lơn, răl lơn, râng ăp nău ƀư dŭt uĕh.

Tĭng nai Lê Thị Xuân, đoàn viên Mpôl druh ndăm nkuăl têh Chư Ty, nkuăl Đức Cơ, bôl nău rêh mô tŏng, hăn nti đah bri mih trôk sial yơn ăp oh hôm e dŭt gơih tât jrô nti. Jrô nti khay rlu nti an dơm ta ƀon Trol Đeng mô knŭng djôt tât rplay sam ƀŭt, nău blău an ăp oh kon hŏk ma hôm kơl ăp băl mom kơl kan geh tay nău ƀư ngăn, dơi rhŏ an nsum mpôl n’hanh mô rlu têh jêng.

Tâm rnôk ntĭm ntop tay ta aơ ri gâp saơ ăp oh dŭt gơih, bôl bri mih, sial yơn ăp băl nĕ hôm e tât tŏng ăp, hăn nti geh rnôk djôt n’ăp oh. Ăp oh mô tŏng dŭt âk yơn saơ nuih n’hâm nti nsơm bah ăp oh dŭt uĕh. Gâp mpŏng bôk nău kan aơ mbra dơi mât tay ta ăp khay rlu nti năm bah kơi.

Yuh Lê Thị Thu, Bí thư Đoàn Thanh niên nkuăl têh Chư Ty an gĭt, jrô nti khay rlu nti ƀư ta ƀon Trol Đeng lah jrô rlong ƀư lor bah ăp băl mom nkuăl têh tâm rơh khay rlu nti aơ. Ntŭk kan mbra nsôih mât tay bôk nău kan ta ăp năm bah kơi gay kơl ăp oh nkual jêr jŏt geh dơi nti, răm rlưn n’hanh hun hao lĕ rngôch.

Ăp đoàn viên geh âk nău nsrôih gay rgŏ jă ăp oh tât jrô nti năp an ăp oh rplay sam ƀŭt, ăp nău blău khlay tâm nău rêh. Mpôl druh ndăm rgŏ jă đŏng ăp nuĭh lŏng bôk tôr gay ăp oh rnôk tât mông rlu nti ăp băl mbra dơi geh du hộp dak toh ndrôk, ntop kơl ndrôm sam ƀŭt, kho ao ơm n’hanh ăp ndơ dŏng nti nta an ntŭk ntô nti nsơm n’hanh pâl rlưn uĕh an ăp oh.

Năm nti mhe lĕ êp tât, du đêt ntŭk an kon se hăn nti bah năp 2 pơh gay bên ngih sam ƀŭt, tĭng jrô nti. Hôm ƀa ƀă ăp ngih sam ƀŭt mbra an kon hŏk ăp gưl tât ngih sam ƀŭt tâm pơh tât.

Du yan rlu nti ăp jrô nti dơh nơih yơn geh âk nău yô̆ rŏng, ăp oh kon se nkual jêr jŏt kơt dơi ntop tay n’hâm soan n’hanh nău ŭch hao. Đah ăp băl mom kơl kan, bôl knŭng lah ăp nar nti kon hŏk jêt yơn lĕ nsĭt âk nău blău ơm n’hanh têh jêng lơn rnôk wât jru lơn mpeh nău rêh ƀon lan nkual jru ngai.