Nkuăl Phú Thiện lah ntŭk geh âk ƀon lan rnoi mpôl đêt, lah ndrĭch lŏ têh ngăn đah ndơ moh phe bôk năp bah n’gor Gia Lai. Ntơm bah Nghị quyết 05-NQ/HU năm 2012 bah nkuăl ủy Phú Thiện, tât aƀaơ, jêh rlău 10 năm mbơh ƀư ndâk njêng moh phe ba, Phú Thiện lĕ geh âk ndrĭch lŏ têh, srih tăm đah măy mŏk, nsĭt tqay nău rêh hơm răm an kônh wa ƀon lan.

Năm 2012, rnăk wâl wa Ksor Dría, ta thôn Plei Tal, xă Ia Sol, nkuăl Phú Thiện tâm rnăk ach o, dơi geh nău ntop kơl bah Ngih dal. lah du hê Đảng viên, wa saơ mô răm rnôk dơn ntop kơl, bah nĕ, nsrôih rgâl nău mĭn, trong ƀư. Ndrĭ hôm lap tât rnôk nkuăl mbơh ƀư nghị quyết bah Nkuăl ủy mpeh ntrôl dăng kơt dŏng khoa học công nghệ an srih tăm rƀŏng tât ndâk njêng ndơ moh “Phe Phú Thiện”. Âk rơh rƀŭn dơi mbơh, ăp nău rvê, nău ôp mpeh trong ƀư, săk rnglăy, nău geh nsĭt tay lĕ dơi rblang na nê̆. Đảng viên viên, kruanh thôn, bu ranh ƀon, nuĭh dơi nsing nơm hăn lor gay ƀon lan tĭng bah kơi. Wa Ksor Dría lĕ ngăch manh prăk, kơt dŏng kỹ thuật ƀư ba 2 yan ta neh ba lŏ 1 ha bah rnăk wâl. Jêh âk năm gơih đah ba lŏ, nău rêh bah rnăk wâl lĕ geh trong hăn.

Gay rklaih nău ach o, rgâl wăng sa rnăk wâl, hao tâm nău rêh ri tâm ăp rnăk an du nuih n’hâm tâm kơl ndrel mô knơm kâp nău kơl ma an rgŏ jă êng săk nơm, nsrôih tâm pah kan jan sa kơt nĕ he mơ geh ndơ sa, ndơ ntêm, ndâk ƀư ngih wâl kloh uĕh. Yơn lah uĕh ngih dak lĕ uănh kơl an kônh wa rgâl nău mĭn trong ƀư, gay ƀư nkra njêng nsĭt tay săk rnglăy lơn, bah nĕ kơl kônh wa hao hun hao wăng sa.

Bơi 70 năm krêp dêh đah ƀon lan, ba lŏ ba mir, bum blang lĕ kơl rnăk wâl wa A Ngiêm xă Ia Yeng, nkuăl Phú Thiện, Gia Lai geh ndơ sa, ndơ nsoh. Yơn rlău 10 năm aơ, mir ơm lĕ jêng jâng lŏ ba 2 yan rsuêl klê, wăng sa rnăk wâl rgâl na nê̆ wa A Nghiêm mbrơi mbrơi bên đah nău geh n’hanh nău nsĭt tay:

Bah năp đaơ ba săk geh dŭt đêt yor nuĭh ƀon lan srih tăm chah chrai, mô gĭt kơt dŏng khoa học kỹ thuật n’hanh săch ntil, n’hanh ntŭk tăch ndơ mô đăp mpăn. Yơn aƀaơ ăp ntil dơh lơn, dơi srih tăm du ndrĭch lŏ têh, kơt dŏng khoa học kỹ thuật, n’hanh geh ntil mhe jêng ndơ geh dơi rgâl na nê̆.

Rnôk săk rnglăy na nê̆, ba rsuêl rklê ta lŏ, kônh wa ntơm nsing nơm n’hanh ndrel srih tăm ba, bah nĕ âk ndrĭch lŏ têh luh geh. Âk rnăk bah thôn, xă lĕ nkra, rgop lŏ, kơt dŏng khoa học kỹ thuật an srih tăm ba lŏ. Mô hôm geh nuĭh ƀư êng. Knơm nĕ, săk geh ba mô rlu hao, âk rnăk geh 7,5 tât 8 tấn/ha. Wa Rmah Dmeo ƀon Rbai, xă Ia Piar, nkuăl Phú Thiện, an gĭt:

Băng: Aƀaơ ƀư êng kăl e ngăn, nău lŏ mir dŏng măy mŏk da dê, n’hanh trong dak bât đăp mpăn dak an lŏ, kơt kăl e ƀư đah jâng ty njê ngăn, aƀaơ đah măy mŏk jêng nău kan dơh lơn, knŭng gơih pah kan dơm, jêh nĕ tay aƀaơ geh dŭt âk ntil mhe nsĭt tay săk geh âk, yor nê he dơi srih tăm tĭng yan dŏng ntil ba êng êng, bah năp đaơ ƀư du yan, aƀaơ rgâl jêng 2 yan hôm.

Ƀư tĭng Nghị quyết mrô 05/2012 bah Nkuăl ủy Phú Thiện mpeh ntrôl dăng kơt dŏng khoa học-công nghệ an tuch tăm, rƀŏng tât ndâk njêng ndơ moh “Phe Phú THiện”, ăp năm nkuăl kơl prăk ntop kơl ƀon lan, ngăn lah ƀon lan rnoi mpôl đêt pơk hvi rnoh neh lŏ têh du ntil, đah ba ntil đăp mpăn săk geh âk, uĕh kah. Jêh rlău 10 năm mbơh ƀư Nghị quyết 05 bah Nkuăl ủy, Phú Thiện lĕ ndâk njêng geh 18 ndrĭch ba têh du ntil, đah rnoh neh bơi 700 ha. Năm 2019, ntô lĭr phe Phú Thiện lĕ dơi Cục Sở hữu trí tuệ (N’gâng kan Khoa học n’hanh Công nghệ) pă an kơp dơn. Bah nĕ, ndơ moh phe Phú Thiện na nê̆ dơi mât uănh uĕh ta lam dak. Tĭng wa Vũ Hồng Duy, Groi Bí thư rnâng kan Nkuăl ủy Phú Thiện, geh âk tâm ndơ moh aơ, mô knŭng săk geh, uĕh kah, khlay wăng sa, ma hôm nău tâm boh ndrel geh tâm trong khlay ndơ.

Boăt nthoi, tâm rgop đah doanh nghiệp, tâm rgop đah Tập đoàn Lộc Trời tâm ndâk njêng moh ntô lĭr phe Phú Thiện, kơt hun hao ăp ntil ba geh uĕh kah âk ta lam nkual. Tă bah nĕ ton rwăt ndơ ba phe uĕh kah an kônh wa ta nkuăl tă bah nĕ rgop mât ngăch hun hao wăng sa rêh jêng bah nkuăl.