VOV4.M’nông: Kbang lah nkuăl geh ƀon lan rnoi mpôl đêt bah n’gor Gia Lai, đah rlău 47% rnoh nuĭh, dŭt âk nuĭh Ba na đah rnoh rnăk ach o geh rlău 14%. Ăp năm bah năp, nău ntĭm nti nău kan n’hanh mkra nău kan dơi ăp gưl đảng, n’gâng kan nsum mpôl ta Kbang uănh khlay, n’hanh uănh aơ lah “mpông pơk” mkra nău nking n’gang tâm nău ƀư tĭng n’hŭch ach o nâp nâl.

Rlău 1 khay râng jrô nti nău kan ƀon lan mpeh “tăm biăp đăp mpăn” yor ntŭk ntĭm nti nău kan-Giáo dục thường xuyên nkuăl Kbang ƀư, 30 oh yuh nuĭh Bana ta ƀon Lợt, xă Kông Bờ La, nkuăl Kbang lĕ gĭt tăm biăp tĭng di VietGap. Yuh Đinh Thị Kim, ƀon Lợt an gĭt, khoa học lĕ kơl yuh gĭt trong ƀư neh, cheh phân, mât uănh bu tuh tu ndrŭng, tôch n’hanh mât prăp biăp săk rnglăy.

“Jêh jrô nti tăm biăp đăp mpăn aơ ri gâp lĕ pơk hvi rnoh neh biăp kloh ta jay, ăp yuh ta thôn, ƀon pơk hvi n’hanh ăp nuĭh geh biăp kloh uĕh ta jay, mô hôm rwăt biăp ta chợ. Geh jay ri lĕ tăm biăp gay tăch ta chợ gay geh prăk rwăt dak mắm, ka, poăch”.

Jêh râng năm nti nău kan, âk oh yuh nuĭh Ba na ta ƀon Lợt, xă Kông Pla lĕ gĭt tăm biăp tĭng di VietGap

Râng jrô nti nău kan ƀon lan đŏng, nii Đinh Thách, nuĭh dơi nti nău kan nkra ndeh kay jêt, an gĭt: Bah năp đaơ, nô rwăt măy mŏk, gay ƀư lŏ mir, yơn ăp rơh măy mŏk djơh ri lŏ djôt hăn nkra. Yor rĭ, nô hăn râng nti nău kan nkra măy kay. Jêh rnôk nti blău, nô Đinh Thách lĕ pơk du ntŭk nkra măy mŏk ta jay gay nkra an kônh wa tâm ƀon n’hanh ntĭm an ăp druh ndăm geh nău kan đăp mpăn.

“Nti nkra măy n’gôr dŭt uĕh an druh ndăm, nta nău kan ƀư, n’hŭch đah nău rmanh, kơl druh ndăm mĭn ƀư sa n’hanh hun hao wăng sa an săk nơm”.

Hôm ta ƀon Mơ Hven Ôr, xă Kông Lơng Khơng, nô Đinh Văn Bồi lah ngoăy tâm âk nuĭh nti geh nău kan đăp mpăn jêh rnôk lôch nti nău kan ƀư jay xây bah Ntŭk nti nău kan-Giáo dục thường xuyên nkuăl Kbang. Đah nău ƀư kruanh rmôt bah 2 rmôt ƀư jay, nô Bồi lĕ ndrel ăp druh ndăm blău ƀư dơn ăp ndơ ƀư, xây ngih wâl, mpông pêr an kônh wa ta ntŭk. Knơm nĕ, săk nô Bồi nơm n’hanh ăp druh ndăm geh nău kan n’hanh nău geh đăp mpăn.

“Nău kan xây aơ nta an nău an oh nô tâm ƀon geh nău kan, khân pơng dơi ƀư kan ta ntŭk, mô hăn ngai. Ƀư tâm kơl tâm ƀon ri dơh oi du gâl prăk kaih”.

Ăp nuĭh nti dôl ƀư nkra măy kay jêt

 Tĭng kơp uănh bah Ntŭk ntĭm nti nău kan-Giáo dục Thường xuyên nkuăl Kbang, tâm năm 2022, lam nkuăl lĕ pơk geh 5 jrô nti nău kan thôn ƀon, wăch geh 150 nuĭh nti lah nuĭh ta ntŭk. Ăp nuĭh nti dơi ntĭm ta ăp nău kan kơt: Tăm biăp kloh uĕh; dŏng dak si tu ndrŭng mpa rong, tui ka; mât n’hanh njrăng n’gang srê an ndrôk, rpu; nkra măy kay jêt; tăm n’hanh mât chăm tơm mắc ca. Wa Dương Văn Thọ, Groi Kruanh Ntŭk kan ntĭm naư kan an gĭt:

“Mbơh ƀư trong kan ntĭm nti nău kan thôn ƀon geh săk rnglăy ri bôk năp mpôl hên tâm rgop rjăp đah nkuăl, UBND ăp xă gay ƀư trong kan mbơh ntĭm nău kan. Tĭng nĕ săch ăp nău kan di đah nuĭh nti gay nta nơih an nuĭh nti dơh wât lơn. Jêh rnôk ntĭm nti, ndrel đah xă gay tâm rgop ăp bôk nău kan rƀŏng tĭng gay kơl kônh wa mkra nău kan pah. Ndrel đah cán bộ way kan bah xă ntĭm kônh wa hun hao nău kan geh uĕh lơn”.

Kơp bah năm 2015 tât aƀaơ, nkuăl Kbang lĕ pơk geh 76 jrô đah rlău 2 rbăn nuĭh nti, dŭt âk lah nuĭh rnoi mpôl đêt tĭng nti. Jêh rnôk dơi nti naư kan, kônh wa lĕ gĭt kơt dŏng ăp nău lĕ nti dŏng tâm pah kan n’hanh nău rêh ăp nar kơt mât rong ndrôk rpu, sŭr djăr, mât chăm tơm sa play, nkra măy mŏk, bah nĕ nta geh nău kan đăp mpăn, kơl n’hŭch rnoh rnăk ach o, êp ach o tĭng ăp năm. Wa Y Phương, Groi Kruanh UBND nkuăl uănh lah:

“Ntŭk nti nău kan-Giáo dục Thường xuyên nkuăl ƀa ƀơ tâm rgop đah ăp ntŭk ntĭm nti pơk ăp jrô trung cấp thú y, nông, lâm, sinh tâm rgop đah ăp công ty ta nkuăl kơt bah dih nkuăl gay joi geh nău kan an ăp nuĭh lĕ dơi ntĭm nti nău kan trung cấp. Kơt ta ntŭk geh ndrung mât sŭr xă Sơ Pai, wang ndrôk xă Tơ Tung, ăp công ty lâm nghiệp săch nuĭh pah kan ta nkuăl kơl âk nuĭh kan geh prăk đăp mpăn, nuĭh êng ri geh nău kan bah ăp nău blău lĕ nti”.

Nô Đinh Văn Bồi (đah ma ty) lah kruanh rmôt bah 2 rmôt xây ta xă Kông Lơ Khơng, nkuăl Kbang.

Nău ntĭm nti nău kan thôn ƀon ntơm geh nsĭt săk rnglăy tâm nkual ƀon lan rnoi đêt ta nkuăl Kbang. Ăp jrô ntĭm nti nău kan lĕ kơl kônh wa n’hao nău wât blău, gĭt kơt dŏng khoa học kỹ thuật an pah kan n’hanh nkra njêng lŏ mir. Rgop ƀư uĕh bôk nău kan rƀŏng tĭng lam dak mpeh n’hŭch ach o, ndâk njêng thôn ƀon mhe ta ntŭk./.

          Nuĭh rblang: Y Sưng Phê Ja