VOV4.M’nông: Tâm rnôk ndâk njêng ƀon lan mhe, nău ƀư nkra njêng hăn ndrel đah tăch ndơ lŏ mir an nuĭh ƀon lan dŭt ŭch. Yơn lah, nău săk geh-tăch mô peh, jêr tăch hôm e geh đah âk ntil tơm tăm. Ta nkuăl Krông Bông, n’gor Dak Lak geh nklăp 1.000 ha prit rkŏ n’hanh dôl tâm yan pơ̆k tâm rnôk rnoh tăch jŭt ngăch. Prăk ntuh kơl hao âk ma play dŭt thuk, dôl ntrôl nuĭh ƀon lan tât nău nău roh hoach. Nkô̆ nău khlay lah yor kônh wa tăm ntil prit rkŏ mô tâm di gay tăch n’gluh.

Rnăk wâl wa Y Then Mkang ta ƀon Cư Drăm, xă Cư Drăm, nkuăl Krông Bông tăm 2 ha prit rkŏ, dôl dŭm lĕ. Wa Y Then an gĭt, lah prit rkŏ dôl khlay, tâm 1 pơh wa mbra pĕ lĕ rngôch. Yơn lah, tât aƀaơ rnoh nuĭh ôp rwăt dŭt đêt n’hanh khân pơng rwăt n’gul rnoh nkôp đah bôk yan. Wa Y Then rvê, lah tăch dâl ri rnăk wâl roh hoach ngăn. Hôm kâp jŏ ir prit rkŏ mbra djơh, roh hoach hô mbăn lơn.

“Năm aơ bôk yan ri tăch geh 16.000-17.000 prăk du play têh nklăp 2-3kg, hôm đah play jêt ri 9.000-10.000 prăk du play jêt; yơn aƀaơ play têh knŭng hôm 8.000-9.000 prăk du play, jêt ri 2.000-3000 prăk du play dơm, jŭr n’gul nkôp đah bôk yan. Jŭr thuk kơt aơ lŏ jêr tăch, mô geh nuĭh rwăt. Prit rkŏ dum âk jăng tâm mir mô dơi tăch”.

Rpŭng kai ta Cư Drăm, Cư Pui n’hanh Yang Mao pŏk lĕ.

Tâm ban, yan prit rkŏ năm aơ rnăk wa Y Lập Êban ta ƀon Chàm B, xă Cư Drăm, nkuăl Krông Bông tăm 1,5 ha. Tĭng wa Y Lập, năm aơ phân poh, dak si tu ndrŭng, hao ndal da dê; nar luh mât chăm, pĕ hao đŏng, bah 200 rbăn prăk du nar hao 300 rbăn prăk du nar. Yor rĭ nău prit rkŏ jŭr thuk ƀư rnăk wâl lơ roh hoach mbăn lơn.

“Năm e jay gâp pĕ geh rlău 100 rkeh prăk bah 1,5 ha prit rkŏ, yơn năm aơ rnoh neh nĕ knŭng geh nklăp 30-50 rkeh prăk dơm, lah nsum kônh wa roh hoach dơm”.

Kơp uănh bah Jrô kan tuch tăm mât rong n’hanh hun hao ƀon lan nkuăl Krông Bông, lam nkuăl aƀaơ geh bơi 1.000 ha prit rkŏ, rgum âk ta xă Cư Drăm, Yang Mao n’hanh Cư Pui. Prit rkŏ ta aơ dŭt âk lah prit rkŏ njŭng, rnoh geh ăp năm 40.000 tấn play.

Nău kan tuch tăm dôl nkoch trêng, ntop kơl nuĭh tăm rgâl tăm ntil Win, Md2 gay tăch n’gluh.

Tĭng wa Võ Tấn Trực-Kruanh jrô kan tuch tăm mât rong n’hanh hun hao ƀon lan nkuăl, ntil prit rkŏ Cayen bôl săk geh sâk yơn mô tâm di tăch n’gluh. Yor rĭ, âk năm bah năp, nuĭh ƀon lan tăm prit rkŏ ta nkuăl Krông Bông rdâng đah nău ntŭk tăch mô đăp mpăn, năm geh năm mô. Nău êng tay bah prit rkŏ aơ dŭm ngăch; way pơ̆k tâm bah 2-3 pơh, jêng tât âk nău ŭch, nuĭh rwăt nsâm. Nău kan tuch tăm mât rong dôl nkoch trêng, ntop kơl nuĭh tăm an rgâl ăp ntil prit rkŏ kơt: Win mô lah Md2, ăp ntil dơi tăch n’gluh n’hanh nar pŏk jŏ bah 2-3 khay. Nkuăl Krông Bông dôl kuăl jă doanh nghiệp tât ntuh kơl ngih măy nkret njêng ăp ndơ bah prit rkŏ gay mkra trong tăch n’gluh bôk năp., Wa Võ Tấn Trực an gĭt:

“Mpôl hên dôl nchrŏng trong an kônh wa ƀon lan mbrơi mbrơi rgâl ntil prit rkŏ m’hâm ƀư tâm di đah ntŭk tăch n’hanh ăp nău ŭch bah nuĭh rwăt gay tâm di tăch n’gluh, ntil mpôl hên mpŏng kônh wa rgâl ntil Win mô lah Md2. Aƀaơ kônh wa dơi nkoch trêng ntĭm ri khân pơng dôl rgâl ăp ntil prit rkŏ aơ. Ăp ntil aơ play jêt lơn yơn geh ntŭk tăch đăp mpăn, dơi tăch n’gluh dak bah dih, dơi nkret njêng tâm poăt. Đah ăp rnoh neh ƀa ƀă, ri nău kan tuch tăm mât rong lĕ ndâk njêng ntop kơl kônh wa HTX, ntĭm khoa học kỹ thuật ntop kơl kônh wa tăm prit rkŏ đăp mpăn gay rhŏ an ntŭk tăch tâm dak”.

Ăp năm bah năp, prit rkŏ geh âk yan dơi geh khlay, nsĭt tay nău geh an nuĭh ƀon lan ta ăp xă ach o jru ngai kơt: Cư Drăm, Cư Pui n’hanh Yang Mao bah nkuăl Krông Bông. Lah dơi ntĭm tăm n’hanh tăm ntil rpŭng kai đah tŏng ăp tâm di tăch n’gluh mô lah geh ngih măy nkret njêng jru geh ntŭk tăch đăp mpăn, tơm prit rkŏ dơi jêng ngoăy tâm âk tơm wăng sa khlay, tâm di đah ăp ntŭk yôk nor, wăng sa hôm e jêr jŏt bah nkuăl Krông Bông./.

          Nuĭh rblang: Y Sưng Phê Ja