Nơm geh tăm âk ntil tơm, lơn lah tăm ntil tơm dak si, biăp, kao tĭng trong rƀŏng tuch tăm công nghệ mhe, kônh wa rnoi nuĭh K’ho ta xã Đạ Sar, nkuâl Lạc Dương (Lâm Đồng) hŏ rlău dơi ach o, rdâk njêng nău rêh hơm răm đăp mpăn.

          Ta mir nđĭr uĕh jêng hvi rlău 2ha, tăm rlŭ âk ntil tơm đah cà phê, tơm dak si Atisô, tuh, mbo n'hanh biăp ăp ntil....wa Ha Thanh, ta thôn 1, xã Đạ Sar, nkuâl Lạc Dương (Lâm Đồng) dôl pơk máy tŏ biăp. Wa Ha Thanh nkoch,  ntơm nơh rnăk păng dơn tăm êng du ntil cà phê dơm jêng nsĭt geh rgoh n'gơ. Ntơm bah rnôk rgâl mât chăm âk ntil tơm, nsĭt geh bah rnăk wâl hao rlău âk tơ̆:

Nău rêh rnăk wâl gâp rđĭl đah ntơm nơh hŏ mbơm oi hôm,wăng sa đăp mpăn n'hanh geh hao. Mô kơt ntơm nơh, yor mô hŏ gĭt Khoa học kỹ thuật jêng wăng sa dŭt jêr jŏ, mô dơi hun hao. Aƀaơ way râng mbro ăp jrô kơi năp nti mpeh tuch tăm, tăm lagim, rƀah gĭt ăp rgâl mhe Khoa học kỹ thuật tă bah Khuyến nông, Hội nông dân ƀư jêng nău kan tuch tăm nsĭt geh tay âk, nău rêh bah rnăk wâl gâp dơi n'hao prêh.

          Tâm ban kơt wa Ha Thanh đŏng, nuĭh K’ho ta xã Đạ Sar dôl rêng lam trong rgâl tuch tăm tĭng trong rƀŏng n'hao rnoh khlay ndơ tăch. Rlău ma rnoh neh tăm tơm jong nar kơt cà phê, mắc ca, tơm sa play… xã hŏ tăm rơ̆ hvi 2.400ha biăp, bơi 850ha kao, 25ha tơm dak si Atisô, rlău 10 ha dâu tây v.v… aơ lah ăp ntil tơm ân geh kỹ thuật mât chăm âk lơn, yơn nsĭt tay tơm geh wăng sa đăp mpăn, rnoh khlay wăng sa âk an nuĭh ƀon lan. Che Kră Jăn Ha Đời, ta thôn 3 xã Đạ Sar an gĭt:

"Ntơm bah rnôk geh Đảng, Ngih dak, ăp gưl ủy đảng, n'gâng kan nkoch trêng mpeh rgâl tuch tăm, dŏng khoa học kỹ thuật tâm nău kan, nsum suan rdâk njêng ƀon lan mhe, kônh wa dŭt nsrôih tĭng ƀư. Ntơm nơh, tă bah dơn tăm êng du ntil tơm cà phê dơm jêng nsĭt geh wăng sa mô đăp mpăn. Aƀaơ rgâl tăm lagim, tơm dak si, biăp, kao ăp ntil jêng nău rêh hŏ geh mbơm oi. Kônh wa dŭt rhơn nđơr n'hanh nsing nơm tâm trong nchrăp, gung trong, trong kơl bah Đảng n'hanh Ngih dak. Nău rêh geh mbơm oi ri rhơn wơt năm mhe, tết dơi ăp nuĭh ƀư ăp tŏng đŏng".

          Tĭng wa Cill Nim, Groi kruanh UBND xã Đạ Sar, ndrel đah nău rgâl nău gĭt êng mât chăm, tuch tăm tĭng trong rƀŏng công nghệ mhe, âk trong kơl ntuh kơl, ntop kơl bah Đảng n'hanh Ngih dak an lor ma  nkual rnoi mpôl đê̆ hŏ kơl Đạ Sar ngăch di rnoh rdâk njêng ƀon lan mhe tâm 5 năm bah năp nơh. Mpeh hun hao wăng sa, tuch tăm mât rong mât nău khlay tơm tâm jâng wăng sa bah nkuâl. Nău gĭt blău tuch tăm bah nuĭh ƀon lan hŏ geh nău hun hao đăt ndal. Tâm nê, âk rnăk ƀon lan rnoi mpôl đê̆ hŏ nănh rgâl si tăm ndơ mât, lơn lah tĭng trong rƀŏng dŏng công nghệ mhe, ntrŭt ntrôl tuch tăm bah xã nar lơn ma hun hao. Tât aƀaơ, rnoh hvi neh tăm biăp, kao bah kônh wa rnoi mpôl đê̆ rlău 150ha,. Âk rnăk rnoi mpôl đê̆  râng tăm atiso nsĭt tay nău geh wăng sa âk. Rnoh  rnăk ach o bah xã tĭng di rnoh mhe dơn hôm 2%. Wa Cill Nim, an gĭt:

          "Ntơm nơh, ta xã Đạ Sar geh âk rnăk ach o. Ntơm bah nău nsrôih bah nuĭh ƀon lan, nău mât uănh khlay bah gưl ủy, n'gâng kan ntop đah ăp bôk nău kan ntop kơl bah Đảng n'hanh Ngih dak đah pah kan n'hŭch ach  o tât aƀaơ lam xã rnăk ach o hôm dŭt đêt. Xã dôl rgum nta ăp trong dơh gay rnăk ach o dja tât dơi n'hanh dŏng Khoa học kỹ thuật, rgâl trong ƀư wăng sa gay rlău dơi săk nơm, n'hŭch ach o jŏ jong n'hanh nsan hao tâm nău kan tuch tăm n'hanh rgâl geh nău rêh".

Tĭng UBND nkuâl Lạc Dương, tâm ăp năm rlău aơ, nkuâl geh rnoh ngăch hun hao tuch tăm dŏng công nghệ mhe ngăch. Tơm ndơ ntuh kơl hao, rnoh âk geh trong tăch luh ndơ tuch tăm tĭng trong rƀŏng hao. Lam nkuâl Lạc Dương aƀaơ geh bơi 740 ha neh tăm biăp, kao, dâu tây tâm jay bil công nghệ mhe. Lơn lah, Thủ tướng Chính phủ hŏ uănh an dŏng rlău 220 ha nkual tuch tăm  dŏng công nghệ mhe ta xã Đạ Sar. Aơ lah dơh uĕh n'hanh lah ndơ gay nkuâl Lạc Dương an ƀư ăp trong ntop kơl manh tơm prăk, rong an dơm prăk manh neh gay ntrŭt nsôr doanh nghiệp ntuh kơl tuch tăm nkre đah nkret njêng ta ntŭk....Đah ăp nău  rgâl tâm trong mĭn, trong kan bah nuĭh ƀon lan, ntop đah nău mât uănh ntuh kơl bah ăp gưl ủy, đảng, n'gâng kan ta ntŭk, nsing nơm an lah wăng sa- rêh jêng kon nuĭh nkual rnoi mpôl đê̆ ta Đạ Sar mbra hun hao dăng tâm let năp tay./.

Quang Sáng/Nuĭh rblang: Điểu Thân