VOV4.M’nông: Xã Lộc Bắc, nkuăl Bảo Lâm, n’gor Lâm Đồng geh rlau 1.500 rnăk, đah 4.858 nŭih, tâm nê nŭih rnoi mpôl đê̆ geh bơi tât 73%. Rnơm ƀư geh nau rgâl mhe tâm nau pah kan jan sa, leo nau blau tâm nau kan tuch tăm, ndrel ma nau kơl an, ntuh kơl bah Đảng ndrel Ngih dak mpeh ăp ntil nau rêh văng sa bah ƀon lan ta aơ geh nau rgâl mhe ăp nar.

Tât tâm xã Lộc Bắc, nkuăl Bảo Lâm, n’gor Lâm Đồng tâm du nar bôk năm mhe, rnôk ma ta aơ dôl ƀư nau kan kơt mhe geh ma rdâng nsum ma srê Covid-19, phung hên ngăn ngên saơ geh âk nau rgâl mhe bah nkuăl neh geh âk ngăn nŭih ƀon lan rnoi K’ho ta aơ. Ăp ngih truh sat ơm bah ntơm lĕ geh geh rgâl nâp ueh đah ăp ngih ndâk nâp, trong hăn ueh, geh ngih săm ƀŭt, ngih dak si ndâk nâp nâl...ân saơ nau rêh bah ƀon lan ta aơ hŏ hơm răm, tŏng ăp.

Bu ranh K’Làng, tâm thôn 3, xã Lộc Bắc rhơn nkoch, năm aơ, bol ma geh nau khuch bah srê Covid-19 yơn lah rnoi cà phê hao khlay, ăp ngih kŏ geh âk jêt rkeh prăk ân tât ma rhiăng rkeh prăk ngăn, ri ma saơ rhơn ngăn yor năm mhe geh tŏng ăp lơn. Geh dơi kơt aơ lah rnơm nau ƀư kơt tĭng nau pah kan jan sa mhe tâm tuch tăm. Wa K’Làng, nkoch:

‘Kŏ rnơm geh Đảng ndrel Ngih dak ntuh kơl, kơl an nau tăm cà phê, tơm chè, ntĭm mbơh nau pah kan jan sa ri ma nau rêh bah ƀon lan ta aơ hun hao âk lơn rđil bah năp nê. Trong hăn, ngih săm ƀŭt, ngih dak si kŏ geh ndâk nâp mhe, nau hăn ro, ntĭm nti bah kon sau geh tâm ban ueh. Nau rêh hun hao jêng âk ri ma ƀon lan rhơn ngăn”.

Lộc Bắc lah xã tăm tơm jong năm, tâm nê ngăn lah cà phê đah rnoh 941 ha, tơm điều 164 ha, tiêu 22 ha ndrel ma rhiăng tơm sa play âk ntil. Âk ngăn neh tăm aơ geh rgâl ma ntil mhe, leo nau mhe tâm nau kan tuch tăm, n’huch nau ntuh kơl yơn lŏ n’hao dơi nau săk geh nau kan tuch tăm tâm ndrel du blah neh. Knŭng êng tơm cà phê, lah năm 2017 geh rnoh 2,7 tấn/ha, ri tât năm 2020 geh 3 tấn/ha ndrel tât năm 2021 geh 3,3 tấn/ha. Nau geh văng sa âk, n’hao nau rêh ân ƀon lan ta aơ geh hơm răm ndrel ueh lơn rđil bah năp. Wa K’Pép, Bí thư chi bộ thôn 5, xã Lộc Bắc rhơn nkoch:

‘Mpeh nau săk geh văng sa ntơm bah rnôk ƀư bôk nau kan ndâk njêng ƀon lan mhe, tât rnôk aơ nau rêh hŏ geh rgâl mhe âk ngăn. Ăp ngih truh sat ơm lĕ geh jut jăng, n’huch rnoh rnăk ach o ndrel n’hao rnoh rnăk geh ndrŏng tĭng ăp năm, geh rnăk hôm rvêt ndeh têh mhe, oh kon hăn nti tât dŭt tât lôch. Rhơn ngăn lah ƀon lan geh blau nau kan leo tuch tăm mhe tâm nau rêh, blau pah kan ri nau rêh hao jêng. Ji kuet geh hăn ngih dak si khám, săm, geh nau tât jêr ri tâm kơl, mro tâm bonh đă mât ân kloh ngih vâl, ƀon lan ân ueh, mô hôm nau ji ngot rluk mâl ôh. Nau rêh geh ueh ri ƀon lan nsôih ƀư ăp nau kan yor nkuăl rgŏ jă, tâm nê geh nau kan ndâk njêng ƀon lan mhe”.

Wa K’Núi, Kruanh UBND xã Lộc Bắc lah rjăp, tât lôch năm 2021 xã ƀư jêh dĭng lĕ 19/19 nkô̆ nau ndâk njêng ƀon lan mhe. Nau rvê ngăn lah rnoh geh n’hao, rnoh ach o n’huch yơn xã kŏ ƀư jêh nau kan bah nơm. Rnoh geh ndoh ndơ tâm du bôk nŭih geh bơi tât 42 rkeh ndrel rnoh rnăk ach o hôm 4,2%. Tât jêh aơ tă, xã mra lŏ bonh đă ƀon lan kơt tĭng nau kan tuch tăm mhe lăp tâm nau rêh vay ma n’hao nau geh jêng ân ƀon lan:

‘Bah năp nơh, nau rêh bah ƀon lan tâm xã Lộc Bắc geh âk nau jêr ngăn, yor ê blau kơt tĭng tâm nau kan tuch tăm. Ăp năm êp aơ, rnơm leo nau geh tơm tăm mhe, nau geh tơm tăm hao âk, rnoh geh hao âk ri ma nau geh jêng bah ƀon lan hŏ đăp mpăn ndrel hun hao hôm. Tât jêh aơ nkuăl hên bonh đă ƀon lan lŏ kơt tĭng nau kan mhe tâm nau kan tuch tăm. Nkô̆ nau lah ân geh mât ân ueh nau kan n’hao săk geh (kônh wa geh 42 rkeh/năm), đăp mpăn nau rêh nâp, rƀŏng tât ndâk njêng ƀon lan mhe prêh lơn”.

Phung hên ntĭnh xã Lộc Bắc tâm rnôk bri ji kăt bah du kêng măng dŭt năm mhe tâm ăp trong hăn geh tŏ chai, bar đah trong lah ăp ngih têh mhe ndâk tâm nklang ăp yôk prêh ndrel ăp mir cà phê, tơm tăm jêng ueh, mra geh jêng ân ƀon lan ta aơ âk lơn...Nau rêh bah kônh wa rnoi K’ho mra lah mô rluh hun hao kơp ntơm năm mhe aơ./.

Nŭih rblang: H’Thi