Ăp nar hô duh phang, nuĭh ƀon lan lĕ nkual Tây Nguyên ŏk r’ah rlet rlău rơh duh, kro phang hô. Ta nkual rđŭng xă Măng Bút, nkuăl Kon Plông, n’gor Kon Tum duh hô rlău rĭng ăp năm. Bôl trôk nar mô dơh yơn ăp ndrĭch lŏ ba bâh nuĭh Xơ Đăng ta aơ hôm e uĕh jêng. Nô A Thủy, thôn Măng Bút an gĭt, ndrel đah tơm dak bah dak me Đăk Sngé n’hanh dak Cheng tŏ n’đik lŏ, knơm nău gĭt rgâl tâm trong kan, tơm ba mô knŭng an săk geh âk ma hôm jêng ndoh ndơ nsĭt tay săk geh an nuĭh ƀon lan:

Kônh wa thôn Măng Bút knŭng lah srih tăm ba lŏ. Tăm lah mât chăm phân poh kơt ăch trôk, phân hóa học. Rnôk bah năp mô geh trong nchrăp ƀư kơt nĕ yơn aƀaơ lah kônh wa rgâl nău mhe gay hun hao uĕh lơn nkôp đah bah năp đaơ. Ba rnôk bah năp he ƀư sa dơm yơn aƀaơ kônh wa geh ba, tăch geh prăk da dê.

Lah xă dŭt jêr jŏt bah nkuăl Kon Plông, n’gor Kon Tum, tă aơ nklăp 15 năm Măng Bút hôm e kơt nkhah êng đah bah dih yor mô geh ntung trong. Nar nĕ trong hăn bah nkuăl têh Măng Đên, nkuăl Kon Plông tât xă nklăp 45 km hăn roh du nar, dŭt âk lah hăn jâng rlău bri n’hanh mper tĭng kơh lŏ. Trong tât ta xă lĕ kơt nĕ, tât ăp ƀon, kơt Đăk Y Pai, Đăk Lanh... hôm jêr jŏt lơn. Yor rĭ nuĭh ƀon lan Măng Bút mô geh nuih n’hâm gay hun hao nkra njêng yor ba ƀư geh rmeh mô dơi tăch. Nô A Dân, nuĭh ƀon lan Đăk Y Pai, xă Măng Bút, nkah tay:

Kăl e, trong hăn nsong dŭt jêr jŏt, ăp oh hăn bah ƀon Đăk Y Pai hăn xă hăn bah 4 mông ôi ơm, rgăn dak ding. Bah rnôk Ngih dak ntuh kơl ƀư trong ri nău hăn nsong bah oh kon hŏk dŭt dơh”.

Ntơm bah ntŭl rlong, kơl Măng Bút hun hao lah kơp bah rnôk năm 2009 rnôk tỉnh lộ 676 dơi ndâk ƀư nthoi đah xă bah dih. Ntung trong tât xă dơh tâm 2 yan mih wai lĕ ŭch tăch rgâl n’hanh ntrôl nkra njêng hun hao. Bah tăm du ntil ba lŏ, rlău 1.260 rnăk Xơ Đăng bah xă aƀaơ lĕ tăm geh n’ăp tơm cà phê, tơm dak si, hun hao dăng mât rong... Knơm nĕ, nău geh rĭng bôk nuĭh bah nuĭh ƀon lan Măng Bút năm 2023 lĕ geh rlău 34 rkeh 600 rbăn prăk. Bah meng nĕ âk ntrong kan tâm rgop nkra njêng đah nuĭh ƀon lan n’hanh HTX, doanh nghiệp dơi ƀư dôl nta tay nău dơi hao nău geh n’hanh rgâl nău rêh an nuĭh ƀon lan. Wa A Vinh, Groi Kruanh UBND xă Măng Bút an gĭt, xă dôl ƀư tĭng âk trong mkra na nê̆ rƀŏng tât nău ŭch dŭt năm 2024 geh tŏng 19 rnoh ndơ ƀư ndâk njêng ƀon lan mhe lôch jêh Nghị quyết Đại hội Đảng bộ xă n’gluh an:

Rƀŏng hun hao wăng sa-rêh jêng bah xă Măng Bút mĭn hun hao ba chăng ta 6 thôn tâm trôm. Tăm sâm rse aƀaơ geh hợp tác xã tơm dak si n’hanh pâl nđaih Măng Bút dôl tâm rgop đah ƀon lan tăm, mât ka tầm ta thôn Đăk Trun. Tăm cà phê bri nđĭk, mât rpu. Doanh doanh nghiệp tâm rgop đăp mpăn ntŭk tăch dak si kơt ăp ntil ndơ lŏ mir êng an nuĭh ƀon lan.

Ndrel đah nsrôih hun hao wăng sa, Đảng bộ, n’gâng kan ƀon lan n’hanh ăp nsum  mpôl xă Măng Bút, nkuăl Kon Plông an nău mât uănh dŭt n’hâm tât nău kan ntĭm nti, mât uĕh nău way ơm cách mạng bah ƀon tơm. Di tích lịch sử Cách mạng Lơh dơi Măng Bút lah ntŭk tât bah nuĭh ƀon lan, ngăn lah rơh druh ndăm tâm xă. Nthoi jong nău way ơm gĭt tĭng nti, Măng Bút geh dĭng lĕ rnoh nuĭh  rlău 4.400 nuĭh ri aƀaơ geh rlău 1.000 kon hŏk bah gưl nti mầm non tât THCS n’hanh xă mô geh nău kon hŏk ntlơi nti. Geh rlău 10 năm tĭng đah nău kan kan ntĭm nti xă Măng Bút, nai Nguyễn Văn Đức, Hiệu trưởng PTDT Bán trú gưl I-II, an gĭt:

N’hêl na nê̆ aơ lah nkual neh gĭt blău tĭng nti. Bah ăp ntŭk thôn an tât ntŭk tơm ăp oh gơih nti, kơt ntŭk ngih sam ƀŭt Đăk Y Pai tă aơ 12 km yơn ăp oh hôm e hăn nti ta aơ dŭt uĕh. Kon Hŏk ta xă Măng Bút hăn nti đại học jêh nti dŭt âk. Aƀaơ ta aơ rlău 30 nai gŭ ta ƀon mầm non lah nuĭh ta ntŭk. Đah gưl I, gưl II bah ngih sam ƀŭt bơi 50% lah nuĭh ta ntŭk.

Hun hao bah jêr jŏt, Đảng bộ, n’gâng kan ƀon lan n’hanh nuĭh ƀon lan xă dŭt jêr jŏt Măng Bút bah nkuăl Kon Plông, n’gor Kon Tum dôl nâp nâl ntrôl rŭch ji ngot ach o rluk mâl. Nău way ơm cách mạng n’hanh nău way ơm gĭt blău tĭng nti bah nuĭh ƀon lan Măng Bút lah ntŭk nsing nơm nâp nâl, lah soan dăng an nău hun hao bah nkual neh ntŭk aơ.