Đah nuĭh Xơ Đăng ta ƀon Mô Bành 2, xă Đăk Na, nkuăl Tu Mơ Rông, n’gor Kon Tum, tŭr chĭng n’hanh ndơ ngêt sa way ơm aƀaơ lĕ jêng ndơ kah uĕh wăch rgum năch pâl nđaih. Knơm nĕ nău ndâk njêng thôn ƀon mhe ta ƀon Mô Bành 2 geh âk nău dơh. Yuh Nguyễn Thị Thiên Nga geh bơ̆ lah nuĭh yuăn, mê̆ nuĭh Xơ Đăng aƀaơ lah ƀư Groi Kruanh Hội Liên hiệp Bu ur xă Đăk Na an gĭt, kônh wa tâm ƀon dŭt răm yor geh tay du nău kan mhe, nkre geh prăk nkre mât ndrăy, mât uĕh nău khlay văn hóa way ơm bah rnoi nuĭh nơm:

Tâm xă Đăk Na geh dak leng Siu Puông dŭt uĕh, tu dak rsang nđik nuĭh ƀon lan geh nău wât mât rƀăy ntŭk ntô bri. Gay rhŏ an năch pâl nđaih kônh wa way ƀư ăp ndơ sông sa way ơm bah nuĭh Xơ Đăng, kơt piăng dĭng, ƀanh nkr rpu, ka prung... Bah nar hun hao dơi pâl nđaih nsum mpôl ƀon lan nsing nơm, ngăch prăk dŭt âk.

Đăk Na lah xă nkual 3 mpeh tâm ntŭk dŭt jêr jŏt n’hanh ngai đah nkuăl Tu Mơ Rông, n’gor Kon Tum nklăp 50 km mpeh Tây. Xă geh 12 thôn, ƀon đah rlău 3.000 nuĭh lĕ rngôch lah nuĭh rnoi mpôl đêt Xơ Đăng rêh knơm lĕ rngôch tâm tuch tăm lŏ mir. Ta năp nău ngăn nău rêh bah nuĭh ƀon lan hôm e âk jêr jŏt, gay nta an rgâl hao tâm ndâk njêng thôn ƀon mhe, Đảng bộ, n’gâng kan ƀon lan xă Đăk Na mĭn ntơm bah nău rgŏ jă, mât uĕh tu tơm văn hóa way ơm tâm ƀon lan. Bah lôch uĕh bôk năp tâm hun hao pâl nđaih nsum mpôl, nuĭh ƀon lan nsing nơm tay râng ăp nău ƀư tăch rgâl, rhŏ an tăch rgâl. Lôch uĕh đah ntrong ƀư tăm, nkret njêng sâm rse, sâm Ngọc Linh n’hanh nău ƀư tăch rgâl, yuh Y Za Nhi, jay gŭ ƀon Mô Bành 1, xă Đăk Na ntoh lư rơh druh ndăm nuĭh Xơ Đăng ngăch prăl, janh mĭn, janh ƀư:

Ăp băl druh ndăm hun hao hao wăng sa an rnăk wâl, an ƀon tơm an geh nău janh tâm nău kân, moh ndơ ƀư an nsrôih ƀư tât lôch tât dŭt. Lah ăp băl geh nău rgâl hao, geh nău janh ri lĕ rngôch dơi ƀư ndrŏng ta ƀon tơm bah nơm đah nău kan tăm sâm rse mô lah sâm ngọc Linh. Aƀaơ ăp ntil tơm dak si aơ ta ƀon tơm Tu Mơ Rông nơm tăch dŭt uĕh.

Gĭt saơ nuĭh Xơ Đăng geh nău wât, lĕ đah nău kan nsum mpôl dŭt âk dơh tâm nău hun hao ntrong ƀư hun hao wăng sa nsum mpôl, bah ăp nuĭh tơm khlay, ta xă Đăk Na aƀaơ lĕ jêng geh 3 Hợp tác xã n’hanh 3 rmôt kan ndrel. Nău râng tâm ăp Hợp tác xã lĕ kơl nuĭh ƀon lan dơi rgâl nău mĭn tâm pah kan jan sa. Wa Võ Nguyên Sinh, Kruanh Hội đồng Quản trị nkre ƀư Giám đốc Hợp tác xã Pâl nđaih n’hanh Dak si uĕh nđĭr Siu Puông đah 43 nuĭh lĕ rngôch lah nuĭh Xơ Đăng, an gĭt:

Nuĭh kan râng Hợp tác xã ri bu dơi rgâl trong mĭn nkra njêng, nău mĭn ƀư wăng sa. Râng Hợp tác xã gay tăm sâm Ngọc Linh ri dơi mât bri n’hanh hun hao nâp nâl. Yor bu dơi rgâl nău mĭn bah nĕ jêng ăp ntrong ƀư wăng sa êng. Đêt năm ri tăm sâm sre, jêh nĕ mât djăr, mât sŭr gay rhŏ an pâl nđaih. Hôm jŏ jong ri geh sâm Ngọc Linh. Bu dơi geh prăk đêt năm n’hanh jong năm.

Bah nău mât uĕh tu tơm văn hóa way ơm đah âk nău khlay uĕh lăng tâm ndâk njêng thôn ƀon mhe, âk thôn ƀon nuĭh Xơ Đăng ta nkuăl Tu Mơ Rông, n’gor Kon Tum aƀaơ lĕ jêng ntŭk tât đah năch dăch ngai. Âk Hợp tác xã, Rmôt kan ndrel tăm tơm dak si, hun hao pâl nđaih nsum mpôl đah ăp nuĭh kan lah nuĭh Xơ Đăng ƀư sa săk rnglăy kơl nuĭh ƀon lan hao nău geh, rgâl nău rêh.

Kơp uănh bah UBND nkuăl Tu Mơ Rông an saơ tâm năm 2023 lĕ geh rlău 10.00 nuĭh năch tât nkuăl. Aơ lah lôch uĕh dơi kơp dơn đah Tu Mơ Rông, nkual jru ngai dŭt jêr jŏt bah n’gor Kon Tum đah 95% rnoh nuĭh ƀon lan lah nuĭh Xơ Đăng. Wa Võ Trung Mạnh, Kruanh UBND nkuăl Tu Mơ Rông an gĭt tu tơm văn hóa way ơm dơi nkuăl mĭn lah n’gâng tơm nâp nâl tâm ndâk njêng thôn ƀon mhe. Nău rgŏ jă geh tu tơm aơ gay ndâk njêng thôn ƀon mhe lĕ kơl nuĭh ƀon lan nsing nơm tay, ngăch prăl nta an uĕh, geh êng n’hanh mât nău rêh đăp mpăn, tâm ban:

Nkuăl ủy, UBND nkuăl Tu Mơ Rông mĭn gay hun hao wăng sa rêh jêng nĕ lah mât uănh, njrăng n’gang n’hanh hun hao bri; tăm tơm dak si mât rong ta nâm bri hăn ndrel đah pâl nđaih nĕ lah trong hun hao na nao. Tĭng nkô̆ nău nĕ nkuăl lĕ geh âk bôk nău kan, trong nchrăp, bôk nău rgop tâm nchră gay joi nău geh, jâng nsan, tâm nĕ dăch rgum na nê̆ ăp ntŭk pâl nđaih; mĭn ntuh kơl ăp nkô̆ nău khlay ma năch pâl nđaih an wăch rgum năch gay nuĭh ƀon lan dơi geh âk ngăn tâm nău ƀư pâl nđaih.

Đah nău kuăl rdâk hao, mât uĕh tu tơm văn hóa way ơm, kônh wa rno mpôl đêt ta nkuăl Tu Mơ Rông lah êng n’hanh n’gor Kon Tum lah nsum dôl nar lơ ngăch prăl nsing nơm tâm nău ndâk njêng thôn ƀon mhe. Kơp tât dŭt năm 2023 lĕ geh 32 thôn, ƀon nkual rnoi mpôl đêt bah n’gor Kon Tum tâm di thôn ƀon mhe. Lĕ rngôch ăp xă tâm n’gor tâm di bah 15 rnoh ndơ ƀư thôn ƀon mhe let lơ. Lam n’gor Kon Tum aƀaơ geh 42 xă tâm di thôn ƀon mhe, tâm nĕ âk xă nkual rnoi mpôl đêt lĕ tât lor thôn ƀon mhe.