Mon Y Rôlin Niê (10 năm deh, ta ƀon Dur 1, xă Dur Knăm, nkuăl Krông Ana) dŭt ut r’u nuĭh bơ̆ bah nơm, mbung ngơi gơm. Nô Y Viễn H Mok, an gĭt, Y Rôlin lah kon bah yuh ur nô. Mon roh mê̆ rnôk mhe 18 khay deh, bơ̆ ntlơi sŏk ur mhe. Rnôk nĕ, bôl mhe ur sai n’hanh nău rêh dŭt jêr jŏt, săk nô lŏ geh koet nte, yơn yô̆ mon mô geh nuĭh mât uănh jêng ur sai nô lĕ ƀư sam ƀŭt dơn mât mon.

“Rnôk bôk năp dơn mât kon se mô gĭt n’hâm ƀư ri saơ jêr jŏt. Geh u che ndrel mât rong, aƀaơ kon têh hôm gâp saơ răm n’hanh uĕh lăng. Aƀaơ gâp saơ kon kơt kon deh bah nơm, yô̆ lơn kon bah nơm, saơ n’ach lơn”.

Gĭt đah nău rêh bah mon Y Rôlin, bah năm 2022, Hội Bu ur xă Dur Kmăn lĕ rgŏ jă ăp nuĭh lŏng bôk tôr tă bah bôk nău kan “Mê̆ mât rong” ntop kơl mon du khay 500.000 prăk. Đah rnoh prăk aơ mon geh tay prăk rwăt ndrôm sam ƀŭt, ndơ dŏng nti, dơh oi nău jêr jŏt an rnăk wâl.

Du ê nuĭh êng dơi dơn ntop kơl bah bôk nău kan “Mê̆ mât rong” lah mon H’Hồng Niê, 14 năm deh, ta ƀon Akô Siêr, phường Tân Lập, nkual ƀon têh Buôn Ma Thuột. Mê̆ roh tă aơ 4 năm, bơ̆ sŏk ur êng jêng H’Hồng sĭt gŭ đah u che mê̆. U che ƀa ƀơ kop ji, geh mô đăp mpăn. Bah năm 2021, đah nău boăt nthoi bah Hội bu ur phường Tân Lập, mon dơi wa Đỗ Thị Thơm-du hê nuĭh tơm doanh n ghiệp ta nkual ƀon têh Buôn Ma Thuột dơn “mât” tât năm 18 năm deh. H’Hồng Niê nkoch:

“Kon dơi dơn nău yô̆ rŏng bah mê̆ Thơm ri kon saơ dơh lơn du gâl nău mô tŏng mô geh mê̆. Mê̆ ntop kơl kon du khay lah 500.000 prăk, jŏ jŏ mê̆ tât khâl mô lah njuăl nău ôp kon. Kon knŭng gĭt nsrôih nti an gĭt ngăn gay bah kơi aơ dơi plơng tay ăp ndơ mê̆ Thơn lĕ uănh tât n’hanh yŏ rŏng kon”.

Ta Dak Lak aƀaơ geh bơi 2.300 kon se kon đơi, tâm nĕ bơi 700 kon se kon đơi n’ăp me n’hanh bơ̆ n’hanh geh nău rêh dŭt jêr jŏt. Ƀư tĭng bôk nău kan “Mê̆ mât rong” yor Trung ương Hội rgŏ jă, tâm 2 năm bah năp, Hội Liên hiệp bu ur n’gor Dak Lak lĕ boăt nthoi ăp rmôt kan, êng nuĭh, nuĭh lŏng bôk tôr n’hanh ăp gưl hội bu ur dơn mât rong an bơi 700 kon se kon đơi đah dĭng lĕ rnoh prăk ntop kơl rlău 7 rmen 800 rkeh prăk. Đah âk trong ntop kơl kơt: an prăk măt, pơk ndrôm sam ƀŭt ntêm nkrem prăk, an prăk kơl hăn nti, ndâk ƀư jay gŭ tâm kơl, an ndeh wah jâng, dŭng cheng sam ƀŭt, kho ao. Mô knŭng ntop kơl mpeh drăp ndơ, rmôt bu ur ăp gưl hôm tâm pă nuĭh ƀa ƀơ chop khâl, uănh nđôi nu nău nti nsơm bah ăp mon.

Wa Tô Thị Tâm, Kruanh Hội Liên hiệp bu ur n’gor an gĭt, bôk nău kan nsĭt tay nău uĕh. Tă bah nĕ, nkre jŭt jăng nău rngot, jêng ntŭk nsing nơm nâp nâl gay ăp mon nănh janh rlet rlău jêr jŏt, choat tay tât nău rêh rgŏ năp.

“Mpôl hên mpŏng kuăl jă nău ndrel ti lăp bah nău rêh kon nuĭh, tă bah tơm prăk nkrem bah Rmôt bu ur n’gor mô lah tă bah Tơm prăk nkrem ntop kơl kon se yor N’gâng kan Lao động n’gor mât uănh gay ntop kơl na nê̆ an ăp mon. N’hanh mpŏng ăp rmôt kan, êng nuĭh, ăp doanh nghiệp, ăp nsum mpôl tâm n’hanh bah dih n’gor dơi wât nău mât rong an kon se, mbra ntop kơl bah âk trong êng êng, bah âk bôk nău kan êng n’hanh ntop kơl đah nuih n’hâm n’hanh đah drăp ndơ”.

Tă bah bôk nău kan “Mê̆ mât rong”, âk kon se kon đơi ta Dak Lak lĕ geh tay nău ntrŭt nsôr, ntop kơl, dơi rêh tâm nău yô̆ rŏng mât rgum. Nău ntrŭt nsôr n’ăp đah drăp ndơ n’hanh nuih n’hâm mbra kơl ăp mon geh tay nuih n’hâm rlet rlău ăp rngot njê, hao tâm nău rêh, rƀŏng tât du nău rêh uĕh ang lơn.