VOV4.M’nông: Đah âk ntŭk mpoh ang trong ƀon, đoàn viên druh ndăm ta Dak Lak dôl rgop nau n’hao nau gĭt bah ƀon lan tâm nau nsum ty ndâk nkra trong ƀon “Ang-ndrih-kloh-ueh”. Aơ lah nau kan ngăn bah mom ndăm râng ndrel ma nkuăl tam nau ndâk njêng ƀon lan mhe.

Ntơm bah 6h măng ăp nar, ŭnh ang tă bah n’gâng điện njok trong tâm thôn1 xã Ea Tiêu, nkuăl Cư Kuin, n’gor Dak Lak ang chrang. Wa Lê Đức Cừ, nŭih rêh njok trong aơ nkoch, ntơm rnôk geh điện mpoh ang, nau mât đăp mpăn tâm nkuăl geh ueh lơn, nŭih ƀon lan rhơn, măng, ôi hăn jâng tâm trong aơ. Nau tâm boh ƀon lan lơn ma nâp tay.

‘Bah năp nơh trong aơ ê geh điện ri lah nsum nau mât đăp mpăn mô lăng ueh ôh, vay geh bu ntŭng ndơ đŏng. Yơn lah jêh rnôk geh điện ri ƀon lan saơ ueh ngăn. Trong aơ geh hăn ro ueh ndrel nau mât đăp mpăn geh ueh lơn, ăp nŭih rêh ueh đŏng, tâm nau rhơn geh điện mpoh ang trong hăn”.

Trong mpoh ang điện jong rlau 1,2km, rnoh 25 rkeh prăk, yor Đoàn nkuăl Cư Kuin kơl an prăk, đoàn viên xã Ea Tiêu ndrel ƀon lan tâm nkuăl rgop nar kơl rnglăp, geh ntrŭnh ƀư ntơm khay 3 năm aơ. Wa Mai Văn Hùng, Bí thư chi bộ thôn 1, xã Ea Tiêu mbơh, ntơm jêh rnôk rnglăp trong điện, kônh wa tâm ƀon lan râng nau rep kloh trong hăn, muih ân kloh gơ̆ êp trong gay ma hăn ueh kloh lơn. Ndrel ma nê, thôn kŏ săch nŭih rđau nau kan gay ma mêt uănh, mât njrăng ân trong điện gay ma geh dŏng ân jŏ jong, ueh lơn:

“Rnôk nkra trong ri gâp kŏ rƀŭn du đê̆ kônh wa ta aơ ndrel Rnâng kan mât njrăng êng ntrŭnh nau ndâk du rmôt gay ma mât na trong điện, nkre sŏk prăk điện gay ma điện geh mpoh ang mro. Êng rgop prăk điện ri kơt lah dĭng lĕ nŭih ƀon lan ŭch geh kơl an ngăn, kơt lah rnôk geh du trong điện mhe aơ ndrel mpoh ang mô êng đah trong aơ ma nsum ân lam lĕ nŭih vay hăn rlet trong aơ đŏng”.

Tĭng yuh Đặng Thị Vân, Bí thư Đoàn nkuăl Cư Kuin, ăp ntŭk kan bah mom ndăm “mpoh ang trong ƀon” geh ntŭk kan đoàn ntơm ƀư tâm năm 2017 tâm ăp trong ƀon lan lam nkuăl. Mô êng rnơm tâm rơm prăk tă bah ăp gưl kan đoàn ba lơ jur ôh, ma âk ntŭk kan êng êng hŏ nsôih kuăl jă ăp ntŭk rgop kơl an gay ma ntrŭnh ƀư. Rnơm ndri, tâm ăp năm rlau aơ, âk km trong hăn tâm ăp thôn, ƀon geh mpoh ang, pơk trong nơih ân ƀon lan hăn ro tam bri măng. Nkre rgop nau n’huch nau prah tâm tom ndeh, đăp mpăn tâm nkuăl:

‘Bah ntơm năm 2017 tât rnôk aơ, ntŭk mpoh ang trong ƀon aơ ri nkô̆ nau gay kơl an kônh wa ƀon lan ueh nơih lơn tâm nau hăn ro măng ngo. Kŏ kơt aơ lah du ntŭk ƀư nau kan geh rjăp lơn nau khlay bah ăp nau kan bah druh ndăm đoàn viên tâm nau kan nsum ty ndâk njêng ƀon lan mhe”.

Ntơm năm 2014 tât rnôk aơ, ntŭk mpoh ang trong ƀon hŏ geh mom ndăm Dak Lak tâm rgop nsum đah ntŭk kan điện lực ƀư tâm âk nkuăl bah n’gor. Tâm nê rƀŏng tât ƀon lan tâm nkuăl jru, nkuăl ngai, nkuăl jêr jŏt, nkuăl n’har bri. Ăp năm êp aơ, ndrel ma nau dŏng ăp ntil ver ŭnh ơm gay ma mpoh nkre tâm ntrong điện bạh ƀon lan, ri tâm du đê̆ nau kan, đoàn viên druh ndăm dŏng ăp ntil ver ŭnh mhe, ver ŭnh ƀư đah măt nar gay ma rnglăp, đăp mpăn nâp, têm nkrem. Nau nkra trong mpoh ang hŏ kơl an nau ueh bah ăp trong, kơl an nau ŭch hăn ro tâm bri măng bah ƀon lan geh ueh nơih lơn./.

Nŭih rblang: H’Thi