Rnăk wâl Hà Văn Tân, ta thôn 11, xă Ya Tờ Mốt lah ngoăy tâm âk rnăk tuch tăm jêng ntil ba Briêt geh kơp dơn hữu cơ bôk năp bah nkuăl Ea Súp. Wa Tân nkoch: srih tăm ba hữu cơ jêr lơn ba wa srih tăm, phân poh, dak si tu ndrŭng lĕ rngôch đah sinh học. N’glơi an săk soan mhe yor mô dŏng đah ăp hóa chất. Prăk dŏng bôk năp hŭch tât 40%, yơn tăch đăp mpăn n’hanh tăch khlay rlău 1,5 tơ̆ nkôp đah ba way dŏng:

Tă bah trong tâm rgop đah HTX n’hŭch ach o Ea Súp nta an rnăk wâl gâp ƀư ba hữu cơ Briêt, bôk năp lah mât ntŭk ntô gŭ âm, tal 2 mât njrăng săk soan n’hanh tal 3 tay nsĭt tay wăng sa an rnăk wâl. Tât aƀaơ, mpôl hên ƀư bah jêt tât têh. Tât aơ tay mpôl hên ntrŭt đă ăp rnăk gay ƀư âk lơn tay.

Briêt lah ntil ba kah bah Tây Nguyên, hôm dơi kuăl lah phe kĭr ônh Briêt. Ntil phe aơ, kah âk, âk sắt, sât, vitamin n’hanh chất njrăng n’gang oxy hóa jêng nar lơi dơi nuĭh dŏng ŭch. Wa Nguyễn Việt Đức, Giám đốc HTX N’hŭch ach o Ea Súp, nkuăl Ea Súp, n’gor Dak Lak an gĭt: Rhoăt nău blău ơm bah âk yan bah năp, HTX tâm rgop tay đah nuĭh ƀon lan, săch nkual tâm di srih tăm ntil ba Briêt. Tâm nĕ, nkô̆ nău mpeh tu dak, neh ntu, mông nar kloh uĕh dơi an bôk năp. Năm e, HTX lĕ lôch jêng srih tăm ba Briêt tĭng trong hữu cơ tâm di JAS (Nhật Bản) têh 3 ha n’hanh ndơ phe Briêt geh tâm di OCOP 3 sao gưl n’gor. Tĭng wa Nguyễn Việt Đức, Giám đốc HTX N’hŭch ach o Ea Súp, năm tât, HTX mbra tâm rgop đah nuĭh ƀon lan n’hao rnoh neh srih tăm ba hữu cơ, ntơm rgâl nău mĭn, trong ƀư bah nuĭh ƀon lan, rgop n’hao uĕh n’hanh khlay ba, phe ta ntŭk.

Bôk năp lah mpôl hên rgum tâm ăp ndơ lĕ geh kp dơn hữu cơ lĕ geh moh êng. Tal 2, mpôl hên pơk hvi tay rnoh neh tĭng di Global GAP gay pơk hvi rnoh neh gay âk nuĭh ƀon lan dơi geh âk lơn.

Tĭng wa Nguyễn Bá Bân, Kruanh jrô kan Tuch tăm nkuăl Ea Súp, bôl rnoh neh mô âk yơn ndơ phe Briêt dơi an kơp dơn hữu cơ lah an saơ nău rgâl tâm nău mĭn tuch tăm bah nuĭh ƀon lan nkual n’har bri Ea Sup, lah mô đah hóa chất, srih tăm kloh uĕh. Nkre an saơ, nău rgâl ntil tơm tăm hữu cơ bah n’gor Dak Lak dôl lah trong hăn di, nsĭt tay nău khlay wăng sa âk rgop rgâl nău rêh bah kônh wa nkual n’har bri:

Nău HTX N’hŭch ach o Ea Súp dơi an kơp dơn srih tăm hữu cơ, nĕ lah njoat hăn bôk năp bah trong nkra njêng tuch tăm hữu cơ. Tâm năm tât, mbra geh âk rmôt kan, êng nuĭh ntop kơl ăp HTX, doanh nghiệp geh kơp dơn hữu cơ nar lơ âk nsĭt tay ndơ geh kơp dơn bah ndsoh ndơ tăch./.