Ăp đại biểu tâm ban ŭch âk trong ƀư rlong lor pă gưl an gưl nkuăl âm uănh, ƀư tĭng ăp bôk nău kan rƀŏng tĭng lam dak tĭng trong mkra: “Hội đồng nhân dân gưl nkuăl dơi ntrŭnh mkra rgâl trong mkra tâm pă prăk ntuh kơl nsum, prăk ƀa ƀơ đah ăp bôk nău kan rƀŏng tĭng lam dak tâm trong nchrăp ntuh kơl đêt năm, trong nchrăp ntuh kơl prăk ăp năm, trok tâm tơm prăk ngih dak ăp năm lĕ dơi pă dơi jao an”. Đại biểu Mai Văn Hải, mpôl Thanh Hóa an lah:

Trong mkra aơ mbra kơt dŏng dâl trong ƀư an êng an nău dôh rkaih jêr jŏt, wăk kol tâm năm 2024 năm 2025. Rlău nĕ tay, nghị quyết bah Quốc hội dôl nchră gay dôh rklaih, wăk kol, ntrôl ngăch ƀư tĭng 3 bôk nău kan rƀŏng tĭng lam dak lvang 2021-2025 gay ăp ntŭk nchrăp prăk đah ăp bôk nău kan rƀŏng tĭng lam dak nkra rgâl bah prăk sự nghiệp an prăk ntuh kơl. Lah dơi ƀư tĭng ri nău an tơm prăk bah ăp bôk nău kan rƀŏng tĭng lam dak mư dơi đăp mpăn nău rƀŏng tĭng n’gluh an.

Ndrel đah pă gưl lah tâm pă nuĭh kan. Bôl hôm e du đêt nău rvê mpeh nău blău dŏng prăk bah gưl nkuăl, yơn dŭt âk ăp đại biểu uănh lah prêh trong ƀư tâm pă, jao prăk dŏng ƀa ƀơ bah dự thảo Nghị quyết nĕ lah: Quốc hội ntrŭnh tâm pă; Thủ tướng Chính phủ nchrăp tơm prăk Trung ương an nkuăl tĭng dĭng lĕ prăk; HĐND gưl n’gor tâm pă prăk ƀa ƀơ tât nău nchrăp ƀư tĭng gưl. Nău khlay HĐND gưl n’gor ntrŭnh pă gưl an HĐND gưl nkuăl ntrŭnh.Gêh tât nău mât uănh drăp ndơ jêng bah nău nchrăp ƀư ntop kơl nkra nkra njêng ăp đại biểu dăn đă mĭn njêng rjăp sŏk lor bah năp rnôk jao an nsum mpôl, nuĭh tơm tâm rgop n’hanh n’hao uănh nđôi bah gưl ka lơ, ndrel lĕ nău kan ngih pah geh tât.

Đại biểu Nguyễn Thị Sửu, Mpôl Thừa Thiên Huế mpŏng ŭch, nău mbơh an Nghị quyết mpeh du đêt trong ƀư, nău kơl an nêng ƀư tĭng ăp bôk nău kan rƀŏng tĭng lam dak mpeh nkô̆ nău pháp lý kơl ăp ntŭk dôh rklaih jêr jŏt, wăk kol, soih luh ăp “ntŭk kol” gay rƀŏng tât lôch jêh rnoh an ƀư, nău kan hun hao wăng sa rêh jêng bah năm 2024 lah êng n’hanh bah lĕ năm kan lah nsum.

Lĕ rngôch ăp bôk nău kan rƀŏng tĭng lam dak jao an gưl xă ƀư tơm ntuh kơl, ăp nău nchrăp ƀư têh mbra pă gưl an gưl n’gor mô lah gưl nkuăl. Nkô̆ nău tâm pă an na nê̆, rah wah, le naư kan ri rnôk nĕ HĐND gưl n’gor, HĐND gưl nkuăl, HĐND gưl xă mư dơi ƀư uĕh nău tơm, lĕ nău kan bah nơm. Nkô̆ nău nĕ, n’gâng kan ƀon lan UBND gưl xă lah ngih pah kan hành pháp mư mbơh ƀư lĕ n’hanh mô nking rkăng lĕ nău kan n’hanh dơi n’hao ƀư tơm lĕ nău kan bah tĭng gưl.

Đah 3 bôk nău kan rƀŏng tĭng lam dak, âk đại biểu mpŏng Nghị quyết dơi mbơh an mbra geh âk nău rgâl, jêng trong ƀư soih kloh gay nkual yôk mât uĕh nău geh ơm, rgâl hao mhe. Đại biểu Tạ Văn Hạ, Mpôl Quảng Nam an lah:

Đah 8 trong rlong ƀư aơ ri gâp an lah mbra geh njoat hăn mhe tâm nău ntrôl ngăch ƀư tĭng 3 bôk nău kan rƀŏng tĭng lam dak. Aơ lah nău gâp an uănh mĭn tay m’hâm ƀư rnôk săch, lĕ kuăl lah rlong ƀư an geh nău ntoh măt, dơi lah ƀon lan, nkual têh, nkual yôk..., lĕ rngôch ăp nău nĕ rnôk he n’glôch jêh ri nău kơl nĕ, trong ƀư nĕ an geh trong lĕ rngôch dơi ăp ntil nău n’hanh ta ntŭk ntô.

Ăp đại biểu mpŏng kâp đŏng, Nghị quyết mpeh du đêt trong ƀư, nău kơl an êng ƀư tĭng ăp bôk nău kan rƀŏng tĭng lam dak dơi Quốc hội mbơh an, Chính phủ n’hanh nău kan dơi kan mbra ơm an ăp Nghị định, thông tư, săm ƀŭt ntĭm gay kuật ngăch mât uĕh săk rnglăy, hăn tâm nău rêh./.