Nău ƀư bôk năp lah UBND nkuăl Ia H’Drai ƀư mbơh nău ntrŭnh bah UBND n’gor Kon Tum kơp dơn xă Ia Đal tâm di thôn ƀon mhe. Aơ lah xă n’har bri tal 7 ta dĭng lĕ 13 xă n’har bri bah n’gor tât lor thôn ƀon mhe. Tâm âk năm bah năp Đảng bộ, n’gâng kan ƀon lan n’hanh bơi 5.000 nuĭh ƀon lan xă n’har bri Ia Đal lĕ ndrel soan, du nuih n’hâm ƀư tĭng bôk nău kan rƀŏng lam dak ndâk njêng ƀon lan mhe n’hanh geh âk săk rnglăy uĕh. Bah âk tơm prăk xă lĕ rgŏ jă geh rlău 49 rmen prăk ntuh kơl đăp mpăn ăp rnoh an ƀư mpeh ntung trong; rĭng geh bôk nuĭh geh rlău 43 rkeh prăk/du hê/năm; rnoh rnăk ach o, êp ach o n’hŭch hôm bah dâng 12%. Wa Lò Văn Nịa, thôn Ia Đal, xă Ea Đal, an gĭt:

Nuĭh ƀon lan dŭt rhơn yor ndâk njêng thôn ƀon mhe lah ƀư an ƀon lan, ƀư an săk nơm ma hun hao lơn. Ndâk njêng ƀon lan mhe nuĭh ƀon lan rgop soan, đah an neh ƀư trong thôn ƀon mhe. Ndâk njêng thôn ƀon mhe nuĭh ƀon lan dŏng dŭt âk, nta an hun hao wăng sa rnăk wâl rklaih luh ach o. Văn hóa, wăng sa n’hao prêh dŭt n’hâm nê̆ nkôp đah nar bah năp ndâk njêng thôn ƀon mhe”.

Đah nău kơp dơn tâm di thôn ƀon mhe, xă Ia Đal lah xă n’har bri tal 7 tâm ding lĕ 13 xă n’har bri bah n’gor Kon Tum geh tâm di thôn ƀon mhe. Tât aƀaơ lam n’gor Kon Tum lĕ geh 48 dĭng lĕ 85 xă bah n’gor tâm di thôn ƀon mhe, tâm nĕ geh 4 xă tâm di thôn ƀon mhe n’hao prêh n’hanh 1 xă tâm di thôn ƀon mhe ntrong leo mhe.

Đah nsrôih dŭt n’hâm lôch jêh ăp nău rƀong hun hao wăng sa-rêh jêng n’gluh tâm năm 2024, ta ƀư hăn kan ndâk njêng thôn ƀon mhe n’hanh nkual ƀon têh uĕh mhe, 10 nkuăl, nkual ƀon têh bah n’gor Kon Tum lĕ mbơh ƀư ăp nkô̆ nău na nê̆ nsrôih rgâl ndrŭch lŏ, hun hao ndơ OCOP; ndâk njêng mhe, rgâl ndơ ƀư ntung trong, dak bât, ngih văn hóa; ntop kơl rnăk wâl dơi kơl geh nău rêh jêr jŏt nkra ngih wâl, nkra mir tơm tăm hun hao wăng sa; n’hao trong kan mât uănh n’hanh hun hao...

Lah nkuăl geh rlău 79km trong n’har bri ngih dak kâng dak băl Campuchia, ta Ƀư hăn kan ndâk thôn ƀon mhe dơi ƀư lor ta xă Ia Đal, wa Võ Anh Tuấn, Kruanh UBND nkuăl Ia H’Drai an gĭt:

 Đảng bộ, n’gâng kan ƀon lan n’hanh nuĭh ƀon lan bah nkuăl geh nău rƀŏng ndâk njêng nkuăl tât dŭt năm 2025 ntơm jêh nkuăl geh ăp rnoh ndơ bah nkuăl thôn ƀon mhe. Tĭng ăp Nghị quyết bah N’gor Đảng bộ, nkuăl lĕ n’gluh trong nchrăp na nê̆ tĭng xă mpeh tât thôn ƀon mhe. Đah nău rƀŏng kơt ăp trong nchrăp lĕ n’gluh an mpôl hên dôl dŭt n’hâm nsrôih kơt lĕ geh trong ƀư na nê̆ gay ndơ̆ xă Ia Tơi tât dŭt năm 2024 mpeh tât thôn ƀon mhe.

Gĭt saơ nuĭh Xơ Đăng wât, lĕ đah nău kan nsum mpôl dŭt âk dơh an nău hun hao ntrong kan wăng sa nsum, bah ăp nuĭh n’gâng tơm, ta xă Đăk Na, nkuăl Tu Mơ Rông, n’gor Kon Tum lĕ jêng geh 3 hợp tác xã n’hanh 3 Rmôt kan ndrel. Nău râng tâm ăp HTX lĕ kơl nuĭh ƀon lan dơi mĭn tâm nău pah kan jan sa. Wa Võ Nguyễn Sinh, Kruanh Hội đồng Quản Trị nkre ƀư Giám đốc Hợp tác xã Pâl nđaih n’hanh dak si kloh uĕh Siu Puông đah 43 nuĭh lĕ rngôch lah nuĭh Xơ Đăng, an gĭt:

Nuĭh kan ndrel râng Hợp tác xã ri bu rgâl nău mĭn nkra njêng, nău mĭn ƀư sa. Râng Hợp tác xã gay tăm sâm Ngọc Linh ri dơi mât n’hanh hun hao nâp nâl. Yor bu dơi rgâl nău mĭn bah nĕ jêng ăp ntrong kan wăng sa êng. Đêt khay ri tâm sâm rse, jêh nĕ mât djăr, mât sŭr gay rhŏ an pâl nđaih. Hôm jŏ jong ri geh sâm Ngọc Linh. Bu dơi geh prăk đêt khay n’hanh jŏ jong.  

Đah nău ƀư tơm tâm ndâk njêng thôn ƀon mhe, âk nsum mpôl rnoi mpôl đêt bah n’gor Kon Tum lĕ nsrôih pah kan jan sa n’hao geh prăk n’hanh rgop rgâl âk muh măt thôn ƀon. Kơp tât dŭt năm 2023 lĕ geh 32 thôn, ƀon nkual rnoi mpôl đêt bah n’gor Kon Tum geh tâm di thôn ƀon mhe. Lĕ rngôch ăp xă tâm n’gor tâm di bah 15 rnoh ndơ ƀư thôn ƀon mhe let lơ. Lam n’gor Kon Tum aƀaơ geh 42 xă tâm di thôn ƀon mhe, tâm nĕ geh âk xă nkual rnoi mpôl đêt lĕ tât lor thôn ƀon mhe./.