Ntĭm ty ta trong bê tông jong rlău ăp thôn ƀon, bu ranh ƀon K’Keo, ta ƀon Hàng Làng, xă Gung Ré, nkuăl Di Linh (Lâm Đồng) răm rhơn an gĭt, muh măt thôn ƀon bah xă lĕ rgâl mhe dŭt âk nkôp đah bah năp. Knơm trong hăn dơh, ndơ ƀon lan mô geh nuĭh rwăt nsâm, rhoăt đêt tâm ƀah đah ƀon lan đah nkual nklang... jêng nău rêh drăp ndơ n’hanh nuih n’hâm bah nuĭh ƀon lan lĕ dơi hao dŭt âk nkôp đah bah năp đaơ. Dơi geh săk rnglăy ap knơm nău uănh mĭn ntuh kơl bah Đảng n’hanh Ngih dak mpeh ăp ntil geh bôk nău  tĭng lam dak mpeh ndâk njêng thôn ƀon mhe.

Dơi geh nău wât, dơi gĭt saơ aơ lah nău kan n’hanh nău geh bah năp măt bah nuĭh ƀon lan jêng kônh wa dŭt n’hâm rƀŏng tĭng ndrel. Năm bah năp kônh wa lĕ nsơr tơm tăm, rnoh neh n’hanh rgop soan nuĭh drăp ndơ đah ngih dak ndâk njêng thôn ƀon mhe. Ngih dak ri ntop kơl n’hanh kônh wa rgop an pơk trong hăn lăp ăp nkual tuch tăm, ndâk ƀư trong hăn thôn ƀon. M’hâm ƀư ndâk njêng thôn, ƀon geh trong hăn hăn nsong, nta an hun hao wăng sa, kơl an muh măt thôn ƀon nar lơ uĕh lơn.

Mô knŭng ta ƀon Hàng Làng, xă Gung Ré, ma bôk nău kan ndâk njêng thôn ƀon mhe lĕ nsĭt tay săk rnglăy ngăn ngên an ăp ƀon lan bah nkuăl Di Linh, n’gor Lâm Đồng. Ta ƀon Duệ, xă Đinh Lạc, jêh rnôk dơi kơp dơn ƀon văn hóa ntrong leo lor, kônh wa ntŭk aơ lĕ nsrôih ndrel ty đah n’gâng kan ƀon lan ndâk njêng n’hanh ƀư tĭng ăp rnoh ndơ ƀư thôn ƀon mhe n’hao prêh.

Tĭng wa M’Hiu Nguyên, Bí thư Chi bộ ƀon Duệ, yor nuĭh ƀon lan dơi saơ nău khlay ngăn bah nău ndâk njêng thôn ƀon nsĭng tay an yor nơm, an ƀon lan nơm jêng ăp nuĭh râng rƀŏng tĭng dŭt n’hâm. Tâm nĕ, bôk nău kan Năng nar prao thôn ƀon mhe lĕ n’hanh dôl dơi rêng hvi, kơl muh măt ƀon lan rup gui bah nkual ƀon têh ta nklang: geh trong mpoh ang, geh ndeh rgum ndŏk nja, trong hăn tâm ƀon têh hvi n’hanh kloh uĕh mro. Wa M’Hiu Nguyên lah:

Aƀaơ ta thôn Duệ lĕ n’hanh dôl ƀư tĭng dŭt n’hâm n’hanh săk rnglăy. Cán bộ n’hanh nuĭh ƀon lan ndrel ty rƀŏng tĭng Năng nar prao thôn ƀon mhe. Na nê̆, trong hăn tâm ƀon lan kloh uĕh, ndŏk nja dơi rgum, ŭnh ang lam thôn, lĕ rngôch kơt ăp trong tâm thôn rgâl bê tông da dê... Muh măt thôn lĕ dơi rgâl mhe. Lah nsum nău rêh bah kônh wa lĕ nar lơ dơi hun hao lơn.

Di Linh lah nkuăl geh nuĭh ƀon lan gŭ lah nuĭh rnoi mpôl đêt geh dŭt âk, rlău 40%, tâm nĕ knŭng lah nuĭh K’ho. Tât aƀaơ, lam nkuăl lĕ geh 18/18 xă tâm di thôn ƀon mhe, 2 xă tâm di thôn ƀon mhe n’hao prêh n’hanh du xă tâm di thôn ƀon mhe ntrong leo lor. Wa Vũ Đức Nhuần, Groi Kruanh UBND nkuăl Di Linh an gĭt, gay mbơh ƀư tay geh săk rnglăy bôk nău kan ndâk njêng thôn ƀon mhe tâm lvang 2021-2025, Ban thường vụ Nkuăl ủy Di Linh lĕ ndâk njêng bôk nău rgop tâm nchră mrô 4 ƀư tĭng bôk nău kan Năng nar prao ndâk njêng thôn ƀon mhe ta ăp ƀon lan. Rlău bơi 1 năm mbơh ƀư, bôk nău kan lĕ dơi rêng hvi têh dăng tâm ăp rơh kơn nuĭh ƀon lan n’hanh cán bộ đảng viên. Tâm nĕ, nău ƀư tơm bah nuĭh ƀon lan tâm trong ndâk njêng thôn ƀon mhe lĕ nar lơ dơi mĭn lah n’hanh hun hao geh săk rnglăy. Aơ dơi uănh lah nkô̆ nău khlay gay nkuăl geh ăp rnoh ndơ ƀư ŭch tŏng ăp tât dơi kơp dơn lah nkuăl thôn ƀon mhe tâm năm 2024. Wa Vũ Đức Nhuần, lah:

Bôk nău rgop tâm nchră nar 18/1/2023 bah Ban Thường vụ nkuăl ủy lah du bôk nău rgop an tâm nchră lĕ rngôch mpeh ndâk njêng thôn ƀon. Jao rnoh an ƀư tĭng xă, tĭng thôn ƀon gay ndâk njêng ăp rnoh ndơ ƀư mpeh thôn ƀon mhe. N’ăp nkuăl geh 9 rnoh ntil ndơ ƀư mpeh thôn ƀon mhe ri an geh đŏng. Tâm năm bah năp djăt nar prao, nar pơh ri Kruanh, Bí thư nkuăl, kruanh UBND nkuăl mpôl hên an tâm pă ăp xă gay ntrŭt đă, jêh nĕ ndrel đah kônh wa ƀư ăp nkô̆ nău kơt kaih rwach rƀong dak hoch, ntĭm kônh wa rgâl mrô... Lĕ dơi geh nău rêng hvi têh dăng tâm kônh wa mpeh nău ƀư tơm bah nơm tâm ndâk njêng thôn ƀon mhe”.

Mô knŭng nsrôih geh tâm di thôn ƀon mhe tâm năm 2024, nkuăl Di Linh hôm n’gluh an nău rƀŏng tâm năm 2025 mbra ƀư tĭng ăp rnoh ndơ ƀư nkuăl thôn ƀon mhe n’hao prêh, đah đêt ngăn 8 xă geh tâm di thôn ƀon mhe n’hao prêh n’hanh 5 xă geh tâm di thôn ƀon mhe ntrong leo lor. Tĭng ăp soan dăng tâm rnglăp rnoi nuĭh, sŏk ƀon lan ƀư rmôt n’gâng tơm, n’hanh lah nuĭh tơm ƀư tĭng ntrong leo ndâk njêng thôn ƀon mhe, nsing nơm lah nkuăl Di Linh mbra dơi geh ăp rnoh ndơ an ƀư lĕ n’gluh an, rgop ndâk njêng nkual yôk prêh Di Linh nar lơ uĕh ndrŏng./.