Mô hôm kâp kuăl điện an tĭng nuĭh, mô lah tât jay đảng viên gay mbơh nar rƀŭn chi bộ kơt ăp nău kan ân mbơh ƀư, aƀaơ, knŭng đah rmôt Zalo, wa Lò Văn Oai, bí thư chi bộ nkre ƀư kruanh bản Mạt, xă Mường Lèo, nkuăl Sốp Cộp, Sơn La lĕ dơi dơh rgum đảng viên.

Mô hŏ dơi ntĭm nti mpeh công nghệ thông tin, yơn mpôl hên nsrôih rwăt du mlâm măy tính, 1 mlâm măy in gay nti mbrơi mbrơi. Chi bộ mpôl hên lĕ ƀư n’hanh rgum geh 31 nuĭh tâm rmôt Zalo, mô geh đảng viên ranh mbra mbơh tĭng trong êng. Geh rmôt Zalo bah chi bộ aƀaơ, mbơh nar rƀŭn an đảng viên n’hanh du đêt nău kan êng dơh lơn đŏng.

Mông nar rgum rƀŭn bah chi bộ bản Mạt nar lơ rgâl bah rnôk geh nuĭh djôt bôk gưl ủy gĭt công nghệ. Ăp nkô̆ nău ntĭm rđău, ƀĭt joet tâm ndâk njêng thôn ƀon mhe, rgâl ntil tơm tăm mpa rong, bah năp đaơ jêr jŏt mpeh trong ƀư, ri aƀaơ đah nău wât, gĭt kỹ thuật bah Internet.

Bản Mạt xă Mường Lèo bah năp đaơ dŭt jêr jot, aƀaơ kônh wa gĭt kơt dŏng khoa học kỹ thuật an tuch tăm, nkra njêng rlău 50 ha ba, 25 ha bum, 25 ha tơm sa play; mât rong bơi 4.000 mlâm sŭr, djăr; ndâk njêng geh 2 HTX lŏ mir... rnoh rnăk ach o, êp ach bah bản knơm nĕ hŭch âk, tât aƀaơ knŭng hôm 6%. Yuh Lường Thu Hương, đảng viên chi bộ bản Mạt nkoch:

Gâp lĕ kơt dŏng khoa học kỹ thuật, nti tay tâm mạng trong mât rong ndrôk, rpu, tuch tăm gay săk geh, geh prăk âk. Lah đảng viên gâp mât nău ƀư tơm, nkoch trêng an kônh wa trong mât rong săk rnglăy âk.

Ăp nău nkoch uĕh, trong ƀư săk rnglăy gay hun hao wăng sa, ndâk njêng thôn ƀon mhe bah âk ntŭk, âk rnoi nuĭh... dơi bí thư chi bộ, nsum mpôl gưl ủy ndrel ăp đảng viên bah bản nsrôih tâm pă ta ntŭk nơm, ăp hội, rmôt. Wa Giàng A Dệnh, Bí thư chi bộ nkre ƀư kruanh bản Sam Quảng lah:

Uănh tâm mạng xã hội geh âk nău uĕh mpeh đảng viên ntrong leo, ƀư nuĭh uĕh kan uĕh, gâp nkoch tât đảng viên tâm chi bộ. Ta tivi n’hanh ăp trong mbơh ri lĕ nti, kơt dŏng khoa kỹ thuật ndơ̆ an tuch tăm mât rong; gưl ủy chi bộ lĕ mĭn njêng, joi gĭt, nti gay ndơ̆ mbơh ƀư an ƀon lan.

Wa Phan Thanh Lăng lah cán bộ nkuăl, dơi đă sĭt dơn nău kan Bí thư đảng ủy ta xă n’har bri dŭt jêrr jŏt Mường Lèo, nkuăl Sốp Cộp, Sơn an gĭt: Đảng ủy xă lĕ rgŏ jă ăp chi bộ rwăt măy tính, rhŏ an pah kan, nău kan nsum. Tât aƀaơ, 10/17 chi bộ ta xă lĕ geh măy tính; ăp bí thư chi bôk mĭn joi êng, nti gay kơt dŏng dŏng công nghệ thông tin tâm ntĭm rđău ƀĭt joet. Bah meng nĕ, Đảng ủy xă mât uănh tât lĕ rngôch cán bộ, công chức, đảng viên mât uĕh ăp nău uĕh bah công nghệ.

Gâp lĕ ntĭm rđău cán bộ, công chức mbơh tŏng ăp tài khoản trang mạng xã hội, ăp rmôt Zalo gay m’hâm ƀư geh lĕ nău ka tâm nău dŏng n’hanh dơh mât uănh bah gư ka lơ. Nsrôih nkoch mbơh bah ăp trang di na nê̆ bah báo, đài TW, n’gor; mât uănh mô nkoch ăp nău mbơh mô hŏ dơi uănh năl, mbơh nău tih, nău mô di...geh an nău lư, nău mĭn mô uĕh, n’hŭch nău nsing nơm đah kon nuĭh, đah Đảng, Ngih dak. Bah meng nĕ, ntrŭt đă ăp chi bộ chŭk rup, video mpeh ăp nău ƀư bah bản, chi bộ, bah âk nău jêt ngăn... tĭng trong way ƀư lah sŏk uĕh, jăng nău m’hik.

Knơm kơt dŏng công nghệ thông tin, mât nău uĕh bah mạng xã hội, ăp đảng viên ta xă n’har bri Mường Lèo, nkuăl Sốp Cộp, Sơn La mkra ăp nău jêr jŏt ta ntŭk tâm rnôk ndâk njêng thôn ƀon mhe kơt: ntŭk ngai, ƀon lan rêh chah chrai, nău nti nsơm mô tâm ban, nău wât đêt, dơh geh nău rlăm, nău mplư, djăt tĭng ăp nău m’hik mô dơi pháp luật ngih dak an. Tă bah nĕ an saơ nău ƀư tơm hăn lor bah đảng viên dơi ƀư tâm ăp ntil nău kan.