Mhe 16 năm deh, H’Đô Ayun (rnoi Êđê) ta ƀon Dhung, xă Cư M’gar, nkuăl Cư M’gar (n’gor Dak Lak) sŏk sai. Ăp nar bôk năp, kôp băl mom hôm e dơi rnăk wâl mât rgum, mô hŏ geh rwê an nău rêh. Yơn bah rnôk deh kon, nău rêh ntơm rdâng đah ăp jêr jŏt. Aƀaơ lĕ geh 2 hê kon, yuh H’Đô Ayun mư gĭt tih bah nơm. Nău rêh ŏk r’ah, mô tŏng rnôk lĕ 2 hê ur sai dôl tâm rnoh năm deh mô hŏ hun hao lĕ mpeh nău mĭn, an ntlơi:

“Jêr jŏt âk mpưm. Yor gâp gŭ sai ơm. Jêr jŏt prăk kaih mât ntĭm nti oh kon n’hanh nău hăn nti bah kon dŭt jêr jŏt đŏng. Mô tŏng prăk ndơ̆ an kon hăn nti. Di lah kon nti jrô 7 hôm yơn aƀaơ kon knŭng dôl nti jrô 4. Lĕ rngôch yor gâp jêr jŏt. Ƀư sa mô hun hao yor gâp mô tŏng nău wât. Lah dơi săch tay mbra mô sŏk sai ơm, yor njê ngăn lah kon”.

Du hê nuĭh êng tâm ban nĕ, nar yuh H’Mai Kbuôr, Ƀon Dhung, xă Cư M’gar, nkuăl Cư M’gar, n’gor Dak Lak sŏk sai ta năm 16. Bôl lĕ rnăk wâl nking n’gang, nai cô ta ngih sam ƀŭt lah yơn yuh mô djăt. H’Mai Kbuôr ŭch sŏk sai rnôk hôm e năm sa, năm nti. Sŏk sai ơm, nău nti n’gul gâl, nău rêh rwăch đah ntŭk tăch ndơ jêt n’hanh ăp nău jêt kơl tâm rnăk wâl. Yuh H’Mai Kbuôr nkoch, sŏk sai ơm aƀaơ knŭng rwăch tâm jay ŭnh, bah dih hôm âk nău uĕh mô hŏ gĭt yơn yor kon sai:

“Rnôk dôl dŭt mom lĕ jêng mê̆. Âk nău jêr jŏt kiău ma. Kop ji ri mô geh prăk rwăt dak si dŭt jêr jŏt. Mĭn tay gâp dŭt wơl bơh yor lĕ ntlơi nti, sŏk sai ơm”.

H’Đô n’hanh H’Mai sŏk sai ơm da dê. Du hê dôl ntơm ŭch đah nău rêh aƀaơ, du hê “tăch n’gul gâl”. Nău mĭn sŏk sai, gŭ ur ơm an kon gay đăp mpăn nău rêh, rnăk wâl lŏ geh tay nuĭh pah kan mô hôm tâm di tay. Wa H’Mưu Kbuôr (way kuăl Aduôn H’Mai) ta ƀon Dhung, xă Cư M’gar, nkuăl Cư M’gar lah:

“Gâp ntĭnh ntăn kon sau an nti nsơm, mô way pâl, gâp mô an kon sau ntlơi nti jêh nĕ gŭ ur, sŏk sai ơm, mô gĭt ndơ ƀư an nău rêh rnăk wâl”.

Nkuăl Cư M’gar, n’gor Dak Lak geh rlău 197.000 nuĭh đah 25 rnoi nuĭh oh nô gŭ rêh ndrel. Bah bôk năm 2018 tât aƀaơ ta nkuăl kơp dơn geh 50 kôp ur sai gŭ ơm n’hanh dôl geh trong hŭch. Âk ntŭk bah năp lah ntŭk “âk” mpeh nău aơ yơn năm aơ lĕ dơi n’hŭch n’hanh ntơm dơi ntrôl rŭch. Yơn lah, ta lam nkuăl hôm e kơp dơn tay 8 nuĭh gŭ sai ơm. Wa Y Wem Hwing-Groi Kruanh nkuăl Cư M’gar, n’gor Dak Lak an gĭt, ăp năm dăch aơ, n’gâng kan ƀon lan n’hanh ăp rmôt kan nsum mpôl nău rêh jêng lĕ mbơh ƀư âk trong mkra uĕh ƀư tĭng nău rgop an tâm nchră n’hŭch nu nău gŭ ur sŏk sai n’hanh ur sai gŭ êp dak mham tâm nkual rnoi mpôl đêt. Bôl dơi geh săk rnglăy  bôk năp, yơn gay rgâl hao, dơi rgâl nău wât bah kônh wa, an n’hao lơn tay trong kan nkoch trêng.

“Tâm ăp năm dăch aơ, nu nău gŭ sai, ur sai êp dak mham lĕ n’hŭch na nê̆. Ăp ban nău kan nsum mpôl bah nkuăl groi nđôi bôk nău way kan ur sai ơm, gŭ êp dak mham. Jêh rnôk saơ du đêt nuĭh gŭ sai ơm, ur sai êp dak mham UBND nkuăl ntĭm rđău xă rmal nău tih hành chính. Ăp ban nău kan nsum mpôl lĕ lăp dŭt n’hâm, tâm ban nkoch trêng an nuĭh gŭ ur sŏk sai ơm n’hanh ur sai êp dak mham”.

Ƀư tĭng Bôk nău tâm rgop an tâm nchră “N’hŭch nu nău gŭ ur sŏk sai ơm n’hanh êp dak mham tâm nkual rnoi mpôl đêt”, mhe aơ, Ban Dân tộc n’gor Dak Lak lĕ tâm rgop đah UBND ăp ntŭk n’hao ƀư rƀŭn nchră nkoch trêng n’hŭch nu nău sŏk sai n’hanh êp dak mham an bơi 3.900 nuĭh nti ta 30 xă geh rnoh gŭ ur sŏk sai ơm n’hanh ur sai êp dak mham âk. Nkre, Ban Dân tộc n’gor Dak Lak lĕ tâm rgop đah Ban Tuyên giáo N’gor ủy n’hao trong kan nkoch trêng ta ăp xă geh rnoh gŭ ur sŏk sai ơm n’hanh ur sai êp dak mham âk ta lam n’gor.