Tâm 2 pơh sĭt đah xă Cư Pơng, nkuăl Krông Buk, n’gor Dak Lak, 15 druh ndăm kơl kan tâm rmôt pah kan Yan khay mih gưl n’gor lĕ ndrel đah ƀon lan jêh 4 ndơ ƀư druh ndăm. Bôl trôk nar mih, ăp tahen kơl kan hôm e gơih ndơr ntop kơl ƀư trong hăn ndrâm dak n’hanh rwach, nkra ndrâm dak; ƀư jâng gung bê tông, tach pah play tâm jâng gung jay cộng đồng. Măng tât, druh ndăm kơl kan lŏ an mông nar ntĭm tay khay rlu nti an kon se, ƀư 8 măng rgum rƀŭn khay rlu nti tâm rgop nkoch trêng pháp luật. Nô Y Hlý Niê Kđăm, Bí thư Đoàn druh ndăm xă Cư Pơng, nkuăl Krông Buk an gĭt:

Năm aơ xă Cư Pơng mbra tât lor thôn ƀon mhe jêng lah ăp ndơ ƀư, gưl kan ma druh ndăm kơl kan ntop kơl ta xă dŭt khlay gay ndrel râng lôch jêh ăp nău gay tât lor tâm năm aơ. Ăp băl tât đah ƀon lan ri mô knŭng rêng hvi rup ndah uĕh mpeh mât uănh ntŭk ntô gŭ âm, ntĭm tay khay rlu nti an kon se ma hôm saơ nău dŭt n’hâm, pơk tay nău nsing nơm an druh ndăm, ndrel soan rgop an nău rêh jêng.

Ta nkuăl Lắk, 15 druh ndăm kơl kan gưl n’gor lĕ hăn ntop kơl ta ƀon Đắk Sa, xă Đắk Nuê. Aơ lah ƀon geh 100% nuĭh Mông trơn gŭ dah rŏng bah mpeh Bắc lăp, nău rêh hôm e dŭt jêr jŏt, mô geh điện ngih dak n’hanh trong hăn. Druh ndăm kơl kan lĕ tâm pă rmôt hăn nkoch trêng mpeh gŭ ur sŏk sai ơm, njrăng n’gang kop srê, ntop kơl rnăk wâl dơi kơl kăch rek, mât chăm cà phê. Pơk 2 jrô ntĭm tay khay rlu nti an 40 kon se tâm ƀon, ndrel đah nuĭh ƀon lan nkra 5 km trong hăn tâm lŏ mir tâm ƀon, muih koaih du đêt trong tâm ƀon n’hanh tăm 100 tơm n’gêr njok trong. Wa H Me Tơr, ta xă Đăk Nuê, nkuăl Lắk gĭt saơ:

Nău uĕh bah ăp oh nĕ lah nău dŭt n’hâm. Ta ntŭk ri mô geh điện, mô geh dak, mô geh trong, ăp oh dơ dak mih, rdêng dak mih gay ŭm, cheng dak gay n’gôn piăng. Yơn ma ăp oh dŭt răm, ăp oh mô klach măng nar dŭt n’hâm râng lĕ rngôch ăp ntrong leo pah kan ma mô geh nău rvê ndơ lơh ta aơ mô geh dak, mô geh điện.

Tâm nău kan druh ndăm kơl kan yan mih năm aơ, ndrel đah rlău 7.000 druh ndăm kơl kan ta ntŭk, N’gor Đoàn Dak Lak lĕ ntop 180 druh ndăm sĭt ntop kơl 6 xă ta 6 nkuăl. Ndrel đah nĕ lah 6 rmôt way râng ntop kơl nkoch mbơh nău, rgâl mrô ntŭk gŭ rêh, mât ndrăy nău uĕh văn hóa rnoi mpôl đêt, rgum lăp lam ntŭr neh, druh ndăm kơl kan gĭt blău, yor mpôl oh he. Tă bah nĕ lĕ ƀư âk ndơ dŏng, Kruanh Ban ntĭm rđău pah kan uănh lah:

Lĕ geh dŭt âk ndơ ƀư, lơn lah tâm rnôk ma 2 pơh ƀư kan ri trôk nar mih mô dơi dơh, bri mih dŭt âk. Tĭng nĕ ăp băl kơl kan lĕ rgâl ngăch tâm ăp nău ƀư bah nơm n’hanh tâm pă nar gay đăp mpăn nkre dơi ƀư ăp ndơ ƀư nkre đăp mpăn ăp nkô̆ nău mpeh nkoch trêng pháp luật ta ntŭk n’hanh rgum rƀŭn chi đoàn kơt lah ntĭm nti khay rlu nti an kon se.

Đah ăp tahen kơl kan, aơ lah yan rlu nti geh nkô̆, rgop jêng ăp nău khlay uĕh lăng an nsum mpôl. Sinh viên Đặng Thị Phương Thảo (ngih sam ƀŭt Đại học Ngoại ngữ-Tin học nkual ƀon têh Hồ Chí Minh) nkoch:

Yan rlu nti năm 2024 aơ đah oh ri mô knŭng lah du yan rlu nti kơl kan ma hôm dơi an têh jêng lơn, dơi hun hao lơn tay, jêng an he du nău rêh geh nkô̆, jêng geh nău khlay an nsum mpôl. Oh dôl pah kan trực tuyến an lĕ yan rlu nti bah nkual ƀon têh Hồ Chí Minh n’hanh pah kan na nê̆, nsơr soan lĕ nơm an yan rlu nti ta ƀon tơm nơm. Tâm rnôk pah kan đah rmôt, du nar râng ri oh nti tay du nău mhe.

Pah kan yan rlu nti năm aơ ta Dak Lak lĕ lôch đah âk nău uĕh tâm nuih n’hâm n’gâng kan ƀon lan n’hanh nuĭh ƀon lan ta ăp ntŭk. Ăp ndơ ƀư, gưl nău kan bah druh ndăm kơl kan mô knŭng rgop ƀư tĭng ăp nău kan đăp mpăn nău rêh jêng ma hôm rêng hvi rup ndah uĕh đah soan druh ndăm, nuih n’hâm, nsơr soan bah druh ndăm Dak Lak yor nău rêh nsum mpôl.