Năm mhe aơ, muh măt thôn ƀon ta thôn 2, xă Ea H’Mlay, nkuăl jru ngai Mdrắk lĕ geh âk nău rgâl. Ăp trong hăn têh tâm thôn lĕ dơi tuh bê tông tât 90%. Trong me têh tâm thôn geh trong ŭnh ang, dơh an nuĭh ƀon lan hăn nsong, rdêng ndoh ndơ lŏ mir hăn tât ntŭk. Wa Nguyễn Thị Bích, Bí thư chi bộ thôn 2, xă Ea H’Mlay, nkuăl Mdrắk, n’gor Dak Lak an gĭt, lah ntŭk hôm e âk jêr jŏt, ƀon lan tâm ƀah jêng lĕ rngôch ăp ndơ ndâk njêng thôn ƀon mhe an rgŏ jă kon nuĭh rgop bah dih kơt nău ntop kơl bah ngih dak. Kơt ndơ ƀư điện mpoh ang jong rlău 1km nglăp ta trong tâm thôn tât xă, wa Bích lah, nĕ ndơ ƀư đoàn viên druh ndăm ƀư nglăp gay ntop kơl kônh wa.

“Knơm geh ndơ ƀư mpoh ang trong ƀon aơ bah Tỉnh đoàn, Nkuăl đoàn uănh tât, ntop kơl. Bah nĕ tât aƀaơ kônh wa ƀon lan dŭt rhơn, rnă njrăng ri đăp mpăn lơn. Aƀaơ nuĭh ƀon lan hăn nsong măng mô hôm klach tay, n’ăp kon se hăn nsong, rgum rƀŭn ăp ntrong leo dŭt răm rhơn đŏng”.

Druh ndăm Dak Lak kơl ndâk ƀư jay an kon hŏk jêr jŏt.

Xă n’har bri Ia Lốp lah xă jêr jŏt bah nkuăl Ea Súp, n’gor Dak Lak đah n’gul rnoh nuĭh lah nuĭh rnoi mpôl đêt n’hanh 70% lah rnăk ach o. Tâm âk năm bah năp, ƀa ƀơ geh ăp rmôt druh ndăm kơl kan ăp n’gor tât ntop kơl nuĭh ƀon lan. Kơt tâm năm 2022, ăp rrmôt kơl kan khay mih n’gor Bình Dương, rmôt kơl kan Rmôt nai dak si druh ndăm n’gor Bình Dương, n’gor đoàn Lâm Đồng n’hanh Tỉnh đoàn Dak Lak lĕ ƀư âk nău kan kơl kan, an ăp ndơ ƀư druh ndăm, jay tâm kơl ta ăp thôn. Tĭng wa Lang Văn Sơn, Groi Bí thư Đảng ủy, Kruanh HĐND xă Ia Lốp, nău ntop kơl bah ăp nuĭh lĕ rgop kơl xă đăp mpăn rêh jêng, nsrôih ndâk njêng thôn ƀon mhe n’hanh tât aƀaơ dơi geh 12/19 rnoh ndơ ƀư.

“Ăp rmôt kơl kan tât ri kơl dŭt âk an kônh wa ƀon lan xă, lơn lah ăp nău kan rêh jêng, ƀư ăp nău kan but uănh, săm ji, phăt ndơ, ndâk ƀư trong mpoh ang, kơl ăp rnăk dơi kơl nar pah kan dŭt geh nkô̆. Bôk năp lah ƀư nău tâm rnglăp kơt hăn lor bah đoàn. Tal 2 tay mbra kơl an kônh wa ƀon lan geh du trong kloh uĕh, n’hŭch âk nău geh tât rnă njrăng đăp mpăn”.

Druh ndăm ăp n’gor rgop soan rgâl muh măt thôn ƀon ta xă n’har bri Ia Lốp, nkuăl Ea Sup

Ƀư tĭng trong kan đoàn n’hanh ntrong leo druh ndăm, năm bah năp, n’gor Dak lak lĕ ƀư bơi 2.500 ndơ ƀư, gưl kan ta âk nuĭh ƀon lan gŭ, trong khlay tât nkual jêr jŏt, nkual jru ngai. Lơn lah, đah năm ƀư đại hội ăp gưl, druh ndăm Dak lak lĕ rdâk ƀư ân km trong mpoh ang ƀon tơm, mpoh ang trong n’har bri; ƀư mhe hang rhiăng km trong hăn thôn ƀon, âk jay tâm kơl ta ăp thôn ƀon đah dĭng lĕ hang rhiăng rmen prăk. Yuh H Giang Niê, Bí thư n’gor đoàn Dak Lak an gĭt:

“Mpôl hên mbra râng ndrel ăp gưl ủy, n’gâng kan ƀon lan n’hanh kônh wa ƀon lan an ndrel ty ndâk njêng thôn ƀon mhe đah ăp ndơ ƀư, gưl kan druh ndăm n’hanh đah soan mom, săk soan bah nơm tâm nău djôt dơn râng ăp nău jêr, nău mhe. Ăp nău kan đăp mpăn dơi ntrôl dăng n’hanh ăp trong rƀŏng tât kônh wa gay n’hâm ƀư ndrel kônh wa ơm tât thôn ƀon mhe”.

Rbăn ndơ ƀư, gưl kan druh ndăm rƀŏng tât ăp nkual jêr jŏt

Ndrel đah ăp nău ƀư đăp mpăn, druh ndăm Dak Lak lah êng, druh ndăm ăp rnoi mpôl đêt nkual Tây Nguyên lah nsum geh âk nău kan rƀŏng tât ăp nkual jêr jŏt, nkual n’har bri. Ta Lâm Đồng, bôl geh nkual kâng n’har bri yơn âk năm bah năp, nău ƀư nkoch trêng, mât uĕh nău kan bah druh ndăm tâm nău mât tong n’har bri n’gâng ntăm dơi ƀư gay ntĭm nti nău way ơm an đoàn viên druh ndăm. Nô Ndu Ha Biên, Groi bí thư thư N’gor đoàn Lâm Đồng an gĭt, tâm âk năm bah năp, druh ndăm n’gor Lâm Đồng na nao tâm rgop đah n’gor Dak Lak ƀư bôk nău kan “Khay 3 n’har bri” rƀŏng tât ƀon lan, tahen dôl rêh n’hanh ƀư tĭng nău kan ntŭk n’har bri neh dak.

N’gor đoàn Lâm Đồng tâm rgop đah N’gor đoàn Dak Lak mbơh ƀư tĭng ăp nău kan khlay an ƀon lan ta xă n’har bri bah Dak Lak kơt trong mpoh ang  trong n’har bri, an prăk kơl hăn nti jêh nĕ an ndơ an nuĭh ƀon lan nkual n’har bri. Nkre, rgŏ jă tâm pă, ntrŭt nsôr ăp băl đoàn viên, druh ndăm nkual n’har bri nsrôih nkoch trêng, rgŏ jă an druh ndăm bah n’gor Dak Lak, n’gor Lâm Đồng kơt lĕ nkual Tây Nguyên mpeh nău way ơm bah rơh druh ndăm n’hanh mât uĕh tay nău kan bah rơh druh  ndăm tâm nău mât ƀư tơm n’har bri neh dak.