Ƀon Krông Hra, xã Yang Bắc tă lah ngoai tâm ăp ƀon lan ach o ngăn bah nkuăl Đăk Pơ. Kônh wa rnoi Bahnar ta aơ knŭng tăm tơm gleh nar, nau geh mô âk. Yơn lah, ntơm năm 2018, geh nau ntĭm nti bah n’gâng kan ndrel ăp đảng viên tâm ƀon, âk rnăk hŏ ntrơn jêng tăm tơm tao đah rnoh âk. Knŭng jêh 6 năm, nau rêh bah kônh wa geh nau rgâl. Nô Đinh Phới, du hê nŭih tâm ƀon Krông Hra nkoch:

             ‘Neh nar lơn mô jêng ri ma kônh wa geh n’gâng kan ntĭm tăm tao gay ma n’hao nau geh dơi ndrel prăk. Kônh wa rnoi Bahnar ta aơ rnôk aơ ăp nŭih kŏ geh tao, koh tao tâm âk năm mơ dĭng kâp tăm tay, nau geh dơi ri kŏ đăp mpăn. Gay ân neh jêng lơn ri kônh wa kŏ kơt tĭng nti nau blau tâm nau mât chăm, poh phân, âk ha tao kŏ geh bar pe rhiăng rkeh prăk. Rnăk hên kŏ tăm tao ndrel rnôk aơ geh âk rhiăng rkeh prăk đŏng”.

            Ăp nar bôk năp râng tăm tao, nô Phới ndrel ma kônh wa ƀon Krông Hra hôm vĭ vĕ ngăn, mô tŏng nau kan gay ma tuch tăm. Yơn lah, geh nau kơl an, ntĭm mbơh bah đảng viên tâm ƀon, kônh wa ăp nhoat geh nau dơi, mât chăm tơm tao ueh lơn. Yuh Đinh Thị Mai, Kruanh rmôt bu ur ƀon Krông Hra mbơh:

            ‘Gâp geh pă ƀư nau kan kơl an nŭih gay ma kơl an ân nŭih ach o kơl an ƀon lan rklaih ach o, pă nau ƀư ăp nkô̆ nau gay ma râng ndâk njêng ƀon lan mhe. Gâp bonh đă ƀon lan mât chăm tơm tăm mpa rong ân tâm di, bonh đă oh nur mât ntŭk ntu, răk kloh ntŭk ntu ăp nar gay ma ƀư nau kan kloh ueh”.

            Êp nê, đah nkô̆ nau “cán bộ đảng viên hăn lor, ƀon lan hăn tĭng ba kơi” Chi bộ ƀon Krông Hra kŏ lah nau ueh mpeh nau rƀŭn rgum tâm ƀon. Wa Đinh Văn Việt, Groi Bí thư chi bộ ƀon Krông Hra mbơh:

            ‘Chi bộ ƀư jêh nau kan chính trị, geh nau nâp nâl tâm rơh rƀŭn ueh, ƀư ueh nau tâm rnglăp, ƀư kỷ luật ân ueh, ndrel geh rmôt cán bộ, đảng viên ueh. Lŏ ƀư ueh nau kan bonh đă ƀon lan ƀư ueh ăp nau ntrŭnh, nau rđau, nau đă bah Đảng leo tâm nau tâm nau rêh gay ma hun hao văng sa kŏ kơt lah ndâk njêng ƀon lan mhe”.

            Rnôk aơ, Đảng bộ xã Yang Bắc geh 13 chi bộ, 205 đảng viên, tâm nê geh 8 chi bộ thôn, ƀon. Rnơm ƀư ueh nau kan bonh đă, ntĭm mbơh ndrel “kuăn ty ntĭm kan” bah rmôt cán bộ, đảng viên, nŭih geh bu rnơm, ăp năm êp aơ, nŭih ƀon lan tâm thôn ƀon hŏ blau dŏng nau kan khoa học tâm nau kan tuch tăm, ntrơn rgâl nau kan tuch tăm ân tâm di ân nau săk tam ueh lơn. Lôch năm 2023, rnoh rnăk ach o bah xã Yang Bắc huch hôm 14,4%, nau geh du hê bôk nŭih geh rlau 35,5 rkeh/năm. Wa Phạm Thị Thuý, Bí thư Đảng uỷ xã Yang Bắc lah rjăp:

            ‘Nau ƀư nau kan chi bộ 4 ueh ri Đảng uỷ hŏ ƀư tă bah bôk năp. Rnôk ntrŭnh ƀư ăp nau kan ndâk njêng văng sa rêh jêng, neh dak rnă njrăng, ndâk njêng trong kan chính trị, ndâk njêng Đảng ri Đảng bộ ntrŭnh ƀư ân ăp chi bộ, jă ăp gưl kan uỷ tât gay ma rgum ntĭm mbơh nau kan rƀŭn rgum tĭng nkô̆, nau nchrăp ntrŭnh ƀư mêt uănh, ntĭm mbơh nau kan dŭt n’hâm ueh n’hêl. Tât rnôk aơ ăp chi bộ hŏ đăng kí mpeh Đảng uỷ xã, nsôih ƀư dơi chi bộ 4 ueh tâm năm aơ”./.