Khay 7 mhe rlau, ta Bình Định, rmôt kan bah Groi Thủ tướng Chính phủ Trần Lưu Quang pah kan sŏng ndrel trực tuyến đah 19 n’gor, nkual ƀon têh nkuăl Bắc Trung bộ, Duyên hải Miền Trung ndrel nkuăl Tây Nguyên mpeh nau ƀư ăp Bôk nau kan bah neh dak.

Lvang năm 2021-2025, Trung ương jao tơm prăk ntuh kơl hun hao rlau 39 rbăn rmen ân ăp nkuăl Bắc Trung bộ, duyên hải miền Trung ndrel Tây Nguyên gay ƀư 3 nau kan bah neh dak. Rnôk aơ, 17/19 nkuăl hŏ geh dŏng tơm prăk gay ƀư ăp nau kan bah neh dak. Tâm nê, nkuăl ƀon têh Đà Nẵng hŏ ƀư pă 93% rnoh prăk bah n’gor. Ăp n’gor Nghệ An, Quảng Nam, Bình Định, Khánh Hoà, Lâm Đồng tâm rmôt daka bôk mpeh rnoh sŏk dŏng prăk rlau 30%.

Ntoh nau tâm nar rƀŭn, Groi Thủ tướng Chính phủ Trần Lưu Quang lah rjăp, nau kan neh dak rƀŏng tât kơl an ƀon lan, nkuăl ƀon lan rnoi mpôl đê̆ ndrel rnăk vâl dôl mâp nau jêr lah du nau kan ueh tâm di. Rđil năm 2022, ăp n’gâng kan ndrle nkuăl hŏ geh âk nau rklaih mpeh nau kan. Yơn lah, tâm du đê̆ nkuăl, nau pă tơm prăk ân lĕ 3 nau kan bah neh dak knŭng geh 8%. Tâm rnôk hôm jêr mpeh mông nar, kŏ kơt lah nau kơl hôm nkol, Groi Thủ tướng Chính phủ Trần Lưu Quang đă ăp nkuăl ân geh ntoh nau kan, nsôih, nchrăp ndrel rjăp lơn tâm nau ƀư nau kan bah neh dak:

“Mpeh Trung ương phung hên nau nau kan bah năp ndrel mra lŏ ntrơn rgâl, ntĭm ngăch ngăn ăp nau ƀư ma ăp dồng chí hôm nkol. Mpeh ntrŭnh ƀư nau kan, moh nau nkol ri ôp trung ương ndrel ôp n’gâng kan. Gâp kŏ đă ăp n’gâng kan, ntŭk kan, 3 ntŭk kan ƀư tơm tâm nthoi ueh lơn ma ăp nkuăl ndrel năn djăt ăp nau rgop hôm nkol”.

Tĭng n’gâng kan nchrăp kan ndrel ntuh kơl, rnôk aơ ăp bôk nau kan bah neh dak hôm jêr, kol tâm nau mât, ƀư. Ngăn lah ăp nau kan ân ƀư, nau ntrŭnh tơm prăk đôr lor jêh rnôk ƀư nau nchrăp tơm prăk gleh ngăn tơm prăk Ngih dak lvang năm 2021-2025 bah nkuăl, ndri ma pă tơm prặk ƀư nau kan geh jao tĭng năm ndrel pă tĭng nau kan n’hêl ƀư ân nkuăl jêr tâm nau năl nkô̆ nau kan bah lvang năm ndrel ntrơn leo tơm prăk bah ăp nkô̆ nau tâm bôk nau kan gay ma tâm ban đah nau dôl geh. Kruanh n’gâng kan, tơm Văn phòng Chính phủ Trần Văn Sơn mbơh:

‘Pe bôk nau kan bah neh dak rnôk aơ Chính phủ ntrŭnh 26 rmôt kan tĭng ăp nŭih kan bah Chính phủ dâk bôk tât ăp n’gor. Mhe nơh Chính phủ ntrŭnh nau, du khay jur tât gay ma doh rklaih nau jêr. Yor rnôk aơ tât tâm nkuăl saơ hôm âk nau jêr nkol ngăn ri ân geh doh rklaih, ma ân geh doh rklaih tă bah ăp nkuăl. Gay ma lŏ ntrŭt dăng ngăch nau pă tơm prăk ƀư ăp nau kan bah neh dak ndrel ƀư ân săk tam bôk nau kan nau ntrŭnh mrô 100 bah rơh rƀŭn tal 5 Quốc hội gưl 15, Thủ tướng Chính phủ đă, ăp n’gâng kan, nkuăl tĭng nau kan bah nơm, nau kan geh jao ndal tâm rgop ma n’gâng kan tơm prăk ndrel ăp n’gâng kan, ntŭk kan tơm nau kan gay ma mbơh rnoh tơm prăk ƀư nau kan năm 2024-2025 ân ăp ntŭk kan, n’gâng kan Trung ương ndrel nkuăl tĭng nau ntrŭnh ta mrô 38 năm 2023 bah Chính phủ”.

Uỷ ban Dân tộc ndal ƀư tơm tâm rgop đah ăp n’gâng kan, ntŭk kan ƀư tơm nau kan, rmôt kan gay ma kơp uănh rgum Bôk nau kan bah neh dak hun hao văng sa, rêh jêng nkual rnoi mpôl đê̆ ndrel gôl yôk lvang rơh 1, ndâk nau ntrŭnh mbơh gay ma rgâl nkô̆ nau kan nau ntrŭnh ân ƀư Bôk nau kan geh nau ntrŭnh, tâm di ntrong kan pháp luật mpeh ntuh kơl mrô, mbơh Thủ tướng Chính phủ ndrel nkre N’gâng kan nchrăp kan ndrel ntuh kơl tâm khay 8 năm 2023.

N’gâng kan tơm prăk ndal ƀư tơm, tâm rgop nsum đah n’gâng kan, ntŭk kan geh tât ƀư jhe nau nkra, rno ăp nau ntrŭnh mpeh tơm prăk ƀư nau kan gay ma ƀư ăp nau kan bah neh dak./.