Bơi 6 năm ƀư tĭng bôk nău kan “Du xă du ndơ” kuăl lah bôk nău kan OCOP, ăp ndơ ntĭt mpơl êng nkual neh bah n’gor Dak Lak lĕ mbrơi mbrơi ndâk njêng dơi moh êng n’hanh geh ntŭk dâk ta ntŭk tăch. Âk ndơ OCOP tăch n’gluh jêng “đại sứ” djôt nău mbơh “Ndơ lŏ mir uĕh kah” bah dak Lak tât đah nuĭh dŏng lam ntŭr neh.

Âk ndơ OCOP bah dak lak lĕ mĭn lah dơi uĕh kah, nsing nơm mô knŭng đah nuĭh dŏng tâm dak ma hôm hăn lam ntŭr neh. Ntoh lư kơt ndơ OCOP geh 5 sao grăp mắc ca Dak Lak gưl prêh bah Công ty Cổ phần Damaca Nguyên Phương, nkuăl Krông Năng. Rlet rlău âk jêr jŏt bôk năp, đah nău nsrôih bah nơm, năm 2021, ndơ grăp mắc ca Dak Lak gưl prêh bah công ty lĕ geh kơp dơn OCOP 4 sao. Jêh 3 năm, rlet rlău âk rwăch uănh lah rhăt jăp, aƀaơ ndơ dơi uănh lah tay đah rnoh điểm geh 100/100 điểm, n’hanh jêng ndơ geh 5 sao bah n’gor. Tĭng wa Nguyễn Thị Thu Phương, Giám đốc Công ty Cổ phần Damaca Nguyên Phương, bah rnôk ndơ geh kơp dơn OCOP 4 sao, ntŭk tăch dơi tăch pơk hvi.

Ndơ bah Damaca Nguyên Phương lĕ geh măt ta 47 n’gor nkual ƀon têh bah Nhật Bản. Đah ntŭk tăch Hàn Quốc dơi ndơ̆ âk ndơ mhe bôk năp. Aƀaơ mpôl hên dôl pah kan đah du đêt ntŭk tăch dơi geh kơt ntŭk tăch Trung Quốc. Du đêt ntŭk tăch ta ăp dak Ả Rập ri mpŏng tâm năm tât mbra dơi dơ du đêt nău mbơh uĕh bah ntŭk tăch.

Ngoăy tâm âk ndơ tâm sam ƀŭt ndơ geh 5 sao bah Dak Lak râng uănh lah ndơ OCOP gưl trung ương êp tât, ndơ Cà phê mpĭk Kiên Cường bah công ty TNHH MTV Kiên Cường, nkual ƀon têh Buôn Ma Thuột, n’gor Dak Lak lĕ rlet rlău na nao lôch jêh bah nơm. Ndơ aơ lĕ dơi an kơp dơn ndơ OCOP 4 sao bah năm 2021. Đah joi nar lơ âk bah nuĭh dŏng ri doanh nghiệp an na nao rgâl mhe n’hao prêh gay tâm di nău đă ntŭk tăch tâm dak n’hanh tăch n’gluh. Wa Hoàng Mạnh Cường, nuĭh tơm doanh nghiệp an gĭt ndơ cà phê mpĭk Kiên Cường lĕ tăch an ăp dak Nhật Bản, Hàn Quốc, Philippines n’hanh Australia.

Lơ nar he lơ ƀư uĕh tay gay dơi saơ nău tơm, ntŭk gŭ n’hanh ntŭk dâk bah he ta ntŭk tăch. Tal 2, dŏng nar lơ âk nuĭh uănh tât uĕh kah tă bah ăp kơp dơn. Kơp dơn ndơ OCOP aƀaơ ƀư kơt lah đŏng dŭt na nê̆ đah ntŭk tăch, khân pơng ton n’hanh an ƀư dŭt di na nê̆ n’hanh rnôk bu lĕ dơi kơp dơn. Bah nĕ jêng du ntŭk tăch geh âk nău uĕh lơn.

 Dak Lak aƀaơ geh 237 ndơ OCOP geh bah 3-4 sao, 2 ndơ geh 5 sao. Tĭng wa Nguyễn Hoài Dương, Giám đốc N’gâng kan tuch tăm mât rong n’hanh hun hao ƀon lan n’gor, aơ lah rnoh hôm e đêt đah 1 ntŭk geh âk nău dơh mpeh lŏ mir, thôn ƀon kơt Dak Lak. Gay mât uĕh lơn tay ndơ geh, nău dơh aơ, năm tât, N’gâng kan tuch tăm mât rong n’hanh hun hao ƀon lan mbra tâm rgop đah ăp nău kan geh tât ntop kơl ăp ndơ OCOP n’hao prêh uĕh kah ndơ lĕ geh, kơt hun hao mhe tĭng tròng bah mât tăm, nkret njêng n’hanh tăch, nchrŏng trong geh moh êng ndơ OCOP gưl ngih dak.

N’gâng kan tuch tăm geh bôk nău kan, trong mkra, trong nchrăp gay ndrel đah ăp ntŭk ntop kơl ăp nkual tăm rgum, ƀư tay nkra njêng tĭng trong tâm di kơp dơn, geh tu tơm nkra njêng tât đăp mpăn, mât njrăng ntŭk ntô gŭ âm, tâm di ăp nău đă rhăt jăp bah ăp dak kơt Nhật Bản mô lah Châu Âu.

Dơi saơ ăp ndơ OCOP Dak Lak lĕ nchrăp tròng ndơ̆ ndơ lŏ mir ƀon lan bah “N’glău ƀon” hăn “dak lêng têh”. Dak Lak mpŏng ăp ndơ têh âk bah n’gor kơt: Cà phê, tiêu, ca cao, ba phe, mắc ca... rnôk geh ndơ OCOP 5 sao dơi dŏng uĕh nău geh bah ăp tâm ton tăch rgâl dah rŏng rơh mhe ma Việt Nam dôl lah dak gay gĭt tât n’hanh tăch ta ntŭk tăch lam ntŭr neh./.