Mhe aơ, Mpôl uănh lah, dăp gưl ndơ OCOP n’gor Dak Lak lĕ mbơh săk 25 ndơ geh tâm di ndơ OCOP 3 sao, 4 sao gưl n’gor tâm năm 2022 mpeh tâm bôk nău kan du xă du ndơ lvang 2021-2025, n’hao dĭng lĕ ndơ OCOP ta ntŭk aơ hao 143 ndơ.

Tâm rnoh 25 ndơ OCOP mhe dơi kơp dơn rơh aơ 7 ndơ dăp gưl OCOP 4 sao n’hanh 18 gưl 3 sao. Ăp ndơ dơi kơp dơn tâm di OCOP mbra dơi UBND n’gor Dak Lak pă an sam ƀŭt kơp dơn, dơi dŏng ntô lĭr kơp dơn ndơ OCOP Việt Nam n’hanh gưl sao in ta ntô lĭr ndơ tĭng nău ntrŭnh. Jêh kơp dơn dăp gưl geh rnoh khlay tâm 3 năm.

Gay n’hao rnoh khlay ndơ lŏ mir ta ntŭk, năm tât, n’gor Dak Lak ntop kơl tay ăp nuĭh tơm OCOP n’hao uĕh nâp, ntop kơl ăp doanh nghiệp, hợp tác xã boăt nthoi tăch dŏng, joi nuĭh kan ndrel tăch rgâl, pơk hvi ntŭk tăch. Wa Huỳnh Ngọc Dương, Groi Giám đốc N’gâng kan Công thương n’gor Dak Lak an gĭt:

“Ăp ndơ râng dơi dơi geh nău kơl ăp bôk nău kan ntop kơl bah n’gor. Tal 2 lah ăp ndơ di OCOP 3 sao tât 4 sao mpôl hên geh ăp sam ƀŭt tâm nchră an ăp trong bah ăp n’gâng kan Công thương ăp ntŭk ta lam dak n’hanh ăp ngih pah kan ntrŭt ngăch tăch rgâl ngih dak bah n’gâng kan công thương nĕ ta nău an boăt nthoi đah trong tâm pă n’hanh ăp ntŭk tăch ndơ ta ntŭk gay ntrôl dăng tăch ndơ”.

Nar 14/8 mhe rlău, Ntŭk kan tâm pă bôk nău kan thôn ƀon mhe n’gor Dak Lak lĕ ƀư rƀŭn nchră nkoch trêng, mbơh ƀư bôk nău kan du xă du ndơ năm 2023.

Rƀŭn nchră uănh lah ăp ndơ OCOP lĕ ngăch mĭn lah ntŭk gŭ dơi ntŭk tăch wơt dơn uĕh, kơl nuĭh ƀon lan pơk hvi ntrong kan nkra njêng, n’hao khlay ndơ, bah nĕ rgop rgâl wăng sa, n’hao nău geh, nău rêh bah nuĭh ƀon lan n’hanh ƀư tĭng săk rnglăy rmôt rnoh ndơ ƀư “wăng sa n’hanh rmôt kan nkra njêng” tâm kôp rnoh ndơ ƀư lam dak mpeh xă thôn ƀon mhe.

Bah mhe săk rnglăy dơi geh, bôk nău kan OCOP ta Dak Lak hôm e du đêt mô hŏ dơi ƀư kơt: ăp trong mkra ntop kơl đah nuĭh tơm bah ăp ndơ OCOP hôm e đêt, têh âk ndơ OCOP mô hŏ âk, trong kan ntrŭt ngăch tăch rgâl hôm e jêt chrai, mô tâm ban, mô  dơi ntoh lư, uĕh ngăn gay ndâk njêng ủup, rnoh khlay tăch rgâl.

Ta rƀŭn nchră ăp đại biểu lĕ dơi mbơh mpeh bôk nău “Du xă du ntil ndơ, nău blău ơm tâm dak n’hanh dak bah dih mpeh hun hao wăng sa nkual thôn ƀon”, “Ăp nău an rhoăt jêh 5 năm mbơh ƀư  bôk nău kan OCOP ta Dak Lak”, “Săk bôk nău kan OCOP. Nău kan bah trong chính trị mbơh ƀư bôk nău kan OCOP. Rhoăt nău blău ơm, trong mkra khlay tâm lvang 2023-2025”.

Ntoh ngơi ta rƀŭn nchră, wa Nguyễn Thiên Văn, Groi Kruanh UBND n’gor Dak Lak lah rjăp, đah trong way ƀư “Uĕh nâp ƀư jêng moh ndơ”, ndrel đah nău nsrôih bah tĭng nuĭh tơm, dăn đă ăp n’gâng kan, nău kan, n’gor uănh mĭn lơn tay ăp trong mkra ntop kơl đah nuĭh tơm bah ăp ndơ OCOP ngăn lah n’hao mpeh dơi mât uănh, nkret njêng n’hanh tăch rgâl ndơ.

“Nău lăp bah gưl ủy n’gâng kan ƀon lan ta ntop kơl an ăp nuĭh tơm kơt hun hao ăp ndơ nsĭt jâng nsan bah n’gor nơm, geh âk trong hun hao ndơ n’hanh hun hao ntŭk tăch an ndơ geh ntŭk dâk nta an âk nău dơi hun hao wăng sa rêh jêng an nuĭh ƀon lan mkra nău kan, nău geh prăk”.

Groi kruanh UBND n’gor Dak Lak đă ngih pah kan dơi kan an rgum ntĭm, ntop kơl an ăp ndơ lĕ dăn râng bôk nău kan OCOP bah ăp nkuăl, nkual têh, nkual ƀon têh tâm năm 2023 tĭng nău ntrŭnh mhe bah Kôp rnoh ndơ ƀư OCOP lam dak; ndăn ƀư ăp jrô tiăr nti an cán bộ mât uănh bôk nău kan OCOP ăp gưl n’hanh ăp nuĭh tơm râng bôk nău kan mpeh nkra njêng, ndâk ƀư trong nchrăp tăch rgâl, ndâk ƀư moh êng ndơ, marketting n’hanh mpla nsơ, hun hao ndơ an ăp ntŭk nkra njêng râng Bôk nău kan OCOP năm 2023; n’hao trong kan mbơh nău mhe, nkoch trêng mpeh bôk nău kan OCOP.