Tâm mpông jay “Tâm rnglăp tahen-ƀon lan” mhe dơi ƀư an, wa Y Huê Êban ta ƀon Niêng 1, xă Ea Nuôl, nkuăl Buôn Đôn răm rhơn nkoch, bah nar geh jay mhe têh uĕh, rnăk wâl mô hôm rvê nău nching duh, nching mih. Săk soan bah wa dơi rgâl, dơi ƀư âk nău kan, rnăk wâl geh tay prăk. Wa kah gĭt ăp nô tahen lĕ ƀư jay an rnăk wâl:

Bah năp đaơ jay gŭ mih ri truh, prăng ri duh, aƀaơ ƀon lan uănh tât kơl ƀư jay têh uĕh ri dŭt rhơn. Gâp mbra nsrôih ƀư sa gay hun hao, ndrel đah kônh wa tâm ƀon rgop đăp mpăn rnă njrăng.

Tĭng wa Y Kim Êban, Kruanh ƀon Niêng 1, tahen ma wa Y Huê nkah tât lah cán bộ, tahen ntŭk kan K864 (Cục Quân khí, Tổng cục Kỹ thuật). Aơ lah ntŭk kan njêng oh nô đah Ƀon Niêng 1 bah âk năm aơ. Nău ntop kơl ƀư jay an rnăk ach o lĕ ntop tay nuih n’hâm gay ăp rnăk nsrôih hao.

Tâm rnglăp tahen ƀon lan khân pơng dŭt n’hâm, tât chop khâl tâm pă ăp nău blău ơm gay kônh wa hun hao wăng sa. Ƀon lan mpôl hên dŭt rhơn n’hanh răm. Lơn lah ăp rnăk ach o bu nsrôih hun hao wăng sa gay bah kơi aơ rnoh rnăk ach o nar lơ hŭch.

Lah ntŭk kan njêng oh nô đah Ƀon M’riu, xă Cư Huê, nkuăl Ea Kar, n’gor Dak Lak, 20 năm bah năp, công ty Điện lực Dak Lak lĕ rgop mô jêt rgâl muh măt thôn ƀon ta aơ. Bah du ƀon ach o, sŏk dơn ntop kơl phe tâm yan êp kăch rek, ri aƀaơ, rnoh rnăk ach o knŭng hôm 10%. Âk rnăk tâm ƀon lĕ ndâk ƀư jay, rwăt ndeh công nông, măy tŏ dak rhŏ an tuch tăm. Tĭng wa Trần Văn Thuận, Giám đốc Công ty Điện lực Dak Lak, tĭng trong nchrăp njêng oh nô ăp năm, Đảng ủy công ty lĕ tâm pă nău kan đah tĭng ban, nău kan, nsum mpôl, chi bộ tâm rgop đah ăp ntŭk kan njêng oh nô gay mbơh ƀư săk rnglăy bôk nău kan aơ.

Tĭng bôk nău kan njêng oh nô ri ntŭk kan lĕ ndơ̆ ăp trong nchrăp nău kan ăp năm ntop kơl đăp mpăn nău rêh jêng tât ăp rnăk dơi kơl, rnăk jêr jŏt gay kơl ăp rnăk hun hao wăng sa. Đah ƀon M’riu âk jêr jŏt aƀaơ ntŭk kan lĕ tĭng n’hanh n’gluh an ăp bôk nău ntop kơl ngăn ngên đah nuĭh ƀon lan kơt nău ndâk njêng ƀon văn hoá.

Ƀư tĭng bôk nău kan bah n’gor uỷ Dak Lak mpeh trong kan njêng oh nô đah ăp thôn ƀon rnoi mpôl đêt, tât aƀaơ, Dak Lak geh bơi 200 ngih pah kan, ntŭk kan, doanh nghiệp gưl n’gor njêng oh nô đah thôn ƀon. Wa Nguyên Đình Trung, uỷ viên Trung ương Đảng, Bí thư N’gor uỷ Dak Lak an gĭt, đah nău ntop kơl ngăn ngên bah ăp ntŭk kan njêng oh nô, nău rêh nuih n’hâm drăp ndơ bah ƀon lan rnoi mpôl đêt dơi njêng oh nô lĕ rgâl âk. Năm bah năp, N’gor ủy Dak Lak lĕ ntrôl dăng ƀư tĭng trong kan njêng oh nô đah ƀon lan rnoi mpôl đêt gay rgop jut jăng ach o, nâp nâl tâm rnglăp rnoi nuĭh, nsrôih ndâk njêng Dak Lak nar lơ ndrŏng uĕh-gĭt blău-nău uĕh ơm.

Ăp ngih pah kan ntŭk kan njêng oh nô đah ăp thôn ƀon dơi lah ƀư tĭng lĕ đah nău kan, geh âk săk rnglăy têh n’hanh dơi geh nău đă, nău rƀŏng n’gluh an. Nău rêh bah ƀon lan ta nkual jru ngai geh âk nău rgâl na nê̆ n’hanh nău nsum ty, nău tâm rnglăp đah ăp rnoi nuĭh ndrel ndâk njêng n’gor Dak Lak ndrŏng uĕh.

Dơi saơ, ăp nău ƀư geh nkô̆, hăn ndrel đah nău ngăn ta bah dâng, trong kan njêng oh nô đah thôn ƀon ta Dak Lak lĕ nsĭt tay săk rnglăy uĕh, rgop khlay hun hao wăng sa-rêh jêng, ndâk njêng nâp nâl trong chính trị bah dâng, đăp mpăn rnă njrăng chính trị, đăp mpăn nău rêh jêng n’hanh rhăt jăp tay nău tâm rnglăp đah ăp rnoi nuĭh./.