Ăp năm let bah năp, bôl rnoh neh tuch tăm mô âk, yơn yor mô gĭt trong ƀư sa, mir cà phê bah rnăk sât blak, săk geh mô âk jêng nău rêh rnăk wa Ha Sắc, ta thôn 4, xă Rô Men, nkuăl Đam Rông, n’gor Lâm Đồng geh tâm nău jêr jŏt. Bah nar dơi geh Nghị quyết 30a mpeh bôk nău kan n’hŭch ach o ngăch n’hanh nâp nâl bah Chính phủ, rnăk wa dơi tiăr nti kỹ thuật tăm, ntop kơl rgâl ntil tơm tăm, phân poh dak si, trong ndôp rgâl cà phê ntil mhe... săk geh tơm tăm mô rlu hao ăp năm. Êng tâm yan cà phê mhe rlău, rnăk wa pĕ geh bơi 10 tấn cà phê rlăi, nsĭt geh rlău 200 rkeh prăk. Rnăk wa mô knŭng rklaih ach o ma hôm hao jêng rnăk geh wăng sa âk. Wa Ha Sắc, an gĭt:

“Năm bah năp, knơm geh nău kơl uănh mĭn bah n’gâng kan ƀon lan ta ntŭk mpeh rgâl ntil tơm tăm, mpa rong, rnăk wâl lĕ janh ndôp rgâl mir cà phê, tăm tay cà phê ntil mhe, ba ntil mhe săk geh âk... Bah nĕ wăng sa rnăk wâl ntơm dơi đăp mpăn, geh dơi mât rong oh kon hăn nti. Lah uĕh đảng n’hanh ngih dak lĕ uănh mĭn nta an kônh wa rnoi mpôl đêt nkual jru ngai kơt mpôl hên”.

Ndrel đah prăk rlău 500 rmen bah bôk nău kan n’hŭch ach o ngăch n’hanh nâp nâl, Đam Rông dơi kơl an ntuh kơl hăng rhiăng rmen prăk bah ăp bôk nău kan rƀŏng tĭng lam dak, bôk nău kan hun hao nkual rnoi mpôl đêt... Tâm nĕ, ntop kơl nkra njêng, nta nău kan, n’hao nău geh an nuĭh ƀon lan n’hanh ntuh kơl ndâk ƀư ntung trong rhŏ an hun hao lŏ mir ƀon lan.

Tĭng wa Dương Tất Phong, Kruanh jrô kan lao động, Thương binh n’hanh Xã hội nkuăl Đam Rông, ndrel đah nău ntop kơl nkra njêng an nuĭh ƀon lan, nkuăl hôm uănh khlay mkra jay gŭ, ntop kơl wăng sa, prăk manh, pă thẻ bảo hiểm y tế, pơk jrô ntĭm nău kan, mkra joi nău kan an ăp rnăk tâm rnăk ach o n’hanh êp ach o. Bah nĕ, rnoh rnăk ach o ta ntŭk lĕ hŭch bah rlău 50% tâm năm 2010 jŭr hôm 6,9% ta dŭt năm 2022, n’hanh aƀaơ kơp tĭng rnoh an ƀư mhe âk trong lah 19,3%.

“Năm mhe rlău, Đảng n’hanh Ngih dak lĕ uănh mĭn dŭt âk mpeh trong kan n’hŭch ach o, ntuh kơl ndoh ndơ n’hanh joi nău rêh nâp nâl an nuĭh ƀon lan hun hao wăng sa. ndrel đah nĕ, đah ăp nuĭh, rgŏ jă ăp tơm prăk kon nuĭh rgop ƀư jay an nuĭh ach o; ntuh kơl rwăt năp ndoh ndơ n’hanh ntop kơl joi nău rêh an tĭng nkual, tĭng ntŭk n’hanh tĭng nuĭh ach o. Nău ŭch khân pơng moh ndơ ri nta an khân pơng hun hao wăng sa, hao rklaih luh ach o”.

Mô knŭng trong kan n’hŭch ach o nâp nâl dơi ƀư tĭng geh săk rnglăy uĕh Đam Rông hôm dơi uănh ăp nkual tuch tăm lŏ mir đah âk ntil tơm tăm tâm di nsĭt tay wăng sa âk, kơt mắc ca, sầu riêng, prit laba, tơm ka yâu mât ndrŭng, ka dak nđik, biăp-nkao ăp ntil... Tâm nĕ, geh 840 ha rnoh neh nkra njêng lŏ mir tĭng trong công nghệ mhe. Tĭng wa Liêng Hót Ha Hai, Groi Kruanh UBND nkuăl Đam Rông, wăng sa hun hao ri ntung trong ndoh ndơ mpeh điện, trong hăn, ngih dak si, ngih sam ƀŭt... dơi ntuh kơl di. Nău rhơn ngăn lah nău wât bah nuĭh ƀon lan lĕ geh nău rgâl na nê̆. Ăp nău way ơm lĕ dơi jăng lơi, nău mĭn trong ƀư lĕ dơi rgâl mhe. Aơ lah njoăt ngăn khlay gay Đam Rông hun hao tay.

“Rnôk mhe ndâk njêng nkuăl, nău way ơm bah kônh wa  hôm e âk. Mbăn ngăn lah ăp nău way ơm kơt nkol nsông nsao, tâm gŭ êp dak mhe, gŭ sai ơm... ri aƀaơ lĕ rgâl âk. Aƀaơ kônh wa lĕ gĭt pah kan nkra njêng, tăm ka yâu mât ndrŭng, gĭt rgâl ntil tơm tăm êng geh khlay wăng sa âk. Kon sau dơi an hăn nti, but uănh sam ji ri geh ngih dak si, geh nai dak si tât jay. Mpôl hên saơ geh nău rgâl têh”.

Đam Rông lah nkuăl geh 65% ntŭk ƀon lan gŭ lah nuĭh rnoi mpôl đêt, tâm nĕ dŭt âk lah nuĭh K’ho. Ndrel đah hun hao wăng sa lŏ mir, Đam Rông hôm uănh khlay hun hao nău kan pâl nđaih rhŏ tĭng trong nsum mpôl, hăn ndrel đah nău uĕh ơm bah nuĭh ƀon lan ta ntŭk. Tĭng ăp săk rnglăy dơi geh, Đam Rông dôl rŭn soan nsrôih geh tâm di nkuăl thôn ƀon mhe tâm năm 2024.