Wa Ka Hằng lah ngoăy tâm âk ƀon lan ta thôn Đarahoa, xă Hiệp An, nkuăl Đức Trọng (Lâm Đồng) hôm e dơi geh prăk âk lơn năm e, knơm kơt dŏng lŏ mir công nghệ mhe an srih tăm biăt, nkao. Wa Ka Hằng an gĭt, ntŭk tăch biăp nkao tâm năm 2023 geh soan tăch đêt, tăch thuk, yơn cà phê lŏ dŭt khlay. Ntop tâm nĕ, knơm dơi săk geh âk n’hanh uĕh, jêng đah 3 sào biăp, nkao n’hanh cà phê, rnăk wâl hôm e geh bơi n’gul rmen prăk. Wa Ka Hằng, lah:

          Năm aơ, bôl wăng sa nsum lah jêr jŏt yơn nău rêh wăng sa bah nuĭh ƀon lan hôm e mât nău geh đăp mpăn lơn âk năm bah năp. Knơm nuĭh ƀon lan gơih nti, kơt dŏng khoa học kỹ thuật an srih tăm biăp, nkao tĭng sam ƀŭt nchăm ndơ gay đăp mpăn n’hanh hao nău geh. Aƀaơ ăp jay dơi ntuh kơl kloh uĕh, trong hăn lĕ rgâl bê tông da dê, nău rêh rgâl n’hanh hun hao dŭt âk nkôp đah bah năp.

Hiệp An geh 2.460 rnăk, tâm nĕ nuĭh ƀon lan rnoi mpôl đêt geh 37%. Lam xă geh bơi 2.500 ha neh lŏ mir, dŭt âk lah nkra njêng tĭng trong công nghệ mhe jêng an nsĭt geh rĭng ta du ntŭk neh tuch tăm geh 420 rkeh prăk/ha/năm. Aƀaơ lĕ geh 750 rnăk râng ăp ntrong kan tâm rgop nkra njêng n’hanh tăch ndơ lŏ mir. N’hao rnoh nău geh rĭng bôk nuĭh geh bơi 70 rkeh prăk/du hê/năm. Tât aƀaơ, rnoh rnăk ach o âk trong knŭng hôm 19 rnăk, geh 0,58%.

Tĭng wa K’Lèn, ta ƀon Klong, bah ntŭk rmôt nkra njêng, knŭng lah knơm tâm ba lŏ du yan du năm, nuĭh ƀon lan ntŭk aơ lĕ janh kơt dŏng rgâl mhe khoa học kỹ thuật an nkra njêng, rgâl tâm pleh tăm biăp, nkao ăp ntil geh rnoh khlay wăng sa âk. Knơm nĕ, nău rêh drăp ndơ n’hanh nuih n’hâm nuĭh ƀon lan lĕ dơi hao dŭt âk nkôp đah bah năp. Ăp jay nsrôih ƀư sa da dê, mô hôm mĭn kâp, nău kơl an bah ngih dak kơt bah năp đaơ. Wa saơ hun hao, nău wât n’hanh nău kan đah nsum mpôl, đah ƀon lan nar lơ dơi mât uĕh. Nău lăp ndrel ty ndâk njêng thôn ƀon mhe n’hao prêh lĕ n’hanh dôl dơi rêng hvi têh tâm ăp rơh kơn nuĭh ƀon lan. Bu ranh ƀon K’Lèn răm rhơn nkoch:

Bah rnôk kơt dŏng ăp rgâl khoa học kỹ thuật an tuch tăm tĭng trong lŏ mir công nghệ mhe, wăng sa bah nuĭh ƀon lan lĕ hun hao lơn dŭt âk. Nău rêh wăng sa rgâl n’hanh hun hao, nău wât n’hanh lĕ đah nău kan ndrel ty đah n’gâng kan ƀon lan ndâk njêng ƀon tơm, ƀon lan ndrŏng uĕh lĕ dơi nuĭh ƀon lan tĭng dŭt n’hâm. Ăp nuĭh nchrăp mĭn gĭt ngăch ăp rgâl khoa học kỹ thuật gay kơt dŏng an tuch tăm, mĭn uănh ƀư sa, sâm geh hôm ŭch sâm ndrŏng lơn tay.

Wa Nguyễn Văn Khanh, Groi Bí thư rnâng kan Đảng ủy xă Hiệp An an gĭt, săk rnglăy aơ lĕ tâm rnôk rgâl nău wât khlay rgâl trong mĭn trong ƀư bah nuĭh ƀon lan rnoi đêt K’Ho lah êng, nuĭh ƀon lan tâm xă lah nsum. Yor blău kơt dŏng công nghệ mhe an nkra njêng lŏ mir, uănh khlay tuch tăm ndơ lŏ mir tĭng sam ƀŭt nchăm ndơ, jêng rnôk rdâng đah nu nău jêr jŏt nsum bah roh rŭch wăng sa n’hanh ntoh hao mhe, nău geh bah nuĭh ƀon lan ta Hiệp An hôm e mât đăp mpăn. Knơm nĕ, ăp rnoh an ƀư khlay ƀư tĭng nău kan hun hao wăng sa-rêh jêng, rnoh ndơ ƀư ndâk njêng thôn ƀon mhe n’hao prêh bah xă hôm e đăp mpăn tĭng trong nchrăp lĕ n’gluh an.

Ndâk njêng thôn ƀon mhe n’hao prêh ri xă lĕ mbơh ƀư n’hanh dơi geh nău tâm ban ŭch bah nuĭh ƀon lan dŭt âk. Nuĭh ƀon lan wât kloh nău aơ n’hanh nsrôih hun hao wăng sa rêh jêng, văn hóa nuih n’hâm hao. Bôl năm aơ wăng sa jêr jŏt yơn nău rêh wăng sa lĕ nuĭh ƀon lan hôm e dơi đăp mpăn, ntung trong dơi uănh lah hun hao dăng. Ăp rnoh ndơ ƀư ma ƀon lan n’gluh an tât aƀaơ lĕ dơi geh săk rnglăy. Tâm năm 2023 ri xă mbra dơi geh thôn ƀon mhe n’hao prêh.

Ndrel đah jâng nsan mpeh hun hao lŏ mir công nghệ mhe, xă Hiệp An hôm e dơi geh têh mpeh hun hao rhŏ an nău dŏng n’hanh tăch rgâl  geh tâm ntŭk tơm, lah mpông luh mpeh bah dâng hăn lăp nkual ƀon têh Đà Lạt, n’gor Lâm Đồng đah âk nkual, ntŭk uănh nsong pâl nđaih têh dôl ntơm jêng. Aơ lah ăp nău dơh gay xă Hiệp An rgâl mhe tay, mô rlu hun hao nâp nâl tĭng nar.