Aơ lah ntŭk kan gâl nkuăl bôk năp ta Dak Lak geh kơp dơn ƀư lôch nău kan rdâk njêng nkual ƀon lan mhe lvang năm 2016-2020. Nkuăl ƀon têh Buôn Ma Thuột geh 21 ntŭk kan hành chính đah 8 xã n’hanh 13 phường, rnoh nuĭh ƀon lan rlău 380 rbăn nuĭh, geh 40 mpôl rnoi gŭ rêh nsum.

Rnôk ma mbơh tơih bôk nău kan rdâk njêng nkual ƀon lan mhe, ntoh luh bâh lĕ rngôch ăp xã lĕ mô dơi âk. Yơn lah, đah nău tâm rnglăp, nsrôih rlet rlău nău jêr, nău ntul rlong, nău nsrôih bâh Đảng bộ, n’gâng kan n’hanh ƀon lan nkuăl ƀon têh Buôn Ma Thuột lĕ hun hao lĕ rngôch. Năm 2018, nkuăl ƀon têh lĕ geh 8/8 xã geh kruanh UBND n’gor Dak Lak ntrŭnh mbơh kơp dơn tâm di nău mpŏng nkual ƀon lan mhe, ơm lơn 2 năm đah nău nchrăp ngluh mbơh. Bâh rlău 10 năm ƀư tĭng bôk nău kan nkual ƀon lan mhe, nkuăl ƀon têh Buôn Ma Thuột lĕ geh âk nău rgâl mhe, lĕ rngôch trong hăn ta ntŭk nkuăl ƀon têh lĕ geh mât tŏng tâm di nău mpŏng nkual ƀon lan mhe, nkuăl ƀon têh Buôn Ma Thuột lĕ lah ntŭk bôk năp ta lam n’gor mpeh hun hao HTX, rmôt kan ndrel n’hanh hun hao ăp ntil ndơ OCOP. Nkuăl ƀon têh Buôn Ma Thuột nsrôih tât năm 2025, 8/8 xã geh tâm di nkual ƀon lan mhe n’hao prêh.