Phung hên tât nkuăl Lâm Hà di rnôk kônh wa ta aơ dôl ma ƀư Nar rgum tâm rnglăp-Rhơn nkuăl geh tŏng nau dơi ƀon lan mhe. Ngêt ndrănh yăng “Dà mprao”, wa Kră Jan Nhang-Bu ranh ƀon Dà mpao, xã Đạ Đờn, nkuăl Lâm Hà mbơh: Nê lah ăp ntil ndơ OCOP bah xã, geh leo mbơh ta nar rgum. Bu ranh nkoch moh săk ndrănh yăng “Dà Mpao” lah nau K’ho, moh nau Yuăn lah “Suối mơ”.

"Nŭih ƀon lan râng Nar rgum tâm rnglăp ăp rnoi mpôl rhơn ngăn, Đảng, Ngih dak jŏ jŏ ƀư nar rgum tâm rnglăp ăp rnoi kơt aơ, dĭng lĕ ăp nŭih ndrel râng ƀư ăp nau kan tâm nar rgum ueh ngăn ndrel rhơn ngăn. Nŭih ƀon lan ndrel ma rgop nar kan, rgop drăp ndơ, pă neh gay ma hun hao ƀon lan kơt: nkra trong, răk kloh ƀon lan, văng sa lơn ma hun hao. Kônh wa kŏ mât nau vay ăp rnoi ta aơ, geh tur chĭng, tanh njuh...Mpeh nau hun hao văng sa ri ăp nŭih rong ndrôk rpu, kik djar, tăm cà phê, pah lŏ mir. Rnơm nê ma nau rêh ƀon lan lơn ma n’hao prêh”.

Trong hăn ntơm bah nkuăl têh Đinh Văn tât ăp xã geh pơk hvi, rlet âk mir cà phê jêng tăm nsum ma sầu riêng ndrel ăp ntil tơm sa play. Tât nkuăl ƀon lan têh ueh, geh âk ngih ndrŏng, nŭih ƀon lan dôl ma răk nkao njok 2 đah trong ndrel vơt năm mhe. Wa K’Brối-Kruanh Uỷ ban MTTQ Việt Nam xã Liên Hà mbơh: Liên Hà lah moh du xã bah nkuăl Đan Phượng, nkuăl ƀon têh Hà Nội, rnôk kônh wa Lâm Đồng ndâk njêng văng sa mhe.

Lam xã geh rlau 2 rbăn rnăk ƀon lan, đah rnoh 9000 nŭih. Jêh geh kơp dơn “xã ƀon lan mhe” ntơm năm 2019, lam ƀon lan nsôih gay ma ndâk ƀon lan prêh mhe:

‘Jêh rnôk xã Liên Hà geh kơp dơn lah xã ƀon lan mhe ri geh nau ntrŭnh đah UBND xã đah Uỷ ban MTTQ, lŏ ƀư ueh nuih n’hâm tâm rnglăp nsôih tŏng dơi ăp nkô̆ nau prêh lơn bah ƀon lan mhe. Ăp năm, MTTQ rgum ăp rmôt kan nsum, ngăn lah ăp bu ranh ƀon, kruanh ƀon nŭih rnoi mpôl đê̆, ndrel n’hâm soan n’hao nau dơi ƀon lan mhe tâm ăp thôn ƀon, rƀŏng tât nau ndâk njêng ƀon lan mhe n’hao prêh”.

Tĭng nau mbơh bah UBND nkuăl Lâm Hà, n’gor Lâm Đồng, bah 35 năm ndâk njêng, hun hao ndrel 10 năm ntrŭnh ƀư Bôk nau kan ƀon lan mhe bah neh dak, nkuăl Lâm Hà hŏ geh ăp nhoat hun hao ăp ntil geh âk nau dơi, geh nau dơi ăp nau mhe tâm ăp nau kan. Tâm lvang năm 2015-2020, nau dơi hun hao văng sa ăp năm bah Lâm Hà geh 7,6%/năm. Êng năm 2022 rlau aơ, nau kan hun hao văng sa bah Lâm Hà geh nklăp 8,5%, nau geh du hê bôk nŭih geh bơi tât 57 rkeh. Ăp năm rlau aơ, rnoh tơm prăk geh rgum ndâk njêng ƀon lan mhe tâm lam nkuăl geh rlau 5.300 rmen. Tât rnôk aơ, ntŭk ntu gung trong geh kơl an ntuh kơl ăp ntil.

Đah ăp nau dơi, lơ 12/7/2022, Thủ tướng hŏ ntrŭnh nau ntrŭnh kơp dơn nkuăl Lâm Hà, n’gor Lâm Đồng geh tŏng nau dơi ƀon lan mhe. Lơ 19/10/2022, Kruanh dak ntrŭnh nau pă nkhôm Huân chương Lao động hạng Ba ân Đảng bộ, N’gâng kan ndrel ƀon lan nkuăl Lâm Hà hŏ geh nau dơi ngăn tâm nau kan tâm rlong “Lam dak nsum n’hâm ndâk njêng ƀon lan mhe”. Wa K’Tân, Groi Kruanh Uỷ ban MTTQ Việt Nam nkuăl Lâm Hà, n’gor Lâm Đồng lah rjăp, geh nau dơi nê, êp nau kơl an bah Đảng ndrel Ngih dak, ntoh n’hâm soan tâm rnglăp ăp rnoi mpôl bah lam nkuăl:

‘Mặt trận Tổ quốc Việt Nam nkuăl Lâm Hà geh nau dơi mêt uănh ăp nau kan, tâm rnglăp ăp kơn nŭih ƀon lan. Di rnôk lôch 35 năm njêng nkuăl Lâm Hà, nkuăl Lâm Hà, mhe aơ, nkuăl ƀư nau kơp dơn ƀon lan mhe. Ăp kơn ƀon lan ăp rnoi bah nkuăl geh nau rhơn ngăn. Tâm nê geh nau tâm rgop kơl an têh ngăn bah Mặt trận ăp gưl, tĭng ăp nau dơi. Êng tâm nê Uỷ ban MTTQ geh 10 nau dơi, 10 nkô̆ nau gay ma geh kơp dơn ƀon lan mhe, ƀon lan geh tŏng dơi, ƀon lan tĭng nau mhe, ndrel geh n’ăp ma nau mât chăm n’hâm soan bah ƀon lan”.

Năm mhe 2023 hŏ tât, kônh wa ăp rnoi mpôl nkuăl Lâm Hà, n’gor Lâm Đồng lŏ geh ntop tay nau rhơn mhe. Nê lah nau nsôih gay ma Đảng bộ, N’gâng kan ndrel ƀon lan ăp rnoi mpôl tâm nkuăl lŏ ƀư ueh nau vay ơm tâm rnglăp, nsum n’hâm, nsum soan nsôih ndâk njêng ƀon lan nkuăl Lâm Hà nar lơn ma têh ndrŏng./.