Năm bah năp, nkuăl n’har bri Buôn Đôn, n’gor Dak Lak lĕ âk trong pâl nđaih, tâm nĕ geh pâl nđaih hăn ndrel đah lŏ mir, thôn ƀon. Âk ntrong kan pâl nđaih tuch tăm dơi jêng, mbrơi mbrơi mât uĕh săk rnglăy, jêng ntŭk tât wăch rgum nău uănh tât bah năch, rgop hun hao thôn ƀon.

Ta nkual neh sât blak bah xă Ea Nuôl, nkuăl Buôn Đôn, n’gor Dak Lak mir nhãn rlău 1,5 ha dôl dơi wa Lý Mạnh Hùng mât chăm, koh n’ging nchrăp an yan play mhe. Wa Hung an gĭt, Tâm yan nhãn, rnôk tât đah mir, năch pâl nđaih ŭch dơi sa dah rŏng n’hanh mĭn joi gĭt tâm rnôk tăm, mât chăm, pĕ nhãn, tơm mir rhơn đŏng yor dơi tăch ndơ ta ntŭk lŏ mô roh prăk manh nuĭh pĕ, mô roh prăk rdêng. Wa Lý Mạnh Hùng nkoch:

Bah rnôk hun hao tơm nhãn aơ nkre rhŏ an năch pâl nđaih n’hanh rhŏ wăng sa rnăk wâl gâp saơ ta neh sât blak bah Buôn Đôn ri dŭt tâm di đah tơm nhãn. Tơm nhãn rnôk lăp tâm Tây Nguyên dŭt dơh mât chăm ƀư nkao tĭng ŭch nơm. Ndơ gâp ƀư geh dơi tăch an năch pâl nđaih dâl nsĭt tay nău geh dŭt đăp mpăn an rnăk wâl.

Mô knŭng hun hao ăp tơm tăm way ơm, du đêt ƀon lan ta nkuăl Buôn Đôn lĕ janh rgâl, rlong đah ăp ntil tơm tăm mhe. Du đêt ntrong kan lĕ nsĭt tay nău khlay wăng sa âk n’hanh ntrŭt nsôr nău mĭn joi bah năch tât đah mir tơm tăm. Ntoh lư lah mir nho tơm si, rlău 1.800 tơm bah wa Đỗ Trọng Huế, ta xă Ea Huar, nkuăl Buôn Đôn. Wa Đỗ Trong Huế an gĭt, bôl mhe knŭng geh 100 tơm geh play, yơn nău geh bah rnăk wâl wa bah play nho nklăp 200 rkeh prăk/năm. Mô knŭng ndrĭ, dŭt âk nuĭh kuăl ôp đah nău ŭch dơi tât gay uănh, rlong ƀư ngăm...

Rnôk rnăk wâl tăm n’hanh hăn uănh tơm  nho aơ saơ săk rnglăy, tăch an ntŭk rwăt dơi geh 2-3 năm dăch aơ. Wâl gâp geh nchih ta ăp mạng xã hội, geh dŭt âk nuĭh joi tât n’hanh dơi ŭch rlong ƀư... Yôr nê jay gâp geh trong rgâl an ƀư pâl nđaih lŏ mir jêng dăn sam ƀŭt.

Bah nău geh têh bah ƀon lan n’hanh gĭt saơ nău ŭch pâl nđaih rlong ƀư ngăn bah pala nđaih nar lơ âk. Wa Trần Văn Toàn, Giám đốc Hợp tác xã Dịch vụ pâl nđaih lŏ mir Phú Nông-Buôn Đôn an gĭt, Hợp tác xã lĕ tâm rgop ăp rnăk rgum hun hao jru ăp ntrong kan mât rong tuch tăm têh bah ƀon lan kơt: mât rpai, mât djăr, tăm cam, quýt, play bung, ca cao, nhãn... gay rhŏ an năch pâl nđaih.

He an nchrăp lor n’hanh ŭch êng yor lah he knŭng an mpeh pâl nđaih ma ntlơi lŏ mir ri nkô̆ nău ƀư ngăn mbra mô geh. Aƀaơ, năch pâl nđaih mbrơi mbrơi rgâl tĭng trong ƀư ngăn n’hanh mĭn joi tâm rnôk gĭt tât ăp ntrong kan.

Wa Y Si Thắt Ksơr, Groi Kruanh UBND nkuăl Buôn Đôn an gĭt: Nkuăl dŭt uănh tât nău hun hao pâl nđaih hăn ndrel đah lŏ mir, thôn ƀon. Tâm Nghị quyết đảng bộ năm kan 2020-2025 geh lah rjăp nkô̆ nău. Năm bah năp, UBND nkuăl lĕ jao an jrô kan Lŏ mir hun hao ƀon lan tâm rgop đah Jrô kan Văn hóa-Thể thao tĭng trong nchrŏng têh bah nkuăl săch ăp ntrong kan tâm di gay ƀư tĭng. Ndrel đah nĕ, nkuăl Buôn Đôn uănh tât hun hao hợp tác xã. Tât aƀaơ, lam nkuăl geh 19 hợp tác xã dôl dŏng, tâm nĕ geh âk hợp tác xã pah kan tĭng ntrong kan pâl nđaih-lŏ mir. Wa Y Si Thắt Ksơr an gĭt tay:

Êp tât mpôl hên nsing tĭng nuih n’hâm Nghị quyết 88 bah Quốc hội gay ntop kơl an ăp rnăk dơi geh hun hao. Nkre, tâm rgop đah ăp hợp tác xã, ngăn lah ta nkual rnoi mpôl đêt gay ntơm rgâl nău mĭn, trong ƀư mpeh hun hao pâl nđaih hăn ndrel đah lŏ mir, thôn ƀon.... Nkre mkra nău kan an ƀon lan rnoi mpôl đêt, nkre, rgop rgâl mhe hun hao tâm di đah nu nău ta ntŭk.

Đah ăp trong hăn na nê̆, nkuăl Buôn Đôn, n’gor Dak Lak dôl rƀŏng tât rgop ăp ntil ndơ pâl nđaih, joi ƀư rjăp gay lŏ mir têh dăng, ngăn ngên săk rnglăy ntrong kan pâl nđaih hăn ndrel đah lŏ mir an wăch rgum năch pala nđaih tâm dak n’hanh dak bah dih, rgop hun hao wăng sa thôn ƀon nkual n’har bri.