Geh ƀư bâh ntơm lơ 26/12/2022 n’hanh ntoch jong tât lôch têt dương lịch năm 2023, pơh văn hóa- pâl nđaih Măng Đen năm 2022 geh UBND nkuăl Kon Plông, n’gor Kon Tum ƀư ta nkual pâl nđaih bri ngih dak mât Măng Đen lĕ geh dŭt âk năch tât uănh gĭt nău ueh êng ta Tây Nguyên. Oh Lương Phạm Việt Anh, năch pâl nđaih tât bâh Dak Nông an gĭt tât ta Măng Đen Việt Anh lĕ geh uănh ăp mpôl nghệ nhân rnoi Xơ Đăng tŭr chĭng goh gong, njroh xoang, njroh mprơ, goh uh ndơ nteh way ơm rnoi nơm n’hanh oh dŭt ŭch đah nuĭh ƀon lan ta aơ.

 “Nău mĭn gâp saơ dŭt êng n’hanh geh bên đŏng yor lah rnăk vâl gâp ntrơn du n’hanh Tây Nguyên lah ntŭk gŭ rêh rĭ gâp jêng du hê kon nuĭh Tây Nguyên. Gâp saơ dŭt rhơn n’hanh ŭch rŏng kon nuĭh ta aơ. ăp nuĭh ta aơ dŭt ueh, dŭt dăch bên”.

Tâm âk nău kan geh ƀư ta nkual pâl nđaih bri ngih dak mât Măng Đen di rơh rlu têt năm mhe 2023, geh âk năch pâl nđaih tât ngăn lah ntŭk văn hóa “Thiên đường tây Nguyên”. Ta aơ ba dâng bri n’ho, geh 5 ngih rông way ơm bâh nuĭh Xơ Đăng rnoi Rơ Mâm n’hanh Ca Dong geh ndâk ƀư tay. Ndrel đah nĕ lah rhiăng ntil ndơ ơm kăl e ndrel đah nău rêh nău kan bâh nuĭh ƀon lan geh pla n’hơ dŭt ueh. Oh Nguyễn Ngọc Thủy Trang, sinh viên năm 2 Đại học FPT ta nkuăl ƀon têh Hồ Chí Minh an gĭt.

 “Aơ lah rơh bôk năp oh geh tât ta Măng Đen, oh saơ nău rêh bâh nuĭh ƀon lan ta aơ dŭt ueh ngăn. Bol ma mô tŏng pah pĭt âk ntil ndơ dŏng yơn mpeh nău mĭn bu dŭt tŏng ăp. Ăp nuĭh ƀon lan ta aơ rĭ bu way geh du rơh sa piăng nsum dŭt răm rhơn. Oh tât ta Đà lạt hôm n’hanh saơ Măng Đen mô geh kơt Đà Lạt, păng geh ăp nău êng đah Đà Lạt. Tâm let năp tay rĭ klâp lah mbra plơ̆ tay ta Măng Đen đah du hê nuĭh băl đŏng klâp lah”.

Wa Đặng Đình Toán, kruanh ntŭk kan văn hóa n’hanh thông tin nkuăl Kon Plông an gĭt, gay ma geh âk nuĭh ƀon lan tâm ban năch tât uănh gĭt nău ueh êng ta Tây Nguyên ta nkual pâl nđaih bri ngih dak mât Măng Đen di rơh  tết năm mhe 2023, nkuăl Kon Plông lĕ geh nău ntuh kơl na nê̆. Ndrel đah nĕ, tâm rgop đah nuĭh nkra njêng Minh Hạnh n’hanh nuĭh rgum ndơ ơm yău Tây Nguyên, Đặng Minh Tâm nkra ƀư, pla n’hơ du nău ueh êng Tây Nguyên jê̆ ta Măng Đen.

 “Bâh nău ueh êng mpeh văn hóa bâh mpôl hên saơ du nău mbơh ŭch njoăl tât lĕ rngôch nuĭh năch tât ta aơ nĕ lah nău mât rbăy, n’hao mpư ăp nău khlăy văn hóa way ơm tĭng di nău ntrŭnh mpŏng ma ta rơh rƀŭn nchră văn hóa lam dak năm 2021 Tổng Bí thư Nguyễn Phú Trọng lĕ ntĭm đă, nĕ lah văn hóa tơm huêng khlăy bâh mpôl rnoi, văn hóa sol trong an ƀon lan hăn n’hanh văn hóa hôm rĭ mpôl rnoi hôm. Nĕ  lah ăp nău kan tơm khlăy ngăn ma mpôl hên ŭch njoăl tât năch rnôk hăn tât ta aơ uănh gĭt nău ueh êng ta nkuăl Kon Plông.