Rlau 10 năm plŏ ma aơ, rnoh prăk ntuh kơl tă bah bôk nau kan, nau kơl an bah Đảng ndrel Ngih dak ân xã Lộc Nam, nkuăl Bảo Lâm, n’gor Lâm Đồng hao tât ma rhiăng rmen. Rnơm nau kơl an aơ, ntrong điện, trong hăn, ngih săm ƀŭt, ngih dak si, nau kan văng sa ndrel ƀon lan geh âk nau rgâl. Ăp ngih truh sat ơm kăl e rnôk aơ geh rgâl ma ngih nkra mhe, nâp, nau rêh drăp ndơ ƀon lan mô rlu geh rgâl mhe ndrel n’hao prêh.

Lah du hê rnoi K’ho, tă ndjôt phao mât nau geh dơi cách mạng tâm nkuăl neh aơ, wa K’Dĭnh, 80 năm, tâm thôn 4, xã Lộc Nam rhơn mbơh nau ji ngot ach o hŏ tă jŏ năm ma aơ rnôk aơ hŏ jut luh bah ăp ngih, ăp rnăk. Nau rêh bah kônh wa hŏ têh ndrŏng âk. Ăp ngih kŏ geh ndơ sa ndơ têm:

‘Bah năp nơh trong hăn geh âk dak bŏk, hăn ro jêr ngăn, rnôk aơ trong hăn ueh ri hăn dŭt nơih. Nau rêh văng sa kŏ geh đăp mpăn, nau geh dơi kŏ âk đŏng. Ăp ngih kŏ geh ndeh hăn ro, geh du đê̆ rnăk rvăt ndeh têh. Nau rêh văng sa bah năp nơh jêr, yơn rnôk aơ blau ƀư nau kan văng sa ri mô hôm geh ach o ji ngot. Ngih vâl kŏ ndâk nâp. Rnôk aơ mô hôm rvê ôh, knŭng nsôih ƀư ndrŏng dơm. Rnôk aơ âk ngăn kônh wa geh ma rhiăng rkeh prăk tâm du năm mô geh đê̆ ôh”.

Ntơm bah rnôk geh bar pe rhiăng rnăk rnoi K’ho rêh, tât rnôk aơ Lộc Nam hŏ hun hao rlau 3.400 rnăk, 13 rbăn nŭih, tâm nê rnoi K’ho geh rlau 30%. Rnơm neh jêng ri ma tăm ăp ntil tơm tăm geh rnoh văng sa kơt lah chè, cà phê, sầu riêng, măng cụt, mắc ca ndrel du đê̆ ntil tơm êng, Lộc Nam hŏ jêng nkuăl geh rnoh neh tăm rlau 5000 ha. Tâm nê, âk nau kan tuch tăm geh ntơm 500 rkeh tât du rmen/năm, ngăn lah nau kan tăm sầu riêng geh 2 rmen/năm. Ndrel ma tuch tăm, mât rong kŏ geh nau dơi tâm Xã Lộc Nam ƀư gay rong ndrôk, be, sur tât 3.400 mlâm ndrel 34 rbăn mlâm kik djar, tui ka đŏng.

Nau ngăn lah, Lộc Nam kŏ njêng dơi ăp nau kan tâm rgop tuch tăm ndrel tăch ndơ, đăp mpăn tuch tăm ndrel n’hao nau geh jêng ân ƀon lan, đah rnoh geh rnôk aơ rlau 45 rkeh/nŭih/năm. Rnơm nê, nau kan n’huch ach o nâp nâl kŏ geh nau dơi prêh, ntơm 30% rnoh rnăk ach o tâm năm 2015 tât dŭt năm 2022 knŭng hôm 6%.

Wa K’Châu, rnoi K’ho tâm thôn 3, xã Lộc Nam ân lah, geh dơi nau aơ lah rnơm nau ntuh kơl bah Đảng ndrel Ngih dak, tâm nê nkoch tât nau kan bah neh dak mpeh nau hun hao tuch tăm, n’huch ach o nâp nâl ndrel ndâk njêng ƀon lan mhe hŏ jêng nau dơi khlay kơl an kônh wa rgâl nau mĭn, janh ƀư nau kan mhe tâm nau kan tuch tăm, mât chăm pah kan ndrel ndâk nau rêh mhe. Wa K’Châu, nkoch:

‘Nau rêh bah kônh wa rnôk aơ hŏ geh rgâl âk ngăn. Bah năp nơh ndeh vah jâng mô geh ơm, rnôk aơ ăp ngih geh ndeh hon-đa, geh ngih rvăt ndeh ô tô 500-700 rkeh. Jêh ri ngih kđar, ngih nkar kŏ geh rgâl ma ngih ndâk nâp, mô lah geh ngih ndâk ngih prêh dăp, ngih cấp 3. Nau ntrơn rgâl aơ knŭng tâm đê̆ năm ma aơ dơm. Kŏ rnơm kônh wa blau mât chăm tơm tăm, mpa rong, ngăn lah ntrơn rgâl jêng tăm ăp ntil tơm geh rnoh văng sa khlay, geh rnoh khlay. Nau rêh bah kônh wa ta aơ hŏ đăp mpăn ndrel hun hao ngăn”.

Mô knŭng nau rêh văng sa hun hao, ma nau kan đăp mpăn chính trị ndrel đăp mpăn nau rêh bah xã Lộc Nam mro geh mât nâp. Ngăn lah, nŭih ƀon lan hŏ ƀư ueh nau vay ơm tâm rnglăp ndrel nau hôm têl bah nkuăl căn cứ cách mạng, nau tâm boh rêh jêng đah kônh wa rnoi yoăn ndrel rnoi mpôl đê̆ lơn ma nâp, nau tâm dăch ƀon lan geh n’hao prêh.

Tĭng wa Võ Thiên Bình, Kruanh UBND xã Lộc Nam, jêh rnôk geh kơp dơn lah xã tŏng nau dơi ƀon lan mhe tâm năm 2020, Lộc Nam năl lah nau kan tơm ân geh đăp mpăn nau nâp bah ăp nau kan. Ŭch geh dơi nau nê, cán bộ, đảng viên, mặt trận tổ quốc ndrel ăp rmôt kan ân geh nchrăp ƀư nau blau nau mhe tâm nau dŏng ka, nau kơl bah Ngih dak, nau tâm rgop rgum âk ntil tu tơm ân geh tâm di ma nau ngăn ndrel nau rgop, nsum n’hâm bah ƀon lan. Tâm nê, nkô̆ nau tơm lah n’hao nau mĭn, rgâl nau mĭn, nau kan bah ƀon lan, ngăn lah đah kônh wa rnoi mpôl đê̆. Wa Võ Thiên Bình, mbơh:

“Tâm rnôk ƀư nau kan tâm rgop nsum, ndâk ăp rmôt tâm boh leo tăch ndơ tuch tăm hŏ kơl an kônh wa đăp mpăn lơn mpeh nau rêh. Ndrel kơl an ân nau kan tuch tăm rêh jêng bah nkuăl lah nsum, nŭih rnoi mpôl đê̆ lah êng geh âk nau ntrơn rgâl ngăn. Kăl e nơh, nau vay ơm bah kônh wa lah tăm tơm jêh ri ân păng hao rêh jêng êng, rnôk aơ kônh wa blau mât chăm, poh phân ri ma geh săk jêng, rnoh âl, nau nâp geh n’hao prêh lơn âk ngăn, nau săk tam văng sa leo nsĭt lah dŭt âk. Nau nê ân saơ nau ntrơn rgâl nau mĭn bah kônh wa lah dŭt khlay’.

Ndrel đah nau lŏ ƀư jêh ntrong ngih vâl, gung trong ƀon lan, Lộc Nam dôl rgum ăp tu tơm gay ma ntrŭt dăng nau hun hao tuch tăm tĭng nau kan tăch rgâl, kŏ kơt lah ntrŭt dăng nau kan dŏng tĭng nau kan prêh mhe tâm nau kan tuch tăm gay ma n’hao rnoh geh tâm ndrel du rnh neh tăm, hun hao tay ăp nau kan tâm rgop ndrel tăch ndơ. Đah nau ntrơn rgâl rjăp tâm nau mĭn ƀư nau kan tuch tăm bah ƀon lan, ndrel ma nau lăp kơl an bah lam ntrong kan chính trị, rnơm lah Lộc Nam mra geh dơi lah xã ƀon lan mhe n’hao prêh tâm năm 2024 kơt nkô̆ nau nchrăp luh./.