Lah nai nti kon se geh kan tâm nkual rnoi mpôl đê̆ Đầm Ròn, nkuăl Đam Rông, n’gor Lâm Đồng ntơm năm 1980, jêh bơi tât 40 năm ƀư jêh nau kan ntĭm nti, năm 2018, wa Liêng Jrang Ha Tương, tâm ƀon Đa Té, xã Đạ Mrông rlu ranh geh jao ƀư Bí thư chi bộ thôn. Tâm nau kan aơ, wa Liêng Jrang Ha Tương hŏ ƀư ueh nau kan bah Đảng viên, ndrel đảng viên êng tâm chi bộ ƀư rƀŭn nchră, ntrŭnh ƀư ân geh săk tam ăp nau ntrŭnh mpeh hun hao văng sa, rêh jêng, n’hao nau rêh, nuih n’hâm ân ƀon lan. Wa Liêng Jrang Ha Tương nkoch, gay ƀon lan râng tuch tăm, ntrơn rgâl tơm tăm, n’hao săk tam, wa ndrel ăp đảng viên tâm chi bộ kŏ leo trong tâm nau ƀư. Ngăn lah, ƀư ueh nau kan đảng viên, nsôih ntĭm nti ndrel pah kan tĭng nau mĭn, nau rêh, nau kan Hồ Chí Minh đah nau kan dŭt n’hâm n’hêl, rjăp:

 ‘Đah nŭih đảng viên lah nŭih leo trong lor, lŏ lah nŭih ƀư lor, ntơm bah nê kônh wa bu mơ rgâl nau mĭn, saơ nau săk tam bah nau nơm kan. Kơt rơh rlau aơ, phung hên mbơh luh nau nchrăp dŭt n’hâm ngăn, nau kan tuch tăm byăp kŏ kơt lah rong tay kik, sur, djar...gay rgâl nau rêh văng sa rnăk vâl. Tă bah nau kan tă geh ƀư, phung hên hŏ ntrŭnh ƀư leo lam ƀon lan ndrel bu ƀư kơt tĭng, rgâl nau rêh băng sa bah nơm, n’huch dơi du gưl nau dŏng gay ma rvăt ndơ sa ăp nar. Nê kŏ lah nau ma gâp saơ đah đảng viên rnôk ntĭm nti ri nơm ân geh ƀư ăp nau kan n’hêl, ngăn kơt nê”.

Jêh 5 năm ƀư Bí thư Chi bộ, wa Liêng Jrang Ha Tương hŏ lơi âk nau ueh ngăn tâm ăp cán bộ, đảng viên ndrel kônh wa ƀon lan. Ntơm bah nau kan n’hêl ndrel ngăn tâm nau leo trong tuch tăm, ntrơn rgâl tơm tăm n’hao nau geh jêng, âk nŭih ƀon lan ntrơn ntơm neh ba du yan mô jêng gay tăm tơm rong ndrŭng brai, âk rnăk tăm tay byăp, hun hao rong sur, ndrôk, kik djar gay mô knŭng rklaih nau ngêt sa tâm ntŭk ma hôm tăch đŏng. Tă bah nê, nau rêh văng sa bah ƀon lan ăp nhoat đăp mpăn ndrel n’hao prêh. Ăp nau rluk mâl ơm tâm nau njŭn sông, khĭt ôm kŏ geh jut jăng, ăp nau vay ơm ăp rnoi geh mât ndrel ƀư ueh. Trong hăn ƀon lan geh ndrih, kloh, ueh, đăp mpăn nau dơi thôn, ƀon văn hoá. Wa Liêng Jrang Hót Ha Phương, rnoi K’ho tâm ƀon Đa Tế, xã Đạ Mrông, ngơi:

 ‘Tâm thôn Đa Tế bah hên ri geh Bí thư chi bôk thôn rđau đă ri trong hăn ƀon lan geh ueh nâp, ăp nau kan tâm thôn, ƀon geh đăp mpăn, kloh ueh ngăn ro”.

Thôn Đa Tế, Xã Đạ Mrông, nkuăl Đam Rông geh bơi tât 220 rnăk, bơi tât 1000 nŭih, ngăn lah rnoi mpôl đê̆, rnoh rnăk ach o geh n’gul. Rnơm blau rgâl nau kan, ăp nhoat ntrơn rgâl tơm tăm, n’hao nau tuch tăm ndrel ƀư tĭng nau mhe tâm nau kan...rnoh rnăk ach o huch jur hôm tâm dâng 20%. Tâm ƀon ntơm geh rnăk geh ma rhiăng rkeh prăk/năm.

 Ngăn lah, gay ƀư ueh nau mât thôn, ƀon, đăp mpăn rnă njrăng ndrel nơih tâm nau nkoch trêng, bonh đă, nŭih ƀon lan ƀư ueh ăp nau ntrŭnh bah Đảng, pháp luật bah ngih dak, wa Liêng Jrang Ha Tương hôm leo trong tâm chi bộ, Ban nhân dân vẽ sơ đồ, ntoh mbơh ngăn nau ƀư ăp ntŭk kơl an tâm nau rêh, trong hăn, ngih rƀŭn rgum, ngih rƀŭn chroh ndrel ntŭk ngih bah ăp rnăk vâl đŏng. Sơ đồ aơ geh mpla tâm ngih rƀŭn rgum ƀon lan gay ăp rnôk ƀon lan, bu năch tât pâl, uănh, ntĭm nti ndrel râng uănh nơih gĭt, joi. Nkre lah, kŏ lah ntŭk gay mât ân nơih mpeh ntŭk gŭ, rnoh nŭih vay gŭ, nde, ntrơn tât, ntrơn hăn...jêng nau kan mhe tâm nau mât thôn, ƀon dôl geh ƀư âk tâm xã Đạ Mrông lah êng ndrel nkuăl Đam Rông lah nsum.

Tĭng wa Nguyễn Hoàng Mai, Bí thư Đảng uỷ, Kruanh UBND xã Đạ Mrông, wa Liêng Jranh Ha Tương lah nŭih bu rnơm ndrel lah đảng viên leo trong lor. Đah nau ƀư Bí thư chi bộ thôn, wa hŏ rgop âk ngăn tâm nau kan ndâk njêng đảng, ndâk n’gâng kan, bonh đă ƀon lan râng hun hao văng sa, rêh jêng, n’huch ach o nâp nâl ndrel nsum ty ndâk njêng ƀon lan mhe, lah nŭih leo trong ân đảng viên mom kơt tĭng:

‘Đa Tế rnôk aơ lah thôn geh âk nau ueh. Ndrel tâm ngih rƀŭn văn hoá thôn kŏ ân ndâk ăp bảng biểu bah Chi bộ, ban ƀon lan thôn, bah ăp chi hộ rmôt kan gay kơp dơn nau kan bah ăp ntŭk kan aơ, ăp khlay, 3 khay du tŏ geh nau mbơh sŏng tâm bảng nê gay geh nau tâm ntit gay ma nsôih. Mra dơi lah, đah nau ƀư Bí thư chi bộ thôn bah wa Liêng Jrang Ha Tương hŏ ƀư ueh âk nau dơi ngăn, geh Đảng uỷ, UBND xã geh âk nau rnê, bonh đă ndrle ŭch tâm rơh tât wa Tương mra lŏ ƀư ueh kơt nau dơi leo Chi bộ Đa Tế nar lơn hun hao. Jêng du chi bộ leo trong bah Đạ Mrông ndrel geh âk xã êng kơt tĭng”.

Rnơm nau gơih, nau kan rjăp, mro hăn leo lor tâm nau ƀư nau kan rgŏ jă, leo trong gay đảng viên mom ndrel ƀon lan tâm nkuăl kơt tĭng, wa Liêng Jrang Ha Tương, Bí thư chi bộ Đa Tế jêng nŭih leo trong ntoh lư bah ƀon lan, ndơn âk bằng khen, săm ƀŭt rnê nkhôm bah nkuăl Đam Rông, n’gor Lâm Đồng./.