Kpuih Trí, 10 năm deh ta ƀon Nú kon đơi bah jêt. Oh rêh đah u ranh n’hanh dŭt ach o. Nău rêh bah năp bâh Trí mô gĭt n’hâm jêng lah mô geh nău kơl bah ăp cán bộ, tahen pôih tahen n’har bri Ia Nan, Tahen N’har bri Gia Lai:

Kon saơ dŭt rhơn n’hanh dŭt răm dơi ăp kônh dơn mât. Âk kônh ntĭm kon nti nsơm, ntĭm ngêt sa, ntĭm hăn bĭch, gŭ âm ăp nar an kloh uĕh mô an ƀâ̆.

Kpuih Trí knŭng lah ngoăy tâm âk oh kon hŏk bah ngih sam ƀŭt Tiểu học Kơ Pă Kơ Lơng geh nău rêh dŭt jêr jŏt, dơi pôih tahen Ia Nan wơt dơn mât. Geh oh dơi ăp kônh wa, ăp wa wơt tât ta pôih mât rong, uănh mât, geh oh dơi pôih tahen ntop kơl prăk 500 rbăn du khay gay ntop kơl an nău nti. Thiếu tá Rơ Lan Thức, Chính trị viên groi Pôih tahen n’har bri Ia Nan an gĭt:

Ntŭk kan lĕ nchrăp, na nê̆ kơl nuĭh ƀon lan. Lơn lah ntŭk kan mbơh ƀư bôk nău kan kon mât pôih tahen n’har bri, ntrong kan biăp kloh uĕh hăn ndrel đah kon hŏk gŭ bah dih, yăng phe tâm kơl. Cán bộ tahen wât đŏng n’hao lĕ nău kan ƀư tĭng nău kan, mô klach njê, mô klach jêr, nsrôih ƀư tĭng nău kan dơi jao.

Ngih sam ƀŭt Tiểu học Kơ Pă Kơ Lơng geh 371 kon hŏk bah jrô 1 tât jrô 5, 100% kon hŏk lah nuĭh Jarai. Ta ntŭk, rnoh rnăk ach o âk, tâm rnôk nău wât n’hanh nău ŭch nti bah du đêt nuĭh rnoi mpôl đêt hôm e đêt. Nău rêh jêr jŏt khuch tât nău geh, nău blău nti bah ăp oh kon rnoi mpôl đêt. Nao bu ur Trần Thị Nhung, Hiệu trưởng Ngih sam ƀŭt nkoch: ăp năm bah năp, ngih sam ƀŭt mkra ăp nău jêr jŏt gay n’hao uĕh ntĭm nti. Yor âk rnăk hăn ƀư mir mô dơi hăn ndơ̆ kon tât ngih sam ƀŭt jêng dŭt âk ăp oh hăn jâng tât ngih sam ƀŭt. Gay dơh an nău nti bah ăp oh, ngih sam ƀŭt pă an kon hŏk jrô 1, jrô 2 dơi nti gŭ ăp ntŭk ngih sam ƀŭt êp jay. Hôm ăp oh têh lơn nti ta ngih sam ƀŭt tơm. Âk oh rnăk wâl gŭ ngai, ăp nai ndrel đah cán bộ tahen bah Pôih tahen n’har bri Ia Nan tât ăp jay wơt kon hŏk. Nai Trần Thị Nhung an gĭt, rlău ma an mông nar ntĭm môn Tiếng Việt, du pơh, ngih sam ƀŭt ƀư 2 nar ntĭm tay mô sŏk prăk. Lĕ rngôch kon hŏk dơi pă sam ƀŭt, ndơ dŏng nti gay ntrŭt nsôr ăp oh ŭch ngih sam ƀŭt, ŭch jrô nti, geh nuih n’hâm tât ngih sam ƀŭt ăp nar:

Ntop kơl đah ndeh, ndrôm sam ƀŭt, ndơ dŏng, jêp gay ăp oh tât ngih sam ƀŭt. Bôk năm an nchrăp ndrôm sam ƀŭt, ndơ dŏng nti. Nchrăp hên geh 370 oh kon hŏk ri gâp an nchrăp ntêm âk ndrôm sam ƀŭt gay ăp oh tât an manh nti dơm.

Đah ta nkual xă Ia Nan, nkuăl Đức Cơ, n’gor Gia Lai tâm 7-8 năm dăch aơ, 100% kon se tâm rnoh năm tât ngih sam ƀŭt dơi hăn nti. Nsrôih bah ngih sam ƀŭt ndrel ăp gưl n’gâng kan, ăp nsum mpôl rmôt tahen pôih tahen n’har bri lĕ rgop năp ndơ tât ngih sam ƀŭt bah kon hŏk ach o nkual prêh dơh oi njê.