VOV4.M’nông: Geh tâm trôm nău ƀư mbah rhơn 90 năm Nar ndâk njêng n’gor Gia Lai, Rgum mpla nsơ ndơ tăch rgâl n’hanh nkoch ndơ OCOP nkual Tây Nguyên-Gia Lai n’hanh tâm rgâl ndơ doanh nghiệp Nhật Bản lah nău ƀư khlay gay n’hao boăt nthoi tâm pă, hun hao ntŭk tăch ndơ n’hanh mpla nsơ ăp ndơ OCOP, ndơ công nghiệp ƀon lan ntoh lư, ndơ kah, ntĭt mpơl tât đah nuĭh dŏng.

Râng mpla nsơ ndơ ta rgum tăch ndơ, rnăk tăch rgâl Phạm Thị Bình (ta ƀon Ó, xă Ia Vê, nkuăl Chư Prông, n’gor Gia Lai) nkoch ndơ “Trà mblăng chanh Nam Phúc”. Wa Phạm Thị Bình an gĭt, ndơ aơ lĕ dơi an kơp dơn OCOP 3 sao gưl n’gor năm 2021. Đa rnoh tăch tâm di n’hanh ndơ uĕh an săk soan jêng ndơ dơi âk nuĭh uănh nsong kơl rwăt.

“Rgum tăch ndơ năm aơ ƀư dŭt uĕh, nău dăp ndrơng ndơ, ăp ntil dŭt di, dơh an ăp nuĭh tơm, ăp công ty. Râng mpla nsơ rơh aơ gâp saơ geh dơi mpla nsơ ndơ tât băl mpôl tâm n’hanh bah dih n’gor gĭt tât ndơ bah nơm. Dơi du đêt năch uănh tât âk nar aơ khân pơng kơl ƀa ƀơ, geh âk năch khân pơng tât du tơ̆ rwăt ndơ sĭt dŏng jêh nĕ nar bah kơi khân pơng plơ̆ rwăt tay đêt ndơ”.

Ăp ndơ OCOP mpla nsơ bah n’gor Gia Lai ta rgum mpla tăch ndơ.

Rgum tăch ndơ lĕ nta an ăp doanh nghiệp, hợp tác xã n’hanh ăp ntŭk mpla nsơ ndơ, joi nuĭh kan ndrel, pơk hvi ntŭk tăch, kơl an nuĭh dŏng gĭt ăp ndơ n’hanh ndơ uĕh kah âk. Âk doanh nghiệp tâm n’hanh bah dih n’gor Gia Lai râng mpa nsơ, nkoch măy mŏk, ndơ công nghiệp, lŏ mir, ăp ndơ tăch rgâl uĕh. Wa Dương Minh Tú, cán bộ Ntŭk ntrŭt pah kan mhe n’hanh ntrŭt ngăch tăch rgâl Quảng Ngãi an gĭt:

“Đah rgum mpla tăch ndơ rơh aơ, mpôl bah N’gâng kan Công thương Quảng Ngãi djôt tât ta aơ 20 ndơ OCOP n’hanh ndơ lŏ mir ƀon lan ntoh lư gưl ngih dak. Ntoh lư lah poăch ndrôk kro, sĭk, tỏi Lý Sơn, ka kro jêt, mạch nha... Tă bah ăp nar bah năp gâp saơ kônh wa dŭt ŭch ăp ndơ mpeh OCOP, lơn lah ăp ndơ ntĭt mpơl êng bah nkual neh, geh âk năch tât rwăt hôm khân pơng plơ̆ hăn rwăt tay tal 2, tal 3”.

Rgum mpla tăch ndơ n’hanh nkoch ndơ OCOP nkual Tây Nguyên-Gia Lai geh 250 ndrơng ndơ đah ăp ndơ OCOP, ndơ ntĭt mpơl êng, ndơ công nghiệp ƀon lan ntoh lư bah Gia Lai n’hanh ăp n’gor ta lam dak kơt cà phê, tiêu, mắc, dak sŭt, tỏi, trầm hương, dak măm... Nô Trần Hoài Nam, nuĭh hăn uănh nsong rgum mpla tăch ndơ gĭt saơ:

 “Rơh aơ saơ n’gor Gia Lai uĕh ngăn, rgum mpla tăch ndơ âk ntil tŏng ăp. Nuĭh ƀon lan tât ta aơ nkre uănh Quảng trường, nkre khâl, rwăt ndơ, ndơ dŭt âk ntil, rnoh khlay tâm di. Bah ăp công ty ndơ ta aơ rup dŭng uĕh, dŭt ŭch. Rhơn an Gia Lai ƀư âk lơn ăp rơh kơt aơ gay wăch rgum geh âk năch pâl nđaih tâm n’gor kơt tâm n’hanh bah dih dak”.

Nkoch mbơh ndơ OCOP an năch hăn uănh nsong.

Wa Phạm Văn Binh, Kruanh N’gâng kan Công thương n’gor Gia Lai an gĭt: Geh âk ntil, uĕh, ntĭt mpơl êng bah ăp ndơ lah khlay ngăn tâm nău ƀư ntrŭt ngăch tăch rgâl rơh aơ hăn ndrel tâm rgâl, rgum lăp lam ntŭr neh. Tă bah nĕ, nta an ăp doanh nghiệp, hợp tác xã, ntŭk nkra njêng tăch rgâl bah Gia Lai, ăp n’gor, nkual ƀon têh n’hanh doanh nghiệp Nhật Bản dơi geh tâm mâp, tâm rgâl, mĭn joi nuĭh, hun hao ntŭk tăch ndơ. Nkre, tă bah aơ nkoch nău geh, jâng nsan, mpla nsơ ndơ bah ăp ntŭk, ăp doanh nghiệp đah ăp nuĭh ntuh kơl-ntrŭt ngăch tăch rgâl n’hanh năch pâl nđaih.

“Ăp doanh nghiệp bah Nhật Bản khân pơng dŭt uănh tât ăp ndơ lŏ mir bah Gia Lai kơt dak sŭt, poăch ndrôk ih du nar, mắc ca n’hanh âk ndơ êng, lơn lah cà phê. Ăp doanh nghiệp Nhật Bản dôl saơ ndơ geh bah Gia Lai mpeh wăch rgum ntuh kơl. Jêh rgum mpla tăch ndơ aơ mpôl hên ŭch ăp doanh nghiệp Nhật Bản mbra tât ntuh kơl ta Gia Lai. Êng nău kan Công thương mbra nta ăp nău nơih, ôp nchră đah UBND n’gor wăch rgum khân pơng lăp ăp nkual, nkum công nghiệp gay ntrôl hun hao nkra njêng”.

Bôk nău kan OCOP lah bôk nău kan hun hao wăng sa nkual ƀon lan tĭng trong hun hao tâm trôm n’hanh n’hao nău khlay. Nău rgum bah ndơ OCOP nkual miền Trung-Tây Nguyên ta Gia Lai rơh aơ lĕ du gưl mĭn lah n’gâng tơm nâp nâl ndâk njêng ƀon lan tâm nkual.

          Nuĭh rblang: Y Sưng Phê Ja