Đảng viên Y Phen Niê nuĭh Bu Nong, 37 năm deh, ta buôn Kuốp, xã Đray Sáp, nkuâl Krông Ana, n’gor Dak Lak. Âk năm aơ, ndrel đah nău dơi âk nău khlay kan Kruanh Hội Nông dân xã Đray Sáp, Y Phen hôm way hăn lor bôk năp tâm ăp trong hun hao wăng sa jut jăng ji ngot n’hŭch ach o n’hanh rgop rdâk njêng ƀon lan mhe ta ntŭk. Đah ăp nău dơi hŏ geh tâm ăp nău kan, tâm 5 năm mbro nô dơi Hội Nông n’gor Dak Lak rhơn rnê lah hội viên nông dân ƀư njêng tăch rgâl jăp blău.

          - Hơi nô Y Phen Niê, may mbra nkoch nău tă ơm gĭt kan bah săk he nơm tâm rnôk pah kan hội n’hanh nău pah kan jan sa mêh?

Đảng viên Y Phen: Đah nău ƀư lah Kruanh Hội nông dân xã Đray Sáp, n’hanh lah đảng viên, săk gâp nơm way ƀư lôch jêh ăp nău kan dơi jao, way hăn leo lor bôk năp tâm  ăp nău kan gay kônh wa hội viên ƀư tĭng. Gay kônh wa saơ dơi nău kan gâp ƀư nsĭt geh nău dơi, kônh wa nsing nơm n’hanh mbra tĭng ƀư. Gâp ntĭm nti kônh wa ƀư wăng sa rnăk wâl gay hun hao lơn, gay nău rêh nar lơn ma đăp mpăn. Tâm rnăk way ntĭt leo lor rgŏ jă lor bôk  năp lah ur kon, lôch nê lah ƀon lan gŭ rêh tĭng jăp hiến pháp n’hanh pháp luật, jăp gơih wăng sa, hăn lor gay kônh wa kơt tĭng ƀư. Lah du đảng viên Đảng Cộng sản Việt Nam gâp way leo lor tâm ăp nău kan, nkoch gĭt ăp trong nchrăp gung trong bah Đảng, Pháp luật bah Ngih dak gay kônh wa rƀah gĭt, gay kônh wa tĭng ƀư. ntơm bah nê kônh wa tâm rnglăp lơn tâm ăp nău kan ta ntŭk.

          -Ơ, aƀaơ may lah ngoăy tâm du đêt hội viên ƀon lan kan lŏ mir xã Đray Sáp nsĭt geh rlău n’gul rmen prăk ăp năm bah nău kan mât rong n’hanh tuch tăm, may mbra nkoch ăp nău tă ơm gĭt kan gay dơi geh kơt aơ, mêh nô?  

Đảng viên Y Phen Niê: Rnăk gâp geh rlău 5ha neh tuch tăm hun hao wăng sa. Mpôl hên tăm ba lŏ, tiêu, cao su, cà phê… Ăp năm rnăk gâp nsĭt geh bơi 500 rkeh prăk, n’hâp lĕ prăk ntuh kơl hôm nklăp rlău 300 rkeh prăk… Rlău ma nê, rnăk hom geh 2 rot ndrung mât sŭr hvi rlău 200 mét vuông, mât ntơm bah 5-6 mblâm sŭr me, ăp sŭr me mât tay da dê gay mât sŭr tăch puăch. Aƀaơ nklăp 50-60 mblâm,  ăp mblâm n’gluh tăch nklăp 4 tấn sŭr puăch.

- Rlău ma tuch tăm mât rong tăch rgâl jăp blău, may hôm way hăn lor dâk bôk năp đŏng trong leo rgop ăp tŏng rnoh  prăk rdâk njêng ƀon lan mhe ta ntŭk. Dăn may nkoch gĭt mpeh nkô̆ nău dja mêh?

Đảng viên Y Phen Niê: Tâm trong leo rdâk njêng ƀon lan mhe gâp way hăn leo lor bôk năp tâm trong hăn rgŏ jă kônh wa hun hao wăng sa, mât đăp mpăn ta ƀon lan, rdâk njêng nău rêh hơm răm đŏng. Đah nău dơn kan bah du hê đảng viên gâp dâk rgŏ jă tâm ăp nău kan, ngih dak n’hanh ƀon lan ndrel râng ƀư, rdâk njêng ƀon lan mhe geh nsĭt nău dơi. Gâp way nkah kônh wa ân tâm rnglăp, du nuih n’hâm rdâk njêng nsum mpôl lam ƀon lan nar lơn ma hun hao n’hanh hơm răm lơn.

-Lah Kruanh Hội nông dân xã Đray Sáp, ăp năm rlău aơ nău ntop kơl kônh wa mpeh kỹ thuật, tơm prăk, kon ntil….gay nuĭh ƀon lan hun hao wăng sa jut jăng ji ngot hŭch ach o mhâm ƀư mêh nô?

Đảng viên Y Phen: Ta nău kan ƀư Kruanh Hội nông dân, gâp way buăt nthoi đah ăp công ty, doanh nghiệp, ăp kĩ sư tuch tăm gay ntĭm nti ntop kơl kỹ thuật tât kônh wa tâm nău kan tuch tăm mât rong, tăm tiêu cà phê, cao su, ăp ntil tơm sa play, mât rong sŭr, ndrôk, rpu, djăr, be …gay kônh wa tât đah khoa học kĩ thuật dŭt mhe aƀaơ, dŏng tâm nău kan tuch tăm mât rong gay n’hao săk geh, kah uĕh n’hanh nsĭt geh an kônh wa. Nkre, gâp way kan nsum đah ăp mpôl kan an manh tơm prăk, joi tơm prăk manh thuk nta trong dơh gay kơl kônh wa hôm jêr jŏt geh tơm prăk ntuh kơl, ndrel hun hao, njêng tơm geh wăng sa an ăp rnăk wâl.

-Ơ, dăn lah uĕh nô!