Đah mir cà phê têh rlău 1,1 ha dôl tăm tay năm tal 3, yan pĕ năm aơ, rnăk wâl wa Triệu Văn Phúc, ta thôn 3, xă Cư Suê, nkuăl Cư M’gar, n’gor Dak Lak pĕ geh 5 tân cà phê rlăi. Wa an gĭt: rnoh ndơ năm aơ lĕ geh rlău năm bah năp. Mô hŏ kơp tât prăk geh mbra hao âk tay knơm ăp tơm tăm srah. Đah rnoh khlay kơt aƀaơ, du năm rnăk wâl wa geh rlău 800 rkeh prăk. Tĭng wa Phúc, geh kơt nĕ lah knơm nău rgâl trong tuch tăm tĭng nău ntĭm bah Hợp tác Nông nghiệp n’hanh dịch vụ Bình Minh.

Hợp tác xã ntĭm an ƀon lan, kônh wa ƀư tĭng ntrong kan bah HPT mpeh kỹ thuật cheh phân, dak si tu ndrŭng... Ƀư tĭng hợp tác xã ri geh âk nău dơh, geh âk lơn. Yor kăl e ƀư tĭng nău blău ơm bah êng nuĭh ri săk geh mô âk.

Râng hợp tác xã bah âk năm bôk năp ndâk njêng, yuh Triệu Thị Hạnh nkoch, ăp nuĭh dơi hăn tiăr nti ăp khoa học kỹ thuật. Ăp nuĭh tâm rmôt mom hôm kơl ntĭm kônh wa gĭt trong tŏ dak ntêm nkrem, rgŏ jă ăp nuĭh tuch tăm tĭng hữu cơ, dăch uĕh đah ntŭk ntô. Nkre, Hợp tác xã nchrăp ăp nău nkra njêng, pĕ lêh tât tăch ndơ.  

Ntơm bah bôk năp ăp nuĭh bah Hợp tác xã Bình Minh ri râng âk jrô tiăr nti. Jêh tiăr nti lah gâp ŭch rgâl nău mĭn ƀư, âk tơ̆ tăch rih gâp saơ geh mô săk rnglăy. Saơ Ngih dak geh âk nău kơl an Hợp tác xã gay an nuĭh kan ndrel geh nău wât mhe lơn, nkra njêng lŏ mir kơt lah cà phê, tiêu tăm srah geh săk rnglăy.

Ndâk njêng bah năm 2016, Hợp tác xã Nông nghiệp n’hanh dịch vụ Bình Minh geh 27 nuĭh lah kônh wa nuĭh Dao ta ƀon Bình Minh, thôn 3, xă Cư Suê, nkuăl Cư M’gar. Yuh Triệu Thị Châu, Giám đốc Hợp tác xã an gĭt, knơm geh 17 nuĭh geh nti đại học, cao đẳng, jêng hợp tác xã mbơh ƀư ăp nău kan ngăch da dê. Tât aƀaơ hợp tác xã lĕ geh du nkual tăm rlău 108 ha cà phê tăm srah âk ntil tơm kơt tiêu, sầu riêng, bơ..., đah âk ndơ geh ntŭk dâk ta ntŭk tăch.

Trà mãng cầu bah Hợp tác xã jêh rnôk ntŭk tăch dơi nuĭh dŏng wơt dơn. Aƀaơ ntop tay sầu riêng pâr n’hanh play đur pâr thăng hoa jêh rnôk ndơ̆ ntŭk tăch ri dơi nuĭh dŏng ŭch. Bah nĕ gâp mĭn m’hâm ƀư he mô nkret njêng jru n’hanh srôih an tĭng ndơ gay bah kơi aơ lôch uĕh. Mpŏng ăp ndơ bah nuĭh hợp tác xã mbra hăn luh bah dih n’gor, dơi lam hvi ta lam dak Việt Nam he.

Knơm rgâl nău mĭn, tâm rgop nkra njêng trong nâp nâl, nău rêh ăp nuĭh HTX mô rlu dơi hao. Nău geh rĭng bah ăp rnăk geh bah 300-500 rkeh prăk/năm. Wa Nguyễn Công Văn, Groi Kruanh UBND nkuăl Cư M’gar uănh lah:

Hợp tác xã Bình Minh lah ngoăy tâm âk hợp tác xã pah kan geh săk rnglăy. Mô knŭng lah nău kan ndơ cà phê ma khân pơng geh nău nchrăp boăt nthoi gay tăch ăp ndơ êng bah lŏ mir, ăp ntil tơm sa play n’hanh khân pơng lĕ ƀư tĭng uĕh nău an ndơ tâm nkra njêng lŏ mir n’hanh boăt nthoi trong khlay tăch ndơ an nău kan đăp mpăn lơn. Du nău ma mpôl hên dŭt uănh tât n’hanh mpôl hên saơ đăp mpăn lơn, nĕ lah nău tâm rnglăp, nău mĭn ƀư mhe tâm mpôl Giám đóc ƀĭt joet, khân pơng ƀĭt joet săk rnglăy n’hanh mât uĕh ƀon lan ƀư tơm tâm nuĭh Hợp tác xã.

Janh mĭn joi kơt dŏng ăp trong mkra mhe, tâm rgop nkra njêng, nkret ƀư jru ăp ndơ..., ăp nuĭh ƀon lan nuĭh Dao ta ƀon Bình Minh lĕ rgop ƀư ăp nău rgâl uĕh, n’hao săk rnglăy wăng sa n’hanh khlay nkra njêng lŏ mir tâm nkual rnoi mpôl đêt ta xă Cư Suê, Cư M’gar.