Nghệ nhân ưu tú Nông Văn Hưu (nuĭh rnoi Tày, aƀaơ gŭ xă Nam Dong, nkuăl Cư Jut, n’gor Dak Nông) tă lah sỹ quan tahen sĭt ranh đah grat Thiếu tá. Dŭt n’hâm râng trong kan rêh jêng, wa Hưu dơi nuĭh ƀon lan n’hanh kruanh ƀon lan nsing nơm săch ƀư Bí thư Chi bộ thôn, jêh nĕ Bí thư Đảng ủy xă Nam Dong. Wa nkoch: Năm 1991, wa ndơ̆ ur kon bah Cao Bằng lăp Tây Nguyên ndâk njêng. Ntŭk ƀon tơm mhe geh dŭt âk nuĭh Tày, Nùng, Thái, Yuăn... bah ăp n’gor nkual yôk mpeh bah Lơ lăp rêh, ndâk njêng nău kan.

Lăp ƀon lan, Jrô kan Văn hóa nkuăl jŭr đă ƀư văn nghệ quần chúng gay râng tâm nđŭr văn nghệ quân chúng lam nkuăl. Rnôk nĕ gâp ƀư kruanh lĕ nsrôih ntĭm rmôt bôk năp geh mprơ chèo, mpât mprơ ta bah dâng hăn mprơ. Rnôk plơ̆ sĭt, gâp nti nsơm, m’hâm lơh he mô mât ndrăy nău mprơ then bah rnoi nơm ta lôk neh Tây Nguyên aơ? Tâm rnôk nău gĭt bah nơm geh đŏng? Gâp ntơm kuăl jă kônh wa, nuĭh ri rgop play nông, nuĭh ri rgop si, nuĭh ri gĭt đơn. Ŭch mprơ then nău bôk năp an dơi gŏ đơn tính.

Gĭt wât mpeh nhạc lý, gĭt blău ăp nău mprơ the bah âk ntŭk, wa Nông Văn Hưu lah ngoăy tâm âk nuĭh Tày, Nùng bôk năp ta Nam Dong lĕ djôt nău mprơ then nglăp ndrel ăp nău mprơ bah ăp rnoi nuĭh Tây Nguyên ta nkuăl Cư Jut, n’gor Dak Nông. Năm 2006, jêh rnôk rlu pah kan, wa Nông Văn Hưu dŭt n’hâm an nău ŭch mprơ then, đàn tính n’hanh tât năm 2007, wa ndrel rlău 20 nuĭh ndâk njêng Câu lạc bộ mprơ then xă Nam Dong đah săk kuăl “Hoa bằng lăng tím”. Wa Đàm Thị Tuyên, ta thôn Trung Tâm, xă Nam Dong-Nuĭh CLB mprơ then đnf tính an gĭt: Ăp rnôk ƀon lan geh nău ƀư tâm nđŭr văn hóa văn nghệ mô lah nău khlay chính trị têh, Câu lạc bộ rgop ăp nău mprơ uĕh. Aƀaơ, Câu lạc bộ hôm ƀư ăp jrô ntĭm nti đàn tính, mprơ then an âk băl mom...

Wa Hưu ƀư đàn tính, rgŏ jă oh yuh tâm ƀon gĭt đê̆ đă mpeh mprơ then, ŭch mprơ then, ŭch đàn tính gay mât nău uĕh bah rnoi Tày, Nùng. Wa leo tĭng đêt, nchih nău, oh yuh tâm rmôt ndrel nti n’hanh tâm kơl ndrel. Wa lah nuĭh geh nsing nơm bah ƀon lan gŭ tâm aơ hôm.

Tât aƀaơ, Nghệ nhân ưu tú Nông Văn Hưu lĕ geh du ntŭk mât prăp têh đah rlău 300 bài then, tâm nĕ geh âk nău nchih kơt: “Khúc tâm tình Dak Nông”, “Pắc Pó mùa thu”, “Lời then dân Bắc”, “Lời chào xứ Lạng”, “Dak Nong kính chào quý khách”...  yor câu lạc bộ mprơ then xă Nam Dong ndâk ƀư n’hanh mprơ lĕ dơn geh âk ndơ nkhôm têh tâm ăp Tâm nđŭr đàn tính, mprơ then bah n’gor, nkual n’hanh lam dak. Êng bài then “Khúc tâm tình Dak Nông” dơi Câu lạc bộ mprơ then xă Nam Dong nkuăl Cư Jut, n’gor Dak Nông, ndâk njêng, mprơ n’hanh geh giải B ta Tâm nđŭr đàn tính lam dak rơh tal 2 ƀư ta Cao Bằng năm 2007.

Năm 2015, wa Nông Văn Hưu lap dơi Ngih dak an nkhôm Nghệ nhân ưu tú yor geh âk nău geh tâm trong kan mât ndrăy đàn tính, mprơ then. Tât năm 2017, Nghệ nhân ưu tú Nông Văn Hưu dơi Kruanh N’gâng kan, Chủ nhiệm Ủy ban Dan tộc an Bằng khen ta Ƀư rnê rhơn nuĭh nsing nơm, Nhân sĩ, Trí thức ntoh lư lam dak rơh bôk năp geh âk nău blău tâm trong kan mât ndrăy nău uĕh văn hóa rnoi mpôl đêt. Lah mpeh ăp nău rgop tâm nău kan rêh jêng bah Nghệ nhân ươ tú Nông Văn Hưu, wa Trương Văn Tú, Kruanh UBND xă Nam Dong an gĭt:

Wa Nông Văn Hưu bah năp đaơ lah Bí thư đảng ủy xă Nam Dong, rnôk sĭt rlu ranh, wa dŭt leo lor tĭng uĕh ăp nău ntrŭnh bah Đảng nău kơl pháp luật bah Ngih dak, rgŏ jă kon sau kơt tĭng. Bah meng nĕ, wa lah nghệ nhân bah nuĭh Tày, Nùng, lah chủ nhiệm Câu lạc bộ, ntĭm an ăp oh kon se mât văn hóa rnoi nuĭh Tày Nùng ta mpeh Bắc. Tâm năm tât, xă rgum ntĭm rđău, kruanh ăp CLB aơ hun hao, mprơ rhŏ an nar têh bah neh dak, nău ƀư bah nkuăl, bah n’gor, CLB nar lơ geh tay nuĭh.

Bah ăp đơn ndôp đah ăp play nông joi lam Tây Nguyên, tât aƀaơ Nghệ nhân ưu tú Nông Văn Hưu lĕ lah nuĭh ê nkra đàn tính ntoh lư, dơi âk nuĭh joi tât nchăm ndơ an ăp rmôt văn nghệ way mprơ đah rlău 400 đàn tính têh jêt ăp ntil. Bôl săk ranh yơn wa hôm e mĭn joi tay nău mprơ then bah rnoi nuĭh Tày, đê̆ đŏng n’ăp rnoi nuĭh Thái. Wa mpŏng ăp n’gâng kan nău kan bah Dak Nông uănh mĭn tay, nta nơih an ăp nghệ nhân nuĭh rnoi mpôl đêt geh tay dơi râng ăp rgum tâm rlong, tâm nđŭr rgop ndơ̆ văn hóa rnoi mpôl đêt ta Tay Nguyên.