Ta trôk nar duh r’ôl, trong dak bah dak bât jong rlău 1km yor nuĭh ƀon lan thôn Long Láy 2 n’hanh Ba Tư 2, xă Ngọc Yêu, nkuăl Tu Mơ Rông tâm lah ƀư êng hôm e na nao dak hoch sĭt an lŏ ba lŏ Đăk Kring hvi ha. Ndơ dak bât jêt sŏk tu dak bah dak diăng tâm bri luh êng, trong rbông n’hoch dak tĭng ăp dôr yôk. Ta ăp ntŭk rđŭng mô lah ntŭk ŭch n’hong dak hoch tĭng nău nơm ŭch, nuĭh ƀon lan dŏng tơm đùng đình plah, lôk gol jêng mang tâm nthoi ndơ̆ dak rlet rlău ntŭk kol. Nô A Thoát, Kruanh thôn Long Láy 2 dŭt ntô̆ n’hao rnôk nkoch mpeh ndơ ƀư dak bât jêt uĕh n’hanh săk rnglăy âk bah nuĭh ƀon lan 2 thôn:

“Bar thôn rgum tâm nchră, rgum du pơh. Trong ƀư ri lah nsum kônh wa tâm rnglăp lĕ. Kônh wa ndrel rgŏ jă êng, ƀư êng trong rbông gay geh dak an tŏ tâm lŏ aơ. Geh rbông dak bât ri lah nsum kônh wa dŭt rhơn”.

Xă Ngọc Yêu, nkuăl Tu Mơ Rông geh 7 thôn đah dĭng lĕ rnoh nuĭh bơi 1.700 nuĭh n’hanh 98% lah rnoi mpôl đêt nuĭh Xơ đăng. Yor yôk yang tâm nkhah âk, yor nê bôl geh tât 140 ha neh srih tăm ba lŏ yơn dŭt âk rnoh neh jêt chray, đê̆ đă jêng n’gâng kan ƀon lan mô dơi ntuh kơl ndâk njêng ăp dak bât têh rhŏ an tuch tăm. Ta năp nău ngăn bah lơ nuĭh ƀon lan tâm xă nchrăp mĭn êng tâm jă ƀư 19 ndơ dak bât jêt nchrăp geh tu dak an 70 ha ba lŏ. Wa Lê Văn Hoàng, Kruanh UBND xă Ngọc Yêu an gĭt, yor knơm ăp dak bât jêt ma nuĭh ƀon lan ƀư êng, ăp năm dăch aơ rnoh neh ba lŏ bah xă an săk geh tĭng nău ŭch. Lĕ âk năm aơ nuĭh ƀon lan mô hôm an dăn n’gâng kan ƀon lan ntop kơl ndơ sa rnôk dăch kăch rek. Ndrel đah nĕ, nuĭh ƀon lan tâm lah ndrel mât njrăng bri gay mât tu dak tŏ an lŏ:

“Nău wât bah kônh wa aƀaơ đah nău mât bri tu dak gay đăp mpăn tu dak an hun hao tơm tăm kơt aƀaơ lah trong hun hao tơm dak si ri kônh wa ƀư dŭt uĕh. Kônh wa ƀa ƀơ ƀư uănh nđôi, lơn lah đah ăp rnoh neh ma bah năp đaơ muih mir ri aƀaơ kônh wa lĕ rgum tăm tơm si”.

Lam nkuăl Tu Mơ Rông, n’gor Kon Tum aƀaơ geh 1.270 ha ba lŏ, bơi 40 dak bât bah nkuăl yor Ngih dak ntuh kơl đăp mpăn dak tŏ an nklăp 780ha. Đah bơi 500 ha hôm ƀa ƀă kônh wa Xơ đăng ta 11 xă tâm nkuăl tâm jă ƀư êng rgop soan ƀư ăp ndơ dak bât jêt gay geh dak rhŏ an tuch tăm. Wa Phạm Xuân Quang, Groi Kruanh UBND nkuăl Tu Mơ Rông, an gĭt hăn ndrel đah nuĭh ƀon lan, ăp năm n’gâng kan ƀon lan nkuăl ntĭm rđău ăp xă đă cán bộ hăn uănh, uănh nđôi dak bât nuĭh ƀon lan ƀư êng. Đah ăp ndơ geh pĭch rlâm mô lah đang mang dak ntop  lŭ n’hanh dĭng ka su an nuĭh ƀon lan nkra tay. Knơm rgŏ jă geh prăk bah nuĭh ƀon lan, nkuăl dơi mât nkra njêng n’hanh đăp mpăn nău ndơ sông sa.

“Nkuăl Tu Mơ Rông yôk yang tâm nkhah ăp dak bât prăk ntuh kơl âk. Yor nê kônh wa ƀư êng dak bât ri nkuăl na nao ntrŭt nsôr n’hanh nta an kônh wa. Ntrong leo ƀư dak bât ri lĕ rngôch ăp xă ta nkuăl dơi ƀư da dê. Ăp xă geh ntŭk tâm nkhah, jêr jŏt ri kônh wa geh nău wât ƀư êng ăp dak bât jêt. Kônh wa rnôk geh lŏ dak đăp mpăn ri nĕ lah nău dơh an đăp mpăn ndơ sông sa n’hanh n’hŭch hun hao ƀư mir”.

Knơm nu nău mĭn nchrăp, ƀư êng âk ndơ dak bât jêt ndơ̆ dak sĭt lŏ, rnoh neh ba lŏ bah nuĭh Xơ đăng ta nkuăl Tu Mơ Rông, n’gor Kon Tum nar lơ dơi pơk hvi n’hanh n’hao săk geh. Đăp mpăn ndơ sông sa an rnăk wâl, ăp năm dăch aơ bơi 7.000 rnăk nuĭh Xơ đăng bah nkuăl Tu Mơ Rông lĕ janh ntuh kơl hun hao ăp ntil tơm tăm geh wăng sa khlay, kơt: cà phê bri nđĭk, sâm Ngọc Linh, hồng đẳng sâm, mắc ca...

Tât aƀaơ ndrel đah nău mô hôm rnăk ji ngot, du năm nkuăl Tu Mơ Rông n’hŭch geh bah 6-8% rnăk ach o âk lơn nău rƀŏng n’hŭch ach o ma n’gor Kon Tum n’gluh an./.